ನೆಲ್ಯಾಡಿ (ದಕ್ಷಿಣ ಕನ್ನಡ): ಮಂಗಳೂರು ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ 75 ರ ಉದನೆ ಪೇಟೆಯ ಸಮೀಪ ಹರಿಯುವ ಗುಂಡ್ಯ ಹೊಳೆಯ ದಡದ ನದಿ ಪರಂಬೋಕು ಜಾಗದಲ್ಲಿ ಭ್ರಷ್ಟಾಚಾರ ನಡೆಸಿ ಅಕ್ರಮವಾಗಿ ನಿರ್ಮಿಸುತ್ತಿರುವ ವಾಣಿಜ್ಯ ಕಟ್ಟಡ ತೆರವುಗೊಳಿಸಿ ವರದಿ ನೀಡುವಂತೆ ಕಡಬ ತಹಸೀಲ್ದಾರ್‌ಗೆ ಹೈಕೋರ್ಟ್ ಆದೇಶ ನೀಡಿದೆ.
ಉದನೆ ಪೇಟೆಯಲ್ಲಿನ ಕೊಣಾಜೆ ಗ್ರಾಮದ ಸರ್ವೆ ನಂಬ್ರ 137 ರಲ್ಲಿ ಸುಜಿ ತೋಮಸ್ ಎಂಬವರು ಗುಂಡ್ಯ ಹೊಳೆಯ ನದಿ ಕಿನಾರೆಯಲ್ಲಿ ನದಿ ಪರಂಬೋಕು ಜಾಗದಲ್ಲಿ ಗ್ರಾಮ ಪಂಚಾಯಿತಿನಿಂದ ಯಾವುದೇ ಪರವಾನಗಿ ಪಡೆಯದೇ 94ಸಿ ಯಲ್ಲಿ ಮಂಜೂರಾದ ಜಾಗದಲ್ಲಿ ಅನಧಿಕೃತವಾಗಿ ವಾಣಿಜ್ಯ ಕಟ್ಟಡ ಕಟ್ಟುತ್ತಿರುವ ಬಗ್ಗೆ ದೂರಲಾಗಿದೆ. ಇದನ್ನು ತೆರವುಗೊಳಿಸುವಂತೆ ಶಿರಾಡಿಯ ಟಿ.ಜೆ. ಮ್ಯಾಥ್ಯು ಎಂಬವರು ನೀಡಿದ ದೂರಿನ ಅರ್ಜಿಯನ್ನು ವಿಚಾರಣೆ ನಡೆಸಿದ ಕರ್ನಾಟಕ ಹೈಕೋರ್ಟ್ 8 ವಾರದ ಒಳಗಾಗಿ ಅಕ್ರಮ ಕಟ್ಟಡವನ್ನು ತೆರವುಗೊಳಿಸಿ ವರದಿ ಸಲ್ಲಿಸುವಂತೆ ಕಡಬ ತಹಸೀಲ್ದಾರ್ ಗೆ ಆದೇಶ ನೀಡಿದೆ.
94 \ ಸಿ ಮಂಜೂರಾತಿಯಲ್ಲಿ ನಡೆದಿದೆ ಭಾರೀ ಅಕ್ರಮ : ತಪ್ಪಿತಸ್ಥ ಸುಜಿ ತೋಮಸ್ ಅವರಿಗೆ ಜಾಗ ಮತ್ತು ಮನೆ ಇದೆ. ಅದಾಗ್ಯೂ ಹೆದ್ದಾರಿ ಬದಿಯಲ್ಲಿ 0.03 ಎಕ್ರೆ ಜಾಗವನ್ನು 94 ಸಿ ಅಡಿಯಲ್ಲಿ ಮಂಜೂರು ಮಾಡಲಾಗಿದೆ. ಇದರಲ್ಲಿ ವಾಣಿಜ್ಯ ಕಟ್ಟಡ ಇದ್ದು, ಬಟ್ಟೆ ಅಂಗಡಿ ನಡೆಸುತ್ತಿದ್ದಾರೆ ಎಂದು ದೂರಲಾಗಿದೆ. ಸರ್ಕಾರದ ಅಧಿಸೂಚನೆ ಪ್ರಕಾರ 94 \ ಸಿ ಮಂಜೂರಾತಿಗೆ 2012 ರ ಮೊದಲಿನ ಮನೆ ಅಥವಾ ಕನಿಷ್ಠ ಗುಡಿಸಲಾದರೂ ಇರಬೇಕು ಎಂಬ ನಿಯಮ ಇದ್ದಾಗ್ಯೂ ನದಿ ಪರಂಬೋಕು ಜಾಗವನ್ನು ಇವರ ಹೆಸರಿಗೆ 94 \ ಸಿ ಅಡಿಯಲ್ಲಿ ಮಂಜೂರಾತಿ ಮಾಡಲಾಗಿದೆ ಎಂದು ದೂರಲಾಗಿದೆ. ಇದೀಗ ಈ ನಿವೇಶನದಲ್ಲಿ ಅಕ್ರಮ ಕಟ್ಟಡ ನಿರ್ಮಿಸಿರುವುದಾಗಿ ಎಂದು ಟಿ.ಜೆ. ಮ್ಯಾಥ್ಯು ಸಲ್ಲಿಸಿದ ಅರ್ಜಿಯಲ್ಲಿ ಹೇಳಿದ್ದಾರೆ.
ಗ್ರಾಮ ಪಂಚಾಯತ್,ಜಿಲ್ಲಾಧಿಕಾರಿಗಳ ತಡೆಯಾಜ್ಞೆ ಉಲ್ಲಂಘನೆ : ನದಿ ಪರಂಬೋಕು ಜಾಗದಲ್ಲಿ ಅಕ್ರಮವಾಗಿ ವಾಣಿಜ್ಯ ಕಟ್ಟಡ ನಿರ್ಮಾಣ ಮಾಡುತ್ತಿರುವ ಬಗ್ಗೆ ಟಿ.ಜೆ. ಮ್ಯಾಥ್ಯು ಅವರು ಕೊಣಾಜೆ ಗ್ರಾಮ ಪಂಚಾಯಿತಿಗೆ ಆಕ್ಷೇಪ ದೂರು ಸಲ್ಲಿಸಿದ್ದರು. ಗ್ರಾಮ ಪಂಚಾಯಿತಿಯು ಕಟ್ಟಡ ನಿರ್ಮಾಣ ಮಾಡದಂತೆ ತಡೆಯಾಜ್ಞೆ ನೀಡಿತ್ತು. ಜೊತೆಗೆ 94 \ ಸಿ ಅಡಿ ಕಡಬ ತಹಸೀಲ್ದಾರ್ ಮಂಜೂರಾತಿ ಮಾಡಿರುವುದರ ವಿರುದ್ಧ ಟಿ.ಜೆ. ಮ್ಯಾಥ್ಯು ಅವರು ಪುತ್ತೂರು ಸಹಾಯಕ ಕಮೀಷನರ್ ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದರು. ಈ ಅರ್ಜಿಯನ್ನು ಹಿಂದಿನ ಸಹಾಯಕ ಕಮೀಷನರ್ ತಿರಸ್ಕರಿಸಿ ಸುಜಿ ತೋಮಸ್ ಪರ ಆದೇಶ ನೀಡಿರುವುದಾಗಿ ಹೇಳಲಾಗಿದೆ.
ಇದನ್ನು ಪ್ರಶ್ನಿಸಿರುವ ಟಿ.ಜೆ. ಮ್ಯಾಥ್ಯು ಜಿಲ್ಲಾಧಿಕಾರಿ ನ್ಯಾಯಾಲಯಕ್ಕೆ ಮತ್ತೆ ಮೇಲ್ಮನವಿ ಸಲ್ಲಿಸಿದ್ದಾರೆ. ಇದು ವಿಚಾರಣೆ ಹಂತದಲ್ಲಿದ್ದು, ಅಲ್ಲಿಯವರೆಗೆ ತನಕ ಕಟ್ಟಡ ನಿರ್ಮಾಣಕ್ಕೆ ತಡೆಯಾಜ್ಞೆ ನೀಡಲಾಗಿದೆ. ಆದರೂ ಕಟ್ಟಡ ಕಾಮಗಾರಿ ಮಾತ್ರ ಇಂದಿಗೂ ನಿರಂತರವಾಗಿ ನಡೆಯುತ್ತಿದ್ದು ತಡೆಯಾಜ್ಞೆಯನ್ನು ಉಲ್ಲಂಘಿಸಲಾಗಿದೆ ಎಂದು ದೂರಲಾಗಿದೆ. ಪ್ರಕರಣವನ್ನು ಪರಿಶೀಲನೆ ನಡೆಸಿದ ಮಾನ್ಯ ಹೈಕೋರ್ಟ್ ಅಕ್ರಮ ಕಟ್ಟಡವನ್ನು ತೆರವು ಮಾಡಿ ವರದಿ ಸಲ್ಲಿಸುವಂತೆ ಕಡಬ ತಹಸೀಲ್ದಾರ್ ಗೆ ಆದೇಶ ನೀಡಿದೆ.
ಗ್ರಾಮಕರಣಿಕರ, ಕಂದಾಯ ನಿರೀಕ್ಷಕರ ವರದಿಗೂ ಬೆಲೆ ಇಲ್ಲ : ಸುಜಿ ತೋಮಸ್ ಅವರಿಗೆ 94 ಸಿ ಅಡಿಯಲ್ಲಿ ಭೂ ಮಂಜೂರಾತಿ ಮಾಡಿರುವುದನ್ನು ಆಕ್ಷೇಪಿಸಿ ಟಿ.ಜೆ. ಮ್ಯಾಥ್ಯು ಅವರು ನೀಡಿರುವ ದೂರಿಗೆ ಪ್ರತಿಯಾಗಿ ಕೊಣಾಜೆ ಗ್ರಾಮಕರಣಿಕರು ಸ್ಥಳ ಪರಿಶೀಲನೆ ನಡೆಸಿ ಕಡಬ ಕಂದಾಯ ನಿರೀಕ್ಷಕರ ಮೂಲಕ ಕಡಬ ತಹಸೀಲ್ದಾರ್ ಮತ್ತು ಸಹಾಯಕ ಕಮೀಷನರ್ ಅವರಿಗೆ ವರದಿ ಸಲ್ಲಿಸಿದ್ದಾರೆ.
ಈ ವರದಿಯಲ್ಲಿ “ ಸುಜಿ ತೋಮಸ್ ಅವರಿಗೆ 94 \ ಸಿ ಅಡಿಯಲ್ಲಿ ಸ.ನಂಬ್ರ 137 \ ೩ ರಲ್ಲಿ 0.05 ಎಕ್ರೆ ಮಂಜೂರಾಗಿದ್ದು , ಇದರಲ್ಲಿ ವಾಸದ ಕಟ್ಟಡ ಇರುವುದಿಲ್ಲ ಬದಲಾಗಿ ವಾಣಿಜ್ಯ ಕಟ್ಟಡವಿದ್ದು, ಕಟ್ಟಡದ ಹಿಂಭಾಗದಲ್ಲಿ ಮತ್ತೆ ಅಕ್ರಮ ಕಟ್ಟಡ ನಿರ್ಮಿಸುತ್ತಿದ್ದಾರೆ, ಸದ್ರಿ ಪ್ರದೇಶ ಹೊಳೆ ಪರಂಬೋಕುನಲ್ಲಿ ಬರುವುದಾಗಿದೆ ” ಎಂದು ತಿಳಿಸಲಾಗಿದೆ. ಆದರೂ ಕಟ್ಟಡ ನಿರ್ಮಾಣ ಮಾಡುತ್ತಿರುವುದು ಅಧಿಕಾರಿಗಳು ಅಕ್ರಮದಲ್ಲಿ ಭಾಗಿಯಾಗಿದ್ದಾರೆಯೇ ಎಂಬ ಸಂಶಯವನ್ನು ಹುಟ್ಟುಹಾಕಿದೆ.
ಓದಿ : ಸುದೀಪ್ ಕಾರ್ಯಕ್ರಮದಲ್ಲಿ ಲೇಡಿ ಪಿಎಸ್ಐ ಜೊತೆ ಅನುಚಿತ ವರ್ತನೆ.. ಕಪಾಳ ಮೋಕ್ಷ ಮಾಡಿದ ಅಧಿಕಾರಿ!
