ನಾಗ್ಪುರ (ಮಹಾರಾಷ್ಟ್ರ): ಮಹಾರಾಷ್ಟ್ರದ ನಾಗ್ಪುರದ ಬಿಜೆಪಿ ನಾಯಕಿ ಸನಾ ಖಾನ್ ಕೊಲೆಯಾಗಿ 25 ದಿನಗಳ ಕಳೆದರೂ ಮೃತದೇಹ ಪತ್ತೆಯಾಗಿಲ್ಲ. ಅಲ್ಲದೇ, ಈಕೆಯ ಮೊಬೈಲ್ ಫೋನ್ ಕೂಡ ಸಿಕ್ಕಿಲ್ಲ. ಆದ್ದರಿಂದ ಈ ಪ್ರಕರಣದ ರಹಸ್ಯವನ್ನು ಭೇದಿಸಲು ಪೊಲೀಸ್ ತನಿಖಾ ತಂಡಗಳು ಗೂಗಲ್ ಮೊರೆ ಹೋಗಿವೆ.
ಪೂರ್ವ ಮಹಾರಾಷ್ಟ್ರ ನಗರ ಬಿಜೆಪಿ ಅಲ್ಪಸಂಖ್ಯಾತ ಸೆಲ್ ಕಾರ್ಯಕಾರಿ ಸದಸ್ಯೆಯಾಗಿದ್ದ 34 ವರ್ಷದ ಸನಾ ಖಾನ್ ಆಗಸ್ಟ್ 1ರಂದು ನಾಪತ್ತೆಯಾಗಿದ್ದರು. ಮಧ್ಯಪ್ರದೇಶದ ಜಬಲ್‌ಪುರದ ಅಮಿತ್ ಸಾಹು ಅಲಿಯಾಸ್ ಪಪ್ಪು ಎಂಬಾತನನ್ನು ಮದುವೆಯಾಗಿದ್ದ ಸನಾ ಖಾನ್ ಪತಿಯ ಭೇಟಿಗಾಗಿ ಜಬಲ್ಪುರಕ್ಕೆ ತೆರಳಿದ್ದರು. ಆದರೆ, ಬಳಿಕ ಅಲ್ಲಿಂದ ಕಾಣೆಯಾಗಿದ್ದಾರೆ ಎಂದು ಸನಾ ಖಾನ್ ತಾಯಿ ಮೆಹ್ರುನಿಶಾ ನಾಗ್ಪುರ ಪೊಲೀಸರಿಗೆ ದೂರು ನೀಡಿದ್ದರು. ಈ ದೂರಿನ ಮೇರೆಗೆ ನಾಗ್ಪುರ ಹಾಗೂ ಜಬಲ್‌ಪುರ ಪೊಲೀಸರು ಜಂಟಿಯಾಗಿ ತನಿಖೆ ಕೈಗೊಂಡ 10 ದಿನಗಳ ನಂತರ ಸನಾ ಖಾನ್ ಕೊಲೆಯಾಗಿರುವುದು ಬಯಲಾಗಿತ್ತು.
ಅಂತೆಯೇ, ಸನಾ ಖಾನ್ ಪತಿ ಅಮಿತ್ ಸಾಹು ಹಾಗೂ ಜಬಲ್‌ಪುರದ ನಿವಾಸಿಗಳಾದ ರಮೇಶ್ ಸಿಂಗ್ ಮತ್ತು ಧರ್ಮೇಂದ್ರ ಯಾದವ್ ಸೇರಿ ಮೂವರನ್ನು ಪೊಲೀಸರು ಬಂಧಿಸಿದ್ದರು. ಆಗ ಪೊಲೀಸ್ ವಿಚಾರಣೆಯ ವೇಳೆ ಆರೋಪಿ ಪತಿ ಸನಾ ಖಾನ್ರನ್ನು ಆರ್ಥಿಕ ಮತ್ತು ವೈಯಕ್ತಿಕ ವಿಷಯಗಳಾಗಿ ಕೊಲೆ ಮಾಡಿರುವುದಾಗಿ ಬಾಯ್ಬಿಟ್ಟಿದ್ದ. ಹತ್ಯೆಯ ನಂತರ ಬೆಲ್ಖೇಡ ಪೊಲೀಸ್ ಠಾಣಾ ವ್ಯಾಪ್ತಿಯ ಮೆರೆಗಾಂವ್ ಗ್ರಾಮದ ಬಳಿಯ ಸೇತುವೆಯಿಂದ ಶವವನ್ನು ಹಿರಾನ್ ನದಿಗೆ ಎಸೆದಿರುವ ಬಗ್ಗೆಯೂ ಮಾಹಿತಿ ನೀಡಿದ್ದ ಎಂದು ಪೊಲೀಸರು ತಿಳಿಸಿದ್ದರು.
ಆದರೆ, ಅಂದಿನಿಂದ ಇದುವರೆಗೆ ಸನಾ ಖಾನ್ ಮೃತದೇಹವಾಗಲಿ ಅಥವಾ ಮೊಬೈಲ್ ಆಗಲಿ ಪತ್ತೆಯಾಗಿಲ್ಲ. ಆದ್ದರಿಂದ ಪ್ರಕರಣವನ್ನು ತಾಂತ್ರಿಕವಾಗಿ ತನಿಖೆ ಮಾಡಲು ತನಿಖಾ ತಂಡಗಳು ಗೂಗಲ್ ನೆರವು ಪಡೆಯಲು ಮುಂದಾಗಿವೆ. ಈ ಕುರಿತ ಉಪ ಪೊಲೀಸ್ ಆಯುಕ್ತ ರಾಹುಲ್ ಮದನೆ ಮಾತನಾಡಿ, ''ಸನಾ ಖಾನ್ ಮೊಬೈಲ್ ಫೋನ್ ಅನೇಕ ರಹಸ್ಯಗಳನ್ನು ಬಹಿರಂಗಪಡಿಸಬಹುದು. ಇದು ಈ ಕೊಲೆ ರಹಸ್ಯವನ್ನು ಭೇದಿಸಲು ಸಹ ತನಿಖಾ ತಂಡಗಳಿಗೆ ನೆರವಾಗಲಿದೆ'' ಎಂದು ತಿಳಿಸಿದ್ದಾರೆ. ಅಲ್ಲದೇ, ''ದೂರವಾಣಿ ಕರೆ ವಿವರಗಳು ಅಥವಾ ಮೆಸೇಜ್ಗಳ ಡೇಟಾವನ್ನು ಕಲೆಹಾಕಲು ಪೊಲೀಸರು ಆಕೆಯ ಮೊಬೈಲ್ ಫೋನ್ ಪತ್ತೆ ಹಚ್ಚಲು ಪ್ರಯತ್ನಿಸುತ್ತಿದ್ದಾರೆ. ಇದು ಮೃತದೇಹವನ್ನು ಪತ್ತೆ ಹಚ್ಚಲು ಕೂಡ ನಮಗೆ ಸಹಕಾರಿಯಾಗಲಿದೆ. ಈ ಪ್ರಕರಣದಲ್ಲಿ ಸನಾ ಖಾನ್ ಮೊಬೈಲ್ ಫೋನ್ ನಮಗೆ ಅತ್ಯಂತ ಪ್ರಮುಖ ಸಾಕ್ಷಿ" ಎಂದು ರಾಹುಲ್ ಮದನೆ ಹೇಳಿದ್ದಾರೆ.
ಮತ್ತೊಂದೆಡೆ, ಇದೇ ಪ್ರಕರಣದಲ್ಲಿ ಮಧ್ಯಪ್ರದೇಶದ ಕಾಂಗ್ರೆಸ್ ಶಾಸಕ ಸಂಜಯ್ ಶರ್ಮಾ ಅವರನ್ನು ಈ ಹಿಂದೆ ನಾಗ್ಪುರದಲ್ಲಿ ಪೊಲೀಸರು ವಿಚಾರಣೆಗೆ ಒಳಪಡಿಸಿದ್ದರು. ಸನಾ ಖಾನ್ ಪತಿ ಅಮಿತ್ ಸಾಹು ಮತ್ತು ಸಂಜಯ್ ಶರ್ಮಾ 15 ವರ್ಷಗಳ ಹಿಂದೆ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು ಎಂಬ ಮಾಹಿತಿ ಮೇರೆಗೆ ವಿಚಾರಣೆ ನಡೆಸಿದ್ದರು. ಆದರೆ, ಈ ವೇಳೆ ಸಂಜಯ್ ಶರ್ಮಾ ಕೆಲಸ ಬಿಟ್ಟಾಗಿನಿಂದ ಸಾಹು ಜೊತೆಗೆ ಯಾವುದೇ ಸಂಪರ್ಕವಿಲ್ಲ ಎಂದು ಹೇಳಿದ್ದರು.
ಇದನ್ನೂ ಓದಿ: BJP leader missing case: ನಾಪತ್ತೆಯಾಗಿದ್ದ ಬಿಜೆಪಿ ನಾಯಕಿ ಸನಾ ಖಾನ್ ಹತ್ಯೆ: ಹೊಡೆದು ಕೊಂದು ಶವ ನದಿಗೆ ಎಸೆದ ಪತಿ!
