ತಿರುನಲ್ವೇಲಿ: ತಮಿಳುನಾಡಿನ ತೂತುಕುಡಿ, ತಿರುನಲ್ವೇಲಿ, ತೆಂಕಾಸಿ, ಕನ್ಯಾಕುಮಾರಿ ಸೇರಿದಂತೆ ದಕ್ಷಿಣದ ಜಿಲ್ಲೆಗಳಲ್ಲಿ ಅಧಿಕ ಮಳೆಯಾಗಿದೆ. ಇದರಿಂದ ತಿರುನಲ್ವೇಲಿ ಜಿಲ್ಲೆ ತೀವ್ರ ತೊಂದರೆಗೀಡಾಗಿದ್ದು, ಸಾರಿಗೆ ಸೇವೆ ಸಂಪೂರ್ಣ ಸ್ಥಗಿತಗೊಂಡಿದೆ. 17ರ ರಾತ್ರಿ ತೂತುಕುಡಿ ಜಿಲ್ಲೆಯ ತಿರುಚೆಂಡೂರಿನಿಂದ ಚೆನ್ನೈ ಕಡೆಗೆ ತೆರಳುತ್ತಿದ್ದ ತಿರುಚೆಂದೂರ್ ಎಕ್ಸ್ ಪ್ರೆಸ್ ರೈಲನ್ನು ಪ್ರವಾಹದ ಕಾರಣ ಶ್ರೀವೈಕುಂಟಂ ರೈಲು ನಿಲ್ದಾಣದಲ್ಲಿ ನಿಲ್ಲಿಸಲಾಗಿತ್ತು. ಈ ರೈಲಿನಲ್ಲಿ ಒಟ್ಟು 22 ಬೋಗಿಗಳಿದ್ದು, ಸುಮಾರು 800 ಪ್ರಯಾಣಿಕರು ಸಿಲುಕಿಕೊಂಡಿದ್ದರು. ರೈಲ್ವೆ ನಿಲ್ದಾಣದಲ್ಲಿ ಸಿಲುಕಿಕೊಂಡಿದ್ದ 500 ಜನ ಪ್ರಯಾಣಿಕರನ್ನು ರಕ್ಷಿಸಲಾಗಿದೆ.
ರೈಲು ನಿಲ್ದಾಣದ ಸುತ್ತಮುತ್ತ ನೀರು ತುಂಬಿಕೊಂಡಿರುವುದರಿಂದ ಪ್ರಯಾಣಿಕರ ಬಳಿ ರಕ್ಷಣಾ ತಂಡ ತೆರಳಲು ಸಮಸ್ಯೆ ಆಗುತ್ತಿತ್ತು. ಹೀಗಾಗಿ ಮೂರು ದಿನಗಳಿಂದ ಪ್ರಯಾಣಿಕರು ಆಹಾರ ನೀರು ಇಲ್ಲದೇ ಕಾಲ ಕಳೆದಿದ್ದರು. ಇಂದು ಕೊಯಮತ್ತೂರು ಜಿಲ್ಲೆಯಿಂದ 1.3 ಟನ್ ಡೈರಿ ಉತ್ಪನ್ನಗಳು, ಬ್ರೆಡ್ ಮತ್ತು ಇತರ ಆಹಾರ ಪದಾರ್ಥಗಳನ್ನು ಹೆಲಿಕಾಪ್ಟರ್ ಮೂಲಕ ಸೂಲೂರು ವಾಯುಪಡೆಯ ನೆಲೆಯಿಂದ ತಿರುನಲ್ವೇಲಿ ಕಳುಹಿಸಲಾಗಿತ್ತು.
ಚೆನ್ನೈ ಮತ್ತು ಮಧುರೈನಂತಹ ನಗರಗಳಿಂದ ಆರ್‌ಪಿಎಫ್ ಸಿಬ್ಬಂದಿ (ಆರ್‌ಪಿಎಫ್) ಸೇನಾ ಸಿಬ್ಬಂದಿ ಮತ್ತು ಪೊಲೀಸರು ಶ್ರೀವೈಕುಂಡಂ ರೈಲು ನಿಲ್ದಾಣದಲ್ಲಿ ರೈಲು ಪ್ರಯಾಣಿಕರನ್ನು ರಕ್ಷಿಸಲು ನಿರಂತರವಾಗಿ ಪ್ರಯತ್ನಿಸುತ್ತಿದ್ದಾರೆ. ಅದರಲ್ಲೂ ರೈಲಿನಲ್ಲಿ ಗರ್ಭಿಣಿಗೆ ಸೂಕ್ತ ವೈದ್ಯಕೀಯ ಚಿಕಿತ್ಸೆ ಒದಗಿಸಲಾಗಿದೆ.
ಸ್ಥಳಾಂತರಿಸುವ ಪ್ರಕ್ರಿಯೆ: ರೈಲ್ವೆ ತಂಡ ತಲುಪಿದ ನಂತರ ಎನ್ಡಿಆರ್ಎಫ್ ಕೂಡ ಶ್ರೀವೈಕುಂಟಂ ರೈಲು ನಿಲ್ದಾಣ ತಲುಪಿದೆ. ತಕ್ಷಣವೇ ರೈಲ್ವೆ ರಕ್ಷಣಾ ಪಡೆ, ತಮಿಳುನಾಡು ಅಗ್ನಿಶಾಮಕ ಸ್ಥಳಾಂತರಿಸುವ ಪ್ರಕ್ರಿಯೆಯಲ್ಲಿ ತೊಡಗಿದೆ. ಡಿ. 19ರ ಸಂಜೆಯ ವರೆಗೆ 509 ಪ್ರಯಾಣಿಕರನ್ನು ಸ್ಥಳಾಂತರಿಸಲಾಗಿದೆ. ಅವರನ್ನು ವಂಚಿಮಣಿಯಾಚ್ಚಿ ನಿಲ್ದಾಣಕ್ಕೆ ಕರೆದುಕೊಂಡು ಹೋಗಲಾಗಿದ್ದು, ಅಲ್ಲಿಂದ ಬಸ್‌ ಅಥವಾ ವಿಶೇಷ ರೈಲಿನ ಮೂಲಕ ಚೆನ್ನೈಗೆ ಕಳುಹಿಸಲು ಸಿದ್ಧತೆ ಮಾಡಲಾಗಿದೆ.
ಶ್ರೀವೈಕುಂಟಂನ ಶಾಲೆಯಲ್ಲಿರುವ 300 ಮಂದಿ ಪ್ರಯಾಣಿಕರಲ್ಲಿ 270 ಜನ ಸ್ಥಳೀಯರಾಗಿರುವುದರಿಂದ ಸುರಕ್ಷಿತವಾಗಿ ತಮ್ಮ ತಮ್ಮ ಮನೆಗಳನ್ನು ಸೇರಿಕೊಂಡಿದ್ದಾರೆ. ಉಳಿದ 30 ಪ್ರಯಾಣಿಕರು ಆರ್‌ಪಿಎಫ್ ಸಹಾಯದಿಂದ ರಸ್ತೆ ಮೂಲಕ ವಂಚಿಮಣಿಯಾಚ್ಚಿ ನಿಲ್ದಾಣಕ್ಕೆ ತೆರಳಿದ್ದಾರೆ.
ಮಳೆಗೆ ಕಾರಣ ಏನು?: ಪ್ರಾದೇಶಿಕ ಹವಾಮಾನ ಬುಲೆಟಿನ್ ಪ್ರಕಾರ ಕೊಮೊರಿನ್ ಪ್ರದೇಶ ಮತ್ತು ಅದರ ಸುತ್ತಮುತ್ತ ಚಂಡಮಾರುತ ಕಂಡು ಬರುತ್ತಿದೆ. ಇದು ಶನಿವಾರದಂದು ದಕ್ಷಿಣ ಶ್ರೀಲಂಕಾ ಕರಾವಳಿಯಿಂದ ಸಮಭಾಜಕ ಹಿಂದೂ ಮಹಾಸಾಗರ ಮತ್ತು ಪಕ್ಕದ ನೈಋತ್ಯ ಬಂಗಾಳ ಕೊಲ್ಲಿಯಲ್ಲಿ ಕಡಿಮೆ ಉಷ್ಣವಲಯದ ಮಟ್ಟದಲ್ಲಿತ್ತು. ಈ ಪರಿಚಲನೆಯು ಡಿಸೆಂಬರ್ 16 ರಿಂದ ಡಿಸೆಂಬರ್ 17ರ ಬೆಳಗ್ಗೆ ತಿರುನಲ್ವೇಲಿ, ಕನ್ನಿಯಾಕುಮಾರಿ ಮತ್ತು ತೆಂಕಾಸಿ ಜಿಲ್ಲೆಗಳಿಗೆ ಅಪ್ಪಳಿಸಿದ್ದು ಭಾರಿ ಮಳೆಗೆ ಕಾರಣವಾಗಿದೆ.
ಇದನ್ನೂ ಓದಿ: ಶ್ರೀವೈಕುಂಟಂ ರೈಲು ನಿಲ್ದಾಣದಲ್ಲಿ ಸಿಲುಕಿರುವ 500 ಪ್ರಯಾಣಿಕರು; ಮುಂದುವರೆದ ರಕ್ಷಣಾ ಕಾರ್ಯಾಚರಣೆ
