ತ್ರಿಕೋನ ಪ್ರೇಮಕಥೆಯಾದ 'ಬೇಬಿ' ತೆಲುಗು ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ದೊಡ್ಡ ಮಟ್ಟದ ಯಶಸ್ಸನ್ನೇ ಗಳಿಸಿತು. ಸಾಯಿ ರಾಜೇಶ್ ನಿರ್ದೇಶನದ ಈ ಚಿತ್ರ ಯುವಜನತೆಯನ್ನು ಅಪಾರವಾಗಿ ಆಕರ್ಷಿಸಿತು. ಆನಂದ್ ದೇವರಕೊಂಡ, ವೈಷ್ಣವಿ ಚೈತನ್ಯ ಮತ್ತು ವಿರಾಜ್ ಅಶ್ವಿನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿ ಪ್ರೇಕ್ಷಕರನ್ನು ವಿಶೇಷವಾಗಿ ಸೆಳೆದರು. ಜುಲೈ 14 ರಂದು ಚಿತ್ರಮಂದಿರಗಳಲ್ಲಿ ತೆರೆ ಕಂಡ ಸಿನಿಮಾವು ಬಾಕ್ಸ್ ಆಫೀಸ್ನಲ್ಲಿ 80 ಕೋಟಿ ರೂ. ಗಳಿಸಿತ್ತು.
ಓಟಿಟಿಯಲ್ಲಿ ಯಾವಾಗ?: ಈ ಸಿನಿಮಾ ಓಟಿಟಿಗೆ ಬರಲು ಸಿನಿ ಪ್ರೇಮಿಗಳು ಕಾತುರದಿಂದ ಕಾಯುತ್ತಿದ್ದರು. ಅವರಿಗೆ ಇದೀಗ ಗುಡ್ ನ್ಯೂಸ್ ಸಿಕ್ಕಿದೆ. 'ಬೇಬಿ' ಸಿನಿಮಾವು ಆಗಸ್ಟ್ 25 ರಿಂದ ಜನಪ್ರಿಯ ತೆಲುಗು OTT ಪ್ಲಾಟ್ಪಾರ್ಮ್ 'ಆಹಾ'ದಲ್ಲಿ ಸ್ಟ್ರೀಮಿಂಗ್ ಆಗಲಿದೆ. ನೀವು 'ಆಹಾ'ದ ಚಂದಾದಾರರಾಗಿದ್ದಲ್ಲಿ 12 ಗಂಟೆ ಮೊದಲೇ ಸಿನಿಮಾವನ್ನು ವೀಕ್ಷಿಸಬಹುದು. ಅಂದರೆ ಆಗಸ್ಟ್ 24 ರಂದು ಸಂಜೆ 6 ಗಂಟೆಯಿಂದ ಸಬ್ಸ್ಕ್ರೈಬರ್ಸ್ಗೆ ಸಿನಿಮಾ ಸಿಗಲಿದೆ.
4 ಗಂಟೆ ಸಿನಿಮಾ: ಇತ್ತೀಚೆಗಷ್ಟೇ ಈ ಸಿನಿಮಾದ ಅಪ್ಡೇಟ್ ಮಾಹಿತಿಯೊಂದು ಹೊರಬಿದ್ದಿದೆ. ಸುಮಾರು 3 ಗಂಟೆ ಅವಧಿಯ ಈ ಚಿತ್ರವು OTT ಪ್ಲಾಟ್ಪಾರ್ಮ್ನಲ್ಲಿ ಬಿಡುಗಡೆಯಾಗುವಾಗ 4 ಗಂಟೆ ಕಾಲ ಇರಲಿದೆಯಂತೆ. ಈ ಚಿತ್ರಕ್ಕೆ ಇನ್ನೊಂದು ಹಾಡನ್ನು ಸೇರಿಸುವುದರೊಂದಿಗೆ, ಕೆಲವು ದೃಶ್ಯಗಳನ್ನು ಕೂಡ ಸೇರಿಸಲಾಗುತ್ತದೆ ಎಂದು ವರದಿಯಾಗಿದೆ. ಇನ್ನು ವೈಷ್ಣವಿ ಚೈತನ್ಯ ಮತ್ತು ವಿರಾಜ್ ಅಶ್ವಿನ್ ನಡುವೆ ಹೆಚ್ಚಿನ ದೃಶ್ಯಗಳು ಇರಲಿದೆಯಂತೆ. ಜೊತೆಗೆ ನಾಯಕ ಆನಂದ್ ದೇವರಕೊಂಡ ಅವರಿಗೆ ಸಂಬಂಧಿಸಿದ ಕೆಲವು ಭಾವನಾತ್ಮಕ ದೃಶ್ಯಗಳು ಇರಲಿದೆಯಂತೆ. ಇದೆಲ್ಲಾ ನಿಜವೆಂದಾದರೆ ಸಿನಿಮಾವು ಓಟಿಟಿಯಲ್ಲಿ 4 ಗಂಟೆಗಳ ಕಾಲ ಪ್ರೇಕ್ಷಕರಿಗೆ ಮನರಂಜನೆ ನೀಡಲಿದೆ.
ಇದನ್ನೂ ಓದಿ: ಬಾಕ್ಸ್ ಆಫೀಸ್ನಲ್ಲಿ Gadar 2 vs OMG 2 ಫೈಟ್: 7ನೇ ದಿನದ ಕಲೆಕ್ಷನ್ ಎಷ್ಟು?
ಚಿತ್ರಕಥೆ: ವೈಷ್ಣವಿ ಮತ್ತು ಆನಂದ್ ಚಿಕ್ಕ ವಯಸ್ಸಿನಿಂದಲೇ ಪ್ರೀತಿಸಲು ಶುರು ಮಾಡುತ್ತಾರೆ. ಇವರಿಬ್ಬರ ಪ್ರೀತಿ ಶಾಲಾ ದಿನಗಳಿಂದಲೇ ಶುರುವಾಗಿ ಒಂದು ಹಂತಕ್ಕೆ ತಲುಪುತ್ತದೆ. ಆದರೆ ಹತ್ತನೇ ತರಗತಿಯಲ್ಲಿ ಆನಂದ್ ಫೇಲ್ ಆದ ಕಾರಣ ಆಟೋ ರಿಕ್ಷಾ ಚಾಲಕನಾಗಿ ಕೆಲಸ ಮಾಡಲು ಆರಂಭಿಸುತ್ತಾನೆ. ವೈಷ್ಣವಿ ಖಾಸಗಿ ಇಂಜಿನಿಯರಿಂಗ್ ಕಾಲೇಜಿಗೆ ಸೇರುತ್ತಾಳೆ. ಅಲ್ಲಿಯ ಹೊಸ ಪರಿಚಯಗಳು ವೈಶು ಆಲೋಚನಾ ವಿಧಾನವನ್ನು ಬದಲಾಯಿಸಿಬಿಡುತ್ತದೆ. ಹೀಗೆ ಆಕೆ ತನ್ನ ಸಹಪಾಠಿ ವಿರಾಜ್ಗೆ ಹತ್ತಿರವಾಗುತ್ತಾಳೆ.
ಗೆಳೆತನದ ಹೆಸರಿನಲ್ಲಿ ಶುರುವಾದ ಈ ಸಂಬಂಧ ಪ್ರೇಮಕ್ಕೆ ತಿರುಗುತ್ತದೆ. ಅನಿರೀಕ್ಷಿತ ಸಂದರ್ಭಗಳಿಂದ ವೈಷ್ಣವಿ ವಿರಾಜ್ಗೆ ದೈಹಿಕವಾಗಿ ಹತ್ತಿರವಾಗುತ್ತಾಳೆ. ಅದರ ನಂತರ ಏನಾಗುತ್ತದೆ? ಸತ್ಯ ತಿಳಿದಾಗ ಆನಂದ್ ಪ್ರತಿಕ್ರಿಯೆ ಏನು? ಎಂಬುದು ಉಳಿದ ಕಥೆ. ಅಪರಿಚಿತ ವಯಸ್ಸಿನಲ್ಲಿ ಹುಟ್ಟಿಕೊಂಡ ಪ್ರೇಮಕಥೆ ಅವರು ದೊಡ್ಡವರಾದಂತೆ ಯಾವ ತಿರುವು ಪಡೆದುಕೊಂಡು ಎಲ್ಲಿಗೆ ತಲುಪುತ್ತದೆ ಅನ್ನೋದನ್ನು ತಿಳಿಯಲು ನೀವು ಸಿನಿಮಾ ನೋಡಬೇಕು!.
ಇದನ್ನೂ ಓದಿ: 'Baby'ಯಾಗಿ ಬಂದ ವಿಜಯ್ ದೇವರಕೊಂಡ ಸಹೋದರ: ಆನಂದ್ ಸಿನಿಮಾಗೆ ಪ್ರೇಕ್ಷಕರ ಪ್ರತಿಕ್ರಿಯೆ ಹೀಗಿತ್ತು..
