ಡಾಕಾ: ಡೋಪಿಂಗ್ ನಿಯಮ ಉಲ್ಲಂಘನೆ ಹಿನ್ನೆಲೆ ಬಾಂಗ್ಲಾದೇಶದ ಯುವ ಕ್ರಿಕೆಟಿಗ ಕಾಝಿ ಅನಿಕ್ ಇಸ್ಲಾಮ್ ಅವರನ್ನು ಬಾಂಗ್ಲಾದೇಶ ಕ್ರಿಕೆಟ್ ಬೋರ್ಡ್ 2 ವರ್ಷಗಳ ಕಾಲ ಎಲ್ಲಾ ಮಾದರಿಯ ಕ್ರಿಕೆಟ್ನಿಂದ ನಿಷೇಧಿಸಿದೆ.
ಕಾಝಿ 2018ರ ಅಂಡರ್-19 ವಿಶ್ವಕಪ್ನಲ್ಲಿ ಬಾಂಗ್ಲಾದೇಶದ ಪರ ಹೆಚ್ಚು ವಿಕೆಟ್ ಪಡೆದಿದ್ದರು. ಅದೇ ವರ್ಷ ನಡೆದ ರಾಷ್ಟ್ರೀಯ ಕ್ರಿಕೆಟ್ ಲೀಗ್ ಪಂದ್ಯದ ಸಮಯದಲ್ಲಿ ನಿಷೇಧಿತ ವಸ್ತುವಾದ ಮೆಥಾಂಫೆಟೆಮೈನ್ ಸೇವಿಸಿರುವುದು ಡೋಪಿಂಗ್ ಪರೀಕ್ಷೆಯಲ್ಲಿ ಸಾಬೀತಾಗಿದೆ. ತಮ್ಮಿಂದಾದ ತಪ್ಪನ್ನು ಒಪ್ಪಿಕೊಂಡಿರುವ 21 ವರ್ಷದ ಆಟಗಾರನಿಗೆ ಬಿಸಿಬಿ 2 ವರ್ಷ ನಿಷೇಧ ಶಿಕ್ಷೆ ವಿಧಿಸಿದೆ.
ಅನಿಕ್ ಅವರ ದೋಷದ ಮಟ್ಟವನ್ನು ಪರಿಗಣಿಸಿ ನೋಡಿದಾಗ, ಆತ ತನ್ನ ಕ್ರೀಡಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲು ನಿಷೇಧಿತ ವಸ್ತು ಬಳಸಿಲ್ಲ. ಬದಲಾಗಿ ಹುಡುಗುತನ ಹಾಗೂ ಅನಾನುಭವ ಮತ್ತು ಡೋಪಿಂಗ್ ವಿರೋಧಿ ಶಿಕ್ಷಣ ಕೊರತೆಯಿಂದ ಸೇವಿಸಿ ಡೋಪಿಂಗ್ ನಿಯಮ ಉಲ್ಲಂಘಿಸಿದ್ದಾರೆ ಎಂದು ಬೋರ್ಡ್ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.
ತಮ್ಮ ತಪ್ಪನ್ನು ಒಪ್ಪಿಕೊಂಡು ಅನಗತ್ಯ ವಿಚಾರಣೆ ತಪ್ಪಿಸಿರುವುದಕ್ಕೆ ಮತ್ತು ಸಾಕಷ್ಟು ಸಮಯ ಮತ್ತು ಹಣವನ್ನು ಉಳಿಸಿರುವುದಕ್ಕೆ ಕಾಝಿಯನ್ನು ಮೆಚ್ಚಿಕೊಂಡಿದೆ. ಕಾಝಿ ಅವರ ನಿಷೇಧದ ಅವಧಿ ಫೆಬ್ರವರಿ 8, 2019ರಿಂದ ಆರಂಭವಾಗಿದೆ.
ಕಾಝಿ ನವೆಂಬರ್ 29ರಂದು ರಾಜಶಾಹಿ ಕಿಂಗ್ಸ್ ತಂಡದ ಪರ 2017ರಲ್ಲಿ ಬಿಪಿಎಲ್ಗೆ ಪದಾರ್ಪಣೆ ಮಾಡಿದ್ದರು. ಅವರು ಬಾಂಗ್ಲಾದೇಶ ಕಿರಿಯರ ವಿಶ್ವಕಪ್ ಹಾಗೂ 4 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿದ್ದಾರೆ ಎಂದು ತಿಳಿದು ಬಂದಿದೆ.