ಮುಂಬೈ: ವಾಣಿಜ್ಯ ನಗರಿ ಮುಂಬೈನಲ್ಲಿ ಪೊಲೀಸರು ಭರ್ಜರಿ ಬೇಟೆಯಾಡಿದ್ದು, ಡ್ಯಾನ್ಸ್ ಬಾರ್ ಮೇಲೆ ದಾಳಿ ಮಾಡಿ ನೆಲಮಾಳಿಗೆಯಲ್ಲಿದ್ದ ಬಚ್ಚಿಟ್ಟಿದ್ದ 17 ಯುವತಿಯರನ್ನು ಪತ್ತೆ ಹಚ್ಚಿದ್ದಾರೆ. ಇವರೆಲ್ಲಾ ಬಾರ್ ಗರ್ಲ್ಸ್‌ ಆಗಿ ಇಲ್ಲಿ ಕೆಲಸ ಮಾಡುತ್ತಿದ್ದರು ಎನ್ನಲಾಗಿದೆ. ಕೆಲ ಗಂಟೆಗಳ ಕಾರ್ಯಾಚರಣೆ ಬಳಿಕ ರಹಸ್ಯ ಕೋಣೆಯಲ್ಲಿದ್ದ ಯುವತಿಯರನ್ನು ರಕ್ಷಿಸಲಾಗಿದ್ದು, ದೃಶ್ಯ ಬೆಚ್ಚಿ ಬೀಳಿಸುವಂತಿವೆ.
ಡ್ಯಾನ್ಸ್ ಬಾರ್ ರಹಸ್ಯ ನೆಲಮಾಳಿಗೆಯಲ್ಲಿ ಅಡಗಿ ಕುಳಿತಿದ್ದ 17 ಬಾರ್ ಗರ್ಲ್ಸ್‌ ಪತ್ತೆ ಹಚ್ಚಿದ್ದೇ ರೋಚಕ - ವಿಡಿಯೋ
ಕೋವಿಡ್‌ ನಿಮಯ ಉಲ್ಲಂಘಿಸಿ ಮುಂಬೈನ ಅಂಧೇರಿ ಪ್ರದೇಶದಲ್ಲಿರುವ ದೀಪಾ ಹೆಸರಿನ ಬಾರ್ ಮೇಲೆ ಕಳೆದ ಶನಿವಾರ ರಾತ್ರಿ ಪೊಲೀಸರು ದಾಳಿ ನಡೆಸಿದ್ದರು. ಪೊಲೀಸ್ ನಿಯಮಗಳನ್ನು ಗಾಳಿಗೆ ತೂರಿ ಬಾರ್ ಡ್ಯಾನ್ಸರ್‌ಗಳಿಂದ ಬಾರ್‌ಗಳಲ್ಲಿ ಬಹಿರಂಗವಾಗಿ ನೃತ್ಯ ಮಾಡಿಸಲಾಗುತ್ತಿತ್ತು. ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ನಿತ್ಯ ನೂರಾರು ಗ್ರಾಹಕರು ಬರುತ್ತಾರೆ ಎನ್ನಲಾಗಿತ್ತು. ರಾತ್ರಿಯಿಡೀ ಡ್ಯಾನ್ಸ್ ಬಾರ್ ನಡೆಸುತ್ತಿದ್ದರೂ ಈವರೆಗೆ ಸ್ಥಳೀಯ ಪೊಲೀಸರಿಗೆ ಈ ಮಾಹಿತಿ ಇರಲಿಲ್ಲ.
ಎನ್‌ಜಿಒವೊಂದು ನೀಡಿದ ಮಾಹಿತಿ ಮೇರೆಗೆ ಶನಿವಾರ ರಾತ್ರಿ 11.30ರ ಸುಮಾರಿಗೆ ಪೊಲೀಸರು ದಾಳಿ ಮಾಡಿದಾಗ ಕುಣಿದು ಕುಪ್ಪಳಿಸುತ್ತಿದ್ದ ಬಾರ್ ಗರ್ಲ್ಸ್‌ ಕೆಲವೇ ನಿಮಿಷಗಳಲ್ಲಿ ಅಲ್ಲಿಂದ ಕಣ್ಮರೆಯಾಗಿದ್ದರು. ಆಧುನಿಕ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡಿದ್ದ ಡ್ಯಾನ್ಸ್ ಬಾರ್‌ನಲ್ಲಿ ತೀವ್ರ ಶೋಧಕಾರ್ಯ ನಡೆಸಿ ನೆಲಮಾಳಿಗೆಯಲ್ಲಿ ಬಚ್ಚಿಟ್ಟುಕೊಂಡಿದ್ದ ಯುವತಿಯರನ್ನು ಪತ್ತೆ ಹಚ್ಚುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.
ಯುವತಿಯರನ್ನು ಪತ್ತೆ ಹಚ್ಚಿದ್ದು ಹೇಗೆ?
ಪೊಲೀಸರು ಡ್ಯಾನ್ಸ್‌ಬಾರ್‌ನ ಶೌಚಾಲಯ, ಸ್ಟೋರೇಜ್ ರೂಮ್, ಅಡುಗೆ ಮನೆಯ ಪ್ರತಿಯೊಂದು ಮೂಲೆಯ ಒಂದಿಂಚೂ ಬಿಡದೆ ಶೋಧ ಕಾರ್ಯ ನಡೆಸಿದರೂ ಪ್ರಯೋಜವಾಗಿರಲಿಲ್ಲ. ಬಾರ್ ಮ್ಯಾನೇಜರ್, ಕ್ಯಾಷಿಯರ್, ವೇಟರ್‌ಗಳನ್ನು ಗಂಟೆಗಟ್ಟಲೆ ವಿಚಾರಣೆ ನಡೆಸಲಾಯಿತು. ಆದರೆ, ಬಾರ್‌ನಲ್ಲಿ ಡ್ಯಾನ್ಸರ್‌ಗಳು ಇಲ್ಲ ಅಂತಲೇ ವಾದಿಸುತ್ತಿದ್ದರು.
ಪೊಲೀಸರ ನೆರವಿಗೆ ಬಂದಿದ್ದ ಎನ್‌ಜಿಒ ತಂಡ ಬಾರ್‌ನ ಮೇಕಪ್‌ ರೂಂಗೆ ಹೋಗಿ ನೋಡಿದರೂ ಯಾವುದೇ ಕುರುಹು ಪತ್ತೆಯಾಗಿರಲಿಲ್ಲ. ರೂಮಿನ ಗೋಡೆಗೆ ಅಂಟಿಸಿದ್ದ ಕನ್ನಡಿಯನ್ನು ಒಮ್ಮೆ ನೋಡಿದಾಗ ಅದು ಅಸಾಮಾನ್ಯ ಕನ್ನಡಿಯಾಗಿತ್ತು. ಅನುಮಾನಗೊಂಡು ಕನ್ನಡಿಯನ್ನು ದೊಡ್ಡ ಸುತ್ತಿಗೆಯಿಂದ ಒಡೆದಾಗ ಡ್ಯಾನ್ಸ್ ಬಾರ್‌ನ ಅವ್ಯವಹಾರ ಬಯಲಾಗಿದೆ. ಒಂದು ಗಂಟೆಯ ಪರಿಶ್ರಮದ ನಂತರ ಗೋಡೆಗೆ ಅಂಟಿಸಿದ್ದ ಗಾಜು ತೆರವು ಮಾಡಿದಾಗ ಕನ್ನಡಿಯ ಹಿಂದೆ ಕ್ಯಾವಿಟಿ ಎಂಬ ದೊಡ್ಡ ರಹಸ್ಯ ಕೋಣೆ ಪತ್ತೆಯಾಗಿದೆ. ಅದರೊಳಗೆ ಒಟ್ಟು 17 ಬಾರ್ ಗರ್ಲ್ಸ್‌ ಅಡಗಿದ್ದು, ಎಲ್ಲರನ್ನೂ ಹೊರ ತರಲಾಗಿದೆ.
ಈ ರಹಸ್ಯ ಕೊಠಡಿಗೆ ಎಸಿಯನ್ನು ಅಳವಡಿಸಲಾಗಿತ್ತು. ತಂಪು ಪಾನೀಯ, ಆಹಾರ ಪೊಟ್ಟಣಗಳು ಸ್ಥಳದಲ್ಲಿ ಪತ್ತೆಯಾಗಿವೆ. 15 ಗಂಟೆಗಳ ಕಾರ್ಯಾಚರಣೆಯ ನಂತರ ಅಂಧೇರಿ ಪೊಲೀಸ್ ಠಾಣೆಯಲ್ಲಿ ಬಾರ್ ಮ್ಯಾನೇಜರ್ ಮತ್ತು ಕ್ಯಾಷಿಯರ್ ಸೇರಿದಂತೆ ಒಟ್ಟು 20 ಮಂದಿ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಸದ್ಯ ಡ್ಯಾನ್ಸ್ ಬಾರ್ ಬಂದ್‌ ಮಾಡಲಾಗಿದೆ.
ಇದನ್ನೂ ಓದಿ: ಅಮಾವಾಸ್ಯೆ ದಿನಕ್ಕಾಗಿ ಕಾದು ಜ್ಯುವೆಲ್ಲರಿ ಶಾಪ್ಗೆ ಕನ್ನ: ರಾಜಸ್ಥಾನದ ಖತರ್ನಾಕ್ ಗ್ಯಾಂಗ್ ಅಂದರ್
