ಮಸ್ಕತ್(ಒಮನ್): ಆಗ್ನೇಯ ಕರಾವಳಿ ಭಾಗದ ಒಮನ್ ದೇಶದ ಸುಲ್ತಾನ್ ಖಾಬೂಸ್ ಬಿನ್ ನಿನ್ನೆ ರಾತ್ರಿ ವಿಧಿವಶರಾಗಿದ್ದಾರೆ.
ಖಾಬೂಸ್ಗೆ 79 ವರ್ಷ ವಯಸ್ಸಾಗಿದ್ದು, ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದರು. 1970ರಿಂದ 2020ರವರೆಗೆ ಓಮನ್ನ ಆಡಳಿತಗಾರನಾಗಿ ಸೇವೆ ಸಲ್ಲಿಸಿದ ಕೀರ್ತಿ ಇವರಿಗೆ ಸಲ್ಲಲಿದೆ.
1970ರಲ್ಲಿ ಗದ್ದುಗೆಗೇರಿದ ಖಾಬೂಸ್ ಒಮನ್ ದೇಶವನ್ನ ಅದ್ಬುತವಾದ ಪ್ರವಾಸಿ ತಾಣವನ್ನಾಗಿ ಮಾರ್ಪಡಿಸಿದರು, ಹಾಗೂ ಶಿಕ್ಷಣ ಸಂಸ್ಥೆಗಳಿಗೆ ಹೆಚ್ಚು ಒತ್ತು ನೀಡಿ ದೇಶದ ಶೈಕ್ಷಣಿಕ ಅಭಿವೃದ್ಧಿಗೆ ಪ್ರಮುಖ ಪಾತ್ರ ವಹಿಸಿದವರು.
ಒಮನ್ ದೇಶದ ಕಾನೂನಿನ ಪ್ರಕಾರ ಉತ್ತಾರಾಧಿಕಾರಿಯ ಸಿಂಹಾಸನ ತೆರವುಗೊಂಡ ಮೂರು ದಿನದೊಳಗಾಗಿ ಇನ್ನೋರ್ವನನ್ನು ನೇಮಿಸಬೇಕು ಆದರೆ ಖಬೂಸ್ಗೆ ಮಕ್ಕಳಿಲ್ಲದ ಕಾರಣ ಮರಣಕ್ಕೂ ಮುನ್ನ ಯಾವುದೇ ಉತ್ತರಾಧಿಕಾರಿಯನ್ನು ನೇಮಕ ಮಾಡಿಲ್ಲ.
ಆದ್ದರಿಂದ ಈ ದೇಶದ ಮಿಲಿಟರಿ ಮತ್ತು ಭದ್ರತಾ ಪಡೆ ಹಾಗೂ ನ್ಯಾಯಾಲಯದ ಮುಖ್ಯಸ್ಥರು ಸಮಾಲೋಚನಾ ಸಭೆ ನಡೆಸಿ ಸುಲ್ತಾನ್ ಈ ಮೊದಲು ಯಾವ ವ್ಯಕ್ತಿಯ ಹೆಸರನ್ನು ಗೌಪ್ಯವಾಗಿ ಪತ್ರವೊಂದರಲ್ಲಿ ಉಲ್ಲೇಖಿಸಿರುತ್ತಾರೆ ಎಂಬುದನ್ನು ಪರಿಶೀಲಿಸಿ ಅವರನ್ನೇ ಉತ್ತರಾಧಿಕಾರಿಯನ್ನಾಗಿ ನೇಮಿಸುತ್ತಾರೆ.
ಕಳೆದ ಡಿಸೆಂಬರ್ನಲ್ಲಷ್ಟೆ ಚಿಕಿತ್ಸೆಗೆಂದು ಬೆಲ್ಜಿಯಂಗೆ ತೆರಳಿದ್ದ ಇವರು ಯಾವುದೇ ಚಿಕಿತ್ಸೆ ಫಲಕಾರಿಯಾಗದ ಕಾರಣ ನಿನ್ನೆ ರಾತ್ರಿ ಅಸುನೀಗಿದ್ದಾರೆ. ಸುಲ್ತಾನ್ ಸಾವಿನ ಹಿನ್ನೆಲೆ ದೇಶದಲ್ಲಿ ಮೂರು ದಿನಗಳ ಕಾಳ ಶೋಕಾಚರಣೆ ಘೋಷಿಸಲಾಗಿದೆ.