ನವದೆಹಲಿ: ಮೆಗಾ ಪ್ರಾಜೆಕ್ಟ್ವೊಂದಕ್ಕೆ ಕೈ ಹಾಕಿರುವ ಹಿಂದೂಸ್ತಾನ್‌ ಏರೊನಾಟಿಕ್ಸ್‌ ಲಿಮಿಟೆಡ್‌ (ಎಚ್ಎಎಲ್), 2027 ರ ವೇಳೆಗೆ ಅಪಾಚೆ ಹೆಲಿಕಾಪ್ಟರ್‌ಗಳಿಗೆ ಸರಿಸಮನಾದ ಸೇನಾ ಹೆಲಿಕಾಪ್ಟರ್ ನಿರ್ಮಿಸಲು ಸಿದ್ಧವಿರುವುದಾಗಿ ಘೋಷಿಸಿದೆ.
ಅಪಾಚೆ ಮಾದರಿಯ ಹೆಲಿಕಾಪ್ಟರ್‌ನ ಪ್ರಾಥಮಿಕ ವಿನ್ಯಾಸವನ್ನು ಈಗಾಗಲೇ ಪೂರ್ಣಗೊಳಿಸಿದ್ದು, ಆರಂಭಿಕವಾಗಿ ಕನಿಷ್ಠ 500 ಹೆಲಿಕಾಪ್ಟರ್ಗಳನ್ನು ಉತ್ಪಾದಿಸುವ ಪ್ಲಾನ್ ಇದೆ. ಈ ವರ್ಷವೇ ಸರ್ಕಾರ ಅನುಮತಿ ನೀಡಿದರೆ ಯೋಜನೆ ಪ್ರಾರಂಭಿಸಲಿದ್ದೇವೆ ಎಂದು ಸಂದರ್ಶನವೊಂದರಲ್ಲಿ ಎಚ್ಎಎಲ್ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಆರ್‌ ಮಾಧವನ್‌ ಮಾಹಿತಿ ನೀಡಿದ್ದಾರೆ.
ಎಂಐ-17 ಹೆಲಿಕಾಪ್ಟರ್ಗೆ ಬದಲಾಗಿ 10-12 ಟನ್‌ ತೂಕದ ಸೇನಾ ಹೆಲಿಕಾಪ್ಟರ್ ತಯಾರಿಸುವ ಯೋಜನೆ ಕಡೆ ನಾವು ಗಮನ ಹರಿಸುತ್ತಿದ್ದೇವೆ. ಇದು ಮುಂಬರುವ ವರ್ಷಗಳಲ್ಲಿ 4 ಲಕ್ಷ ಕೋಟಿ ರೂ.ಗಿಂತ ಹೆಚ್ಚು ಮೌಲ್ಯದ ಮಿಲಿಟರಿ ಹೆಲಿಕಾಪ್ಟರ್ಗಳನ್ನು ಆಮದು ಮಾಡಿಕೊಳ್ಳುವುದನ್ನು ತಡೆಯಲಿದೆ ಎಂದು ಮಾಧವನ್‌ ತಿಳಿಸಿದ್ದಾರೆ.
ತೇಜಸ್ ಮಿಲಿಟರಿ ವಿಮಾನದ ಅಭಿವೃದ್ಧಿಯ ನಂತರ ಎಚ್‌ಎಎಲ್ನ ದೊಡ್ಡ ಯೋಜನೆ ಇದಾಗಲಿದೆ ಎಂದು ಸೇನಾ ತಜ್ಞರು ತಿಳಿಸಿದ್ದಾರೆ. ಭಾರತವು ಹೆಚ್ಚಿನ ಪ್ರಮಾಣದಲ್ಲಿ ಶಸ್ತ್ರಾಸ್ತ್ರಗಳನ್ನು ಆಮದುಕೊಳ್ಳುವ ದೇಶವಾಗಿದ್ದು, ದೇಶೀಯವಾಗಿ ಸೇನಾ ಹೆಲಿಕಾಪ್ಟರ್ ತಯಾರಿಕೆಗೆ ಉತ್ತೇಜನ ನೀಡುವ ಭರವಸೆಯಿದೆ.
