ನವದೆಹಲಿ: 2019-20ರ ಹಣಕಾಸು ವರ್ಷದ ಏಪ್ರಿಲ್- ಸೆಪ್ಟೆಂಬರ್ ಅವಧಿಯಲ್ಲಿ ವಿದೇಶಿ ಬಂಡವಾಳ ಹೂಡಿಕೆಯು ಶೇ 15ರಷ್ಟು ಹೆಚ್ಚಳವಾಗಿದೆ ಎಂದು ಕೈಗಾರಿಕಾ ಉತ್ತೇಜನ ಮತ್ತು ಆಂತರಿಕ ವ್ಯಾಪಾರ ಮಂಡಳಿ (ಡಿಪಿಐಐಟಿ) ತಿಳಿಸಿದೆ.
ಕೈಗಾರಿಕಾ ಉತ್ತೇಜನ ಮತ್ತು ಆಂತರಿಕ ವ್ಯಾಪಾರ ಮಂಡಳಿ ಬಿಡುಗಡೆ ಮಾಡಿದ ದತ್ತಾಂಶಗಳ ಅನ್ವಯ, 26.09 ಬಿಲಿಯನ್ ಡಾಲರ್ನಷ್ಟು ಎಫ್ಡಿಐ ಭಾರತಕ್ಕೆ ಹರಿದು ಬಂದಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 22.66 ಬಿಲಿಯನ್ ಡಾಲರ್ನಷ್ಟು ಇತ್ತು ಎಂದು ಹೇಳಿದೆ.
ಸೇವಾ ವಲಯದ ಹಣಕಾಸು, ಬ್ಯಾಂಕಿಂಗ್, ವಿಮೆ, ಹೊರಗುತ್ತಿಗೆ ಇಂಡಸ್ಟ್ರಿಗಳು ಅತಿಹೆಚ್ಚಿನ ಹೂಡಿಕೆಯ ತಾಣಗಳಾಗಿವೆ. ಇವುಗಳ ಸ್ವೀಕೃತಿ ಮೊತ್ತವು 4.4 ಬಿಲಿಯನ್ ಡಾಲರ್ನಷ್ಟಿದೆ. ಈ ಬಳಿಕ ಟೆಲಿಕಾಂ ವಲಯ 4.3 ಬಿಲಿಯನ್ ಡಾಲರ್ ಮತ್ತು ಕಂಪ್ಯೂಟರ್ ಸಾಫ್ಟವೇರ್ ಹಾಗೂ ಹಾರ್ಡ್ವೇರ್ 4 ಬಿಲಿಯನ್ ಡಾಲರ್ ಮೂಲಕ ನಂತರದ ಸ್ಥಾನದಲ್ಲಿವೆ.
ಭಾರತದ ಎಫ್ಡಿಐ ಒಟ್ಟು ಪಾಲಿನಲ್ಲಿ ಸಿಂಗಾಪೂರ 8 ಬಿಲಿಯನ್ ಡಾಲರ್ ಮುಖೇನ ಅತ್ಯಧಿಕ ಪ್ರಮಾಣದಲ್ಲಿ ಹೂಡಿಕೆ ಮಾಡಿದೆ. ಉಳಿದಂತೆ ಮಾರಿಷಸ್ 6.3 ಬಿಲಿಯನ್ ಡಾಲರ್, ನೆದರ್ಲ್ಯಾಂಡ್ 2.3 ಬಿಲಿಯನ್ ಡಾಲರ್, ಅಮೆರಿಕ 2.1 ಬಿಲಿಯನ್ ಡಾಲರ್ ಹಾಗೂ ಜಪಾನ್ 1.7 ಬಿಲಿಯನ್ ಡಾಲರ್ನಷ್ಟಿದೆ.
ದೇಶದ ರಾಜ್ಯಗಳ ಪೈಕಿ ಕರ್ನಾಟಕ ನಂಬರ್ -1
ಕೇಂದ್ರಾಡಳಿತ ಪ್ರದೇಶವಾದ ರಾಷ್ಟ್ರ ರಾಜಧಾನಿ ದೆಹಲಿ, 7.1 ಬಿಲಿಯನ್ ಡಾಲರ್ ಎಫ್ಡಿಐ ಆಕರ್ಷಿಸಿದೆ. ರಾಜ್ಯಗಳ ಪೈಕಿ ಕರ್ನಾಟಕ ಪ್ರಥಮ ಸ್ಥಾನದಲ್ಲಿದ್ದು, 2019-20ನೇ ಹಣಕಾಸು ವರ್ಷದ ಮೊದಲ ಮಧ್ಯಾಂತರ ವೇಳೆ 4.6 ಬಿಲಿಯನ್ ಡಾಲರ್ ಹೂಡಿಕೆಯಾಗಿದೆ. ಕಳೆದ ವರ್ಷದಲ್ಲಿ ಪ್ರಥಮ ಸ್ಥಾನದಲ್ಲಿದ್ದ ಮಹಾರಾಷ್ಟ್ರ 3.6 ಬಿಲಿಯನ್ ಡಾಲರ್ ಮೂಲಕ 2ನೇ ಸ್ಥಾನಪಡೆದಿದೆ.
