ಶರವೇಗದ ಶತಕ ಸಿಡಿಸಿ ಟಿ20ಯಲ್ಲಿ ವಿಶ್ವದಾಖಲೆ ಬರೆದ ಐಪಿಎಲ್​ Unsold ಬ್ಯಾಟರ್​

ಸೈಯದ್​ ಮುಷ್ತಾಕ್​ ಅಲಿ ಟ್ರೋಫಿಯಲ್ಲಿ ಇಂದು ನಡೆದ ಪಂದ್ಯದಲ್ಲಿ ಉತ್ತರಾಖಂಡದ ವಿರುದ್ಧ ಗುಜರಾತ್​ ಗೆಲುವು ಸಾಧಿಸಿತು. ಈ ಪಂದ್ಯದಲ್ಲಿ ಓರ್ವ ಬ್ಯಾಟರ್‌ ವಿಶ್ವದಾಖಲೆ ಬರೆದರು.

Urvil Patel: ಸೈಯದ್​ ಮುಷ್ತಾಕ್​ ಅಲಿ ಟ್ರೋಫಿ ಭಾಗವಾಗಿ ಇಂದು ಉತ್ತರಾಖಂಡ್​ ಮತ್ತು ಗುಜರಾತ್​ ತಂಡಗಳು ಮುಖಾಮುಖಿಯಾದವು. ಟಾಸ್​ ಸೋತು ಮೊದಲು ಬ್ಯಾಟ್​ ಮಾಡಿದ ಉತ್ತರಾಖಂಡ ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್​ ನಷ್ಟಕ್ಕೆ 182 ರನ್ ಕಲೆ ಹಾಕಿತು. ತಂಡದ ಪರ ಸಮರ್ಥ ಆರ್​ (54), ತಾರೆ (54) ಅರ್ಧಶತಕ ಸಿಡಿಸಿದರೆ, ಕುನಾಲ್​ ಚಂಡೇಲ 43 ರನ್​ಗಳ ಕೊಡುಗೆ ನೀಡಿದರು. ಈ ಮೂವರ ಬ್ಯಾಟಿಂಗ್​ ನೆರವಿನಿಂದ ಉತ್ತರಾಖಂಡ ಎದುರಾಳಿ ತಂಡಕ್ಕೆ ಸ್ಪರ್ಧಾತ್ಮಕ ಗುರಿ ನೀಡಿತು.

ಈ ಗುರಿ ಬೆನ್ನತ್ತಿದ ಗುಜರಾತ್​ ತಂಡ ಉರ್ವಿಲ್​ ಪಟೇಲ್​ ಅವರ ಸ್ಫೋಟಕ ಶತಕದಿಂದ ಕೇವಲ 13.1 ಓವರ್​ಗಳಲ್ಲೇ ಗೆಲುವಿನ ದಡ ಸೇರಿತು. ಉರ್ವಿಲ್​​ 41 ಎಸೆತಗಳನ್ನು ಎದುರಿಸಿ 8 ಬೌಂಡರಿ, 11 ಸಿಕ್ಸರ್​ ನೆರವಿನಿಂದ 280.48 ಸ್ಟ್ರೈಕ್‌ ರೇಟ್‌ನೊಂದಿಗೆ ಅಜೇಯ 115 ರನ್​ ಪೇರಿಸಿದರು. 38 ಎಸೆತಗಳಲ್ಲೇ ಉರ್ವಿಲ್​ ಶತಕ ಪೂರೈಸಿದ್ದು ವಿಶೇಷ.

ಇದನ್ನೂ ಓದಿ: 22ನೇ ವಯಸ್ಸಿನಲ್ಲಿ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ್ದ ಭಾರತೀಯ ಕ್ರಿಕೆಟರ್​ ಈಗ ₹70 ಸಾವಿರ ಕೋಟಿ ಆಸ್ತಿಗೆ ಒಡೆಯ!

🏆 Huge Congratulations to Gujarat Senior Men's Team! 🏏

What a spectacular victory over Uttarakhand CA in the Syed Mushtaq Ali Trophy! 👏

Back-to-Back Centuries: Urvil Patel steals the show with a blistering 115 off 41 balls* (8 fours & 11 sixes) – pure dominance! 💯🔥… pic.twitter.com/9BgPuF1cjf

— Gujarat Cricket Association (Official) (@GCAMotera) December 3, 2024

ಇದು ಒಂದು ವಾರದಲ್ಲಿ ಅವರ ಬ್ಯಾಟ್​ನಿಂದ ಮೂಡಿಬಂದ ಎರಡನೇ ಶತಕ. ಇದಕ್ಕೂ ಮುನ್ನ ಮಂಗಳವಾರ ನಡೆದ ಪಂದ್ಯದಲ್ಲಿ ತ್ರಿಪುರಾ ವಿರುದ್ಧ ಕೇವಲ 28 ಎಸೆತಗಳಲ್ಲೇ ಶತಕ ಸಿಡಿಸಿ ರಿಷಭ್​ ಪಂತ್​ ಅವರ ದಾಖಲೆ ಮುರಿದಿದ್ದರು. 2018ರಲ್ಲಿ ದೆಹಲಿ ಪರ ಆಡುವಾಗ ಪಂತ್ ಹಿಮಾಚಲ ಪ್ರದೇಶದ ವಿರುದ್ಧ ವೇಗದ ಶತಕ ಸಿಡಿಸಿದ್ದರು. 32 ಎಸೆತಗಳಲ್ಲಿ 100 ರನ್ ಗಳಿಸಿದ್ದರು.

ಉರ್ವಿಲ್ ವಿಶ್ವದಾಖಲೆ: ಟಿ20 ಇತಿಹಾಸದಲ್ಲೇ 40ಕ್ಕೂ ಕಡಿಮೆ ಎಸೆತಗಳಲ್ಲಿ ಒಂದೇ ವಾರದಲ್ಲಿ ಎರಡು ಶತಕ ಸಿಡಿಸಿದ ಮೊದಲ ಬ್ಯಾಟರ್​ ಎಂಬ ದಾಖಲೆಯನ್ನು ಉರ್ವಿಲ್​ ಬರೆದಿದ್ದಾರೆ. ಈ ಮಧ್ಯೆ, ಕಳೆದ ಐಪಿಎಲ್​ ಸೀಸನ್​ನಲ್ಲಿ ಗುಜರಾತ್ ಟೈಟಾನ್ಸ್‌ನ ಭಾಗವಾಗಿದ್ದ ಇವರನ್ನು ಈ ಸಲದ ಮೆಗಾ ಹರಾಜಿನಲ್ಲಿ ಯಾವುದೇ ತಂಡಗಳು ಖರೀದಿಸಿಲ್ಲ. ಇದೀಗ ಬ್ಯಾಟಿಂಗ್​ನಿಂದಲೇ ಎಲ್ಲಾ ಫ್ರಾಂಚೈಸಿಗಳಿಗೆ ಉತ್ತರ ನೀಡಿದ್ದಾರೆ.

ಟಿ20 ಕ್ರಿಕೆಟ್‌ನಲ್ಲಿ ವೇಗದ ಶತಕವೀರರು:

• 27 ಎಸೆತ - ಸಾಹಿಲ್ ಚೌಹಾಣ್ (ಎಸ್ಟೋನಿಯಾ VS ಸೈಪ್ರಸ್, 2024)
• 28 ಎಸೆತ - ಉರ್ವಿಲ್ ಪಟೇಲ್ (ಗುಜರಾತ್ VS ತ್ರಿಪುರ, 2024)
• 30 ಎಸೆತ - ಕ್ರಿಸ್ ಗೇಲ್ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು VS ಪುಣೆ ವಾರಿಯರ್ಸ್, 2013)
• 32 ಎಸೆತ - ರಿಷಭ್ ಪಂತ್ (ದೆಹಲಿ VS ಹಿಮಾಚಲ ಪ್ರದೇಶ, 2018)
• 33 ಎಸೆತ - ಡಬ್ಲ್ಯೂ ಲುಬ್ಬೆ (ನಾರ್ತ್ ವೆಸ್ಟ್ VS ಲಿಂಪೊಪೊ, 2018)
• 33 ಎಸೆತ - ಜಾನ್ ನಿಕೋಲ್ ಲಾಫ್ಟಿ-ಈಟನ್ (ನಮೀಬಿಯಾ VS ನೇಪಾಳ, 2024)

ಇದನ್ನೂ ಓದಿ: ವಿರಾಟ್​ ಕೊಹ್ಲಿ ಕುಡಿಯುವ Black Water ಎಷ್ಟು ದುಬಾರಿ ಗೊತ್ತಾ: ಬೆಲೆ ಕೇಳಿದ್ರೆ ಬೆರಗಾಗ್ತೀರ!