ಎಲ್ ಸಾಲ್ವಡಾರ್: ಮಧ್ಯ ಅಮೆರಿಕದ ಪುಟ್ಟ ರಾಷ್ಟ್ರವಾದ ಎಲ್ ಸಾಲ್ವಡಾರ್ನ ಕರಾವಳಿ ತೀರದಲ್ಲಿ ಬರೋಬ್ಬರಿ 4.1 ಟನ್ನಷ್ಟು ಮಾದಕ ವಸ್ತುವನ್ನು ಜಪ್ತಿ ಮಾಡಲಾಗಿದೆ ಎಂದು ಅಲ್ಲಿನ ಸರ್ಕಾರ ಮಾಹಿತಿ ನೀಡಿದೆ.
ಫೆಸಿಪಿಕ್ ಸಾಗರದ ಕರಾವಳಿಗೆ ಎಲ್ ಸಾಲ್ವಡಾರ್ ರಾಷ್ಟ್ರ ಹೊಂದಿಕೊಂಡಿದ್ದು, ಎರಡು ಸೆಮಿ ಸಬ್ಮರ್ಸಿಬಲ್ ಹಡಗುಗಳಲ್ಲಿ ಸಾಗಣೆ ಮಾಡಲಾಗುತ್ತಿದ್ದ ಕೊಕೇನ್ ಅನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಎಲ್ ಸಾಲ್ವಡಾರ್ ಸರ್ಕಾರ ಹೇಳಿದೆ.
ಈಗ ಜಪ್ತಿಯಾಗಿರುವ ಮಾದಕ ವಸ್ತುವಿನ ಮೌಲ್ಯ ಸುಮಾರು 104 ಮಿಲಿಯನ್ ಅಮೆರಿಕನ್ ಡಾಲರ್ಗಳಾಗಿದೆ ಎಂದು ಎಲ್ ಸಾಲ್ವಡಾರ್ ಅಧ್ಯಕ್ಷ ನಯೀಬ್ ಬುಕೆಲೆ ಮಾಹಿತಿ ಅಂದಾಜಿಸಿದ್ದಾರೆ. ಬುಕೆಲೆ ಆಡಳಿತ ವಹಿಸಿಕೊಂಡಾಗಿನಿಂದ ಅಂದರೆ 2019ರ ಜೂನ್ನಿಂದ ಇದೇ ದೊಡ್ಡ ಕಾರ್ಯಾಚರಣೆ ಎಂದು ತಿಳಿದುಬಂದಿದೆ.
ಮಾದಕ ವಸ್ತು ಜಪ್ತಿ ಮಾಡಿರುವುದು ಮಾತ್ರವಲ್ಲದೇ, ಕೊಲಂಬಿಯಾದ ಐವರು ಪ್ರಜೆಗಳು, ಈಕ್ವೆಡಾರ್ನ ಇಬ್ಬರು ಪ್ರಜೆಗಳನ್ನು ಎಲ್ ಸಾಲ್ವಡಾರ್ನ ನೌಕಾಪಡೆ ಬಂಧಿಸಿದೆ. ಅಮೆರಿಕ ಮತ್ತು ಮೆಕ್ಸಿಕೋ ಸೇರಿದಂತೆ ಹಲವು ರಾಷ್ಟ್ರಗಳಿಗೆ ಆಗಾಗ ವಾಯು ಮಾರ್ಗದ ಮೂಲಕ ಅಥವಾ ಜಲಮಾರ್ಗದ ಮೂಲದ ಮಾದಕ ವಸ್ತು ಸಾಗಣೆಯಾಗುತ್ತಿರುತ್ತದೆ ಎಂದು ತಿಳಿದುಬಂದಿದೆ.
ಇನ್ನು ಸೆಮಿ ಸಬ್ ಮರ್ಸಿಬಲ್ ಬೋಟ್ಗಳ ವಿಚಾರಕ್ಕೆ ಬರುವುದಾದರೆ, ಅವುಗಳು ನೀರಿನ ಮೇಲೆ ತೇಲುವ ಬೋಟ್ಗಳಂತೆ ಕಂಡರೂ ಒಂದಷ್ಟು ಭಾಗ ನೀರಿನಲ್ಲಿ ಮುಳುಗಿರುತ್ತದೆ. ನೀರಿನಲ್ಲಿ ಮುಳಗಿರುವ ಭಾಗದಲ್ಲಿ ಮಾದಕವಸ್ತುಗಳ ಕಳ್ಳಸಾಗಣೆ ನಡೆಸಲಾಗುತ್ತದೆ. ಈಗ ಅಂಥದ್ದೇ ಬೋಟ್ ಮೂಲಕ ಕೊಕೇನ್ ಕಳ್ಳಸಾಗಣೆ ನಡೆಸಲಾಗುತ್ತಿತ್ತು.
ಇದನ್ನೂ ಓದಿ: ಕೊರೊನಾ ಆಯ್ತು ಇದೀಗ ಫ್ಲೊರೊನಾ ವೈರಸ್‌ ಪತ್ತೆ; ಏಲ್ಲಿ ಅಂತೀರಾ..?
