ಮುಂಬೈ: ಐಸಿಸಿ ಏಕದಿನ ವಿಶ್ವಕಪ್ನಲ್ಲಿ ಅವಕಾಶ ವಂಚಿತರಾದ ನಿರಾಸೆಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ್ದ ಟೀಂ ಇಂಡಿಯಾ ಆಟಗಾರ ಅಂಬಾಟಿ ರಾಯುಡು ಕಳೆದ ಕೆಲ ದಿನಗಳ ಹಿಂದೆ ನಿರ್ಧಾರದಿಂದ ಹಿಂದೆ ಸರಿದಿದ್ದರು. ಇದೀಗ ಅವರನ್ನು ಮುಂಬರುವ ವಿಜಯ್ ಹಜಾರೆ ಟ್ರೋಫಿ ಹಿನ್ನೆಲೆಯಲ್ಲಿ ಹೈದರಾಬಾದ್ ತಂಡದ ನಾಯಕನಾಗಿ ನೇಮಕ ಮಾಡಲಾಗಿದೆ.
ಕಳೆದ ವಿಶ್ವಕಪ್ನಲ್ಲಿ ಇವರ ಜಾಗಕ್ಕೆ ಆಲ್ರೌಂಡರ್ ವಿಜಯ್ ಶಂಕರ್ ತದನಂತರ ರಿಷಭ್ ಪಂತ್ ಆಯ್ಕೆಯಾಗಿದ್ದರು. ಆಯ್ಕೆ ಸಮಿತಿ ನಿರ್ಧಾರದಿಂದ ಬೇಸತ್ತು ವೃತ್ತಿ ಬದುಕಿಗೆ ರಾಯುಡು ವಿದಾಯ ಘೋಷಣೆ ಮಾಡಿದ್ದರು. ಇದಾದ ಬಳಿಕ ತಮ್ಮ ತಪ್ಪಿನ ಅರಿವಾಗಿ ನಿವೃತ್ತಿ ವಾಪಸ್ ಪಡೆದುಕೊಂಡಿದ್ದಾಗಿ ಹೇಳಿಕೆ ನೀಡಿದ್ದರು.
ನಿವೃತ್ತಿ ಘೋಷಣೆ ಹೇಳಿಕೆ ಹಿಂಪಡೆದುಕೊಳ್ಳುವಂತೆ ಮಾಡಲು ಹೈದರಾಬಾದ್ ಕ್ರಿಕೆಟ್ ಆಯ್ಕೆ ಸಮಿತಿ ಮುಖ್ಯಸ್ಥ ನೋಯೆಲ್ ಡೇವಿಡ್ ಹಾಗೂ ಮಾಜಿ ಕ್ರಿಕೆಟರ್ ವಿವಿಎಸ್ ಲಕ್ಷ್ಮಣ್ ಮಹತ್ವದ ಪಾತ್ರ ನಿರ್ವಹಿಸಿದ್ದರು.
ಸೆಪ್ಟೆಂಬರ್ 24ರಿಂದ ಕರ್ನಾಟಕ ವಿರುದ್ಧ ಸೆಣಸುವ ಮೂಲಕ ಅಭಿಯಾನ ಆರಂಭಿಸಲಿರುವ ಹೈದರಾಬಾದ್, ತದನಂತರ ಕ್ರಮವಾಗಿ ಗೋವಾ, ಆಂಧ್ರಪ್ರದೇಶ, ಜಾರ್ಖಂಡ್, ಛತ್ತೀಸ್‌ಗಢ, ಸೌರಾಷ್ಟ್ರ,ಮುಂಬೈ ಹಾಗೂ ಕೇರಳ ತಂಡದೊಂದಿಗೆ ಫೈಟ್‌ ಮಾಡಲಿದ್ದಾರೆ. ಎಲ್ಲ ಪಂದ್ಯಗಳೂ ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿವೆ.
ಹೈದರಾಬಾದ್ ತಂಡ:
ಅಂಬಾಟಿ ರಾಯುಡು (ಕ್ಯಾಪ್ಟನ್), ಬಿ ಸಂದೀಪ್ (ಡೆಪ್ಯುಟಿ ಕ್ಯಾಪ್ಟನ್), ಪಿ ಆಕಾಶ್ ರೆಡ್ಡಿ, ತನ್ಮಯಾ ಅಗರವಾಲ್, ಠಾಕೂರ್ ವರ್ಮಾ, ರೋಹಿತ್ ರಾಯುಡ, ಮಿಲಿಂದ್, ಮೆಹದಿ ಹಸನ್, ಸಾಯಿ ರಾಮ್, ಮೊಹಮ್ಮದ್ ಸಿರಾಜ್, ಜೈಸ್ವಾಲ್, ಜೆ ಮಲ್ಲಿಕಾರ್ಜುನ್(ವಿ.ಕೀ), ಟಿ ರವಿತೇಜ್, ಅಜಯ್ ದೇವ್ ಗೌಡ.
