ಕೋಲ್ಕತ್ತಾ(ಪಶ್ಚಿಮಬಂಗಾಳ): ಶಸ್ತ್ರಚಿಕಿತ್ಸೆಗೆಂದು ಭಾರತೀಯರು ವಿದೇಶದ ಆಸ್ಪತ್ರೆಗಳಿಗೆ ತೆರಳುತ್ತಾರೆ. ಆದರೆ, ವಿದೇಶಿ ಪ್ರಜೆಯೊಬ್ಬನಿಗೆ ಪಶ್ಚಿಮಬಂಗಾಳದ ಆಸ್ಪತ್ರೆಯೊಂದು ವಿರಳ ರೂಪದ ಮೂತ್ರಪಿಂಡ ಆಪರೇಷನ್ ಮಾಡಿ ಮಹತ್ತರ ಸಾಧನೆಗೈದಿದೆ. ಇದು ದೇಶದಲ್ಲಿಯೇ ಮೊದಲು ಎಂದು ಹೇಳಲಾಗ್ತಿದೆ.
ಈ ಸಾಧನೆ ಮೂಡಿಬಂದಿದ್ದು ಕೋಲ್ಕತ್ತಾದ ಮುಕುಂದಾಪುರದ ಖಾಸಗಿ ಆಸ್ಪತ್ರೆ ವೈದ್ಯರಿಂದ. ಆಫ್ರಿಕಾ ಖಂಡದ ಘಾನಾದ 51 ವರ್ಷದ ಪ್ರಜೆಗೆ ಅಪರೂಪದ ಕಿಡ್ನಿ ಯಶಸ್ವಿ ಶಸ್ತ್ರಚಿಕಿತ್ಸೆ ಮಾಡಲಾಗಿದೆ. ಕಿಡ್ನಿ ದಾನ ಮಾಡಿದ ವ್ಯಕ್ತಿ ಮತ್ತು ರೋಗಿಯ ರಕ್ತದ ಗುಂಪು ವಿಭಿನ್ನವಾಗಿದ್ದಲ್ಲದೇ, ರೋಗಿ ಎಚ್ಐವಿ ಸೋಂಕಿನಿಂದ ಬಳಲುತ್ತಿದ್ದರು.
ಇಂತಹ ಸಂದಿಗ್ಧ ಸನ್ನಿವೇಶವನ್ನು ಸವಾಲಾಗಿ ಸ್ವೀಕರಿಸಿದ ವೈದ್ಯರ ತಂಡ, ಘಾನಾ ಪ್ರಜೆಗೆ ಮೂತ್ರಪಿಂಡದ ಕಸಿ ಶಸ್ತ್ರಚಿಕಿತ್ಸೆಗೆ ಒಪ್ಪಿದೆ. 2 ತಿಂಗಳಿಂದ ರೋಗಿಯ ಮೇಲೆ ತೀವ್ರ ನಿಗಾ ವಹಿಸಿದ್ದ ವೈದ್ಯರು ಅಕ್ಟೋಬರ್ 27 ರಂದು ಕಿಡ್ನಿ ಕಸಿ ಚಿಕಿತ್ಸೆ ಮಾಡಿ ಯಶಸ್ವಿಯಾಗಿದೆ.
ವಿಭಿನ್ನ ರಕ್ತ ಗುಂಪಿನ ವ್ಯಕ್ತಿಯಿಂದ ಕಿಡ್ನಿ ದಾನವಾಗಿ ಪಡೆದು ಎಚ್ಐವಿ ಸೋಂಕಿತ ರೋಗಿಗೆ ಕಸಿ ಮಾಡಿರುವುದು ದೇಶದಲ್ಲಿಯೇ ಅಪರೂಪದ ಘಟನೆ ಎಂದು ಹೇಳಲಾಗ್ತಿದೆ. ಆಪರೇಷನ್ ಬಳಿಕ ರೋಗಿ ಸಂಪೂರ್ಣವಾಗಿ ಆರೋಗ್ಯವಾಗಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.
ಓದಿ: ಕರ್ನಾಟಕ, ರಾಜಸ್ಥಾನ, ಒಡಿಶಾದಲ್ಲಿ ಹನಿಟ್ರ್ಯಾಪ್.. ಉದ್ಯಮಿಗಳನ್ನು ಬೆತ್ತಲಾಗಿಸಿದ ಮಹಿಳೆ ಅರೆಸ್ಟ್
