ಕಡಪ, ಆಂಧ್ರಪ್ರದೇಶ : ದಕ್ಷಿಣ ಭಾರತದ ಹಲವೆಡೆ ಹಲವು ದಿನಗಳಿಂದ ಭಾರಿ ಮಳೆಯಾಗುತ್ತಿದೆ. ಕರ್ನಾಟಕ, ತಮಿಳುನಾಡು, ಕೇರಳದಲ್ಲಿ ಸಾಕಷ್ಟು ಹಾನಿ ಸೃಷ್ಟಿಸಿರುವ ಮಳೆ ಆಂಧ್ರಪ್ರದೇಶದಲ್ಲೂ ಕೂಡ ತನ್ನ ಆಟಾಟೋಪ ಮುಂದುವರೆಸಿದೆ. ಮಳೆ ಸಂಬಂಧಿತ ಘಟನೆಗಳಲ್ಲಿ ಒಟ್ಟು 28 ಮಂದಿ ಸಾವನ್ನಪ್ಪಿದ್ದು, 17 ಮಂದಿ ನಾಪತ್ತೆಯಾಗಿದ್ದಾರೆ.
ಕಡಪಾ ಜಿಲ್ಲೆಯ ಕಮಲಾಪುರಂನಲ್ಲಿರುವ ಪಾಪಾಗ್ನಿ ನದಿಗೆ ಕಟ್ಟಲಾಗಿರುವ ಸೇತುವೆ ಕುಸಿದು ಬಿದ್ದಿದೆ. ಮಧ್ಯರಾತ್ರಿ ಕಮಲಾಪುರಂ ಮತ್ತು ವೆಲ್ಲೂರಿಗೆ ಸಂಪರ್ಕ ಕಲ್ಪಿಸುವ ಈ ಸೇತುವೆ ಉರುಳಿದ್ದು, ಸಂಚಾರ ಅಸ್ತವ್ಯಸ್ತವಾಗಿದೆ. ಒಂದು ಕಿಲೋಮೀಟರ್ ಉದ್ದವಿರುವ ಸೇತುವೆ 7 ಮೀಟರ್ ಕುಸಿದಿದ್ದು, ಇನ್ನೂ ಉರುಳುವ ಸಾಧ್ಯತೆ ಇದೆ.
ನೆಲ್ಲೂರು ಜಿಲ್ಲೆಯಲ್ಲಿ ಮಳೆ ಅವಾಂತರ ಸೃಷ್ಟಿಯಾಗಿದೆ. ಪೆನ್ನಾ ನದಿ ಸ್ವಲ್ಪಮಟ್ಟಿಗೆ ಆತಂಕ ಸೃಷ್ಟಿಸಿದೆ. ಪೆನ್ನಾ ನದಿಗೆ ಕಟ್ಟಲಾದ ಸೇತುವೆಗೆ ಹಾನಿಯಾಗಿದ್ದು, ಮಧ್ಯರಾತ್ರಿ 12 ಗಂಟೆಯ ವೇಳೆಗೆ ಆ ಮಾರ್ಗದಲ್ಲಿ ಸಂಚಾರ ಮಾಡುವ ವಾಹನಗಳನ್ನು ತಡೆ ಹಿಡಿಯಲಾಗಿದೆ.
ರಾಷ್ಟ್ರೀಯ ಹೆದ್ದಾರಿ 16ಕ್ಕೆ ಪೆನ್ನಾ ನದಿ ನೀರು ನುಗ್ಗಿದೆ. ಚೆನ್ನೈ ಮತ್ತು ಬೆಂಗಳೂರಿನಿಂದ ವಿಜಯವಾಡಕ್ಕೆ ಬರುವ ವಾಹನಗಳನ್ನು ನಿಲ್ಲಿಸಲಾಗಿದೆ. ಸರ್ಕಾರಿ ಸಾರಿಗೆ ವ್ಯವಸ್ಥೆಯನ್ನೂ ಈ ಭಾಗದಲ್ಲಿ ಸ್ಥಗಿತಗೊಳಿಸಲಾಗಿದೆ.
ಕಡಪ ಮತ್ತು ತಿರುಪತಿ ಹೆದ್ದಾರಿಯನ್ನೂ ನಿರ್ಬಂಧಿಸಲಾಗಿದೆ. ತಿರುಪತಿ-ಅದಿಲಾಬಾದ್ ಎಕ್ಸ್ಪ್ರೆಸ್ನ ರೈಲನ್ನು ಭಾರಿ ಮಳೆಯ ಕಾರಣದಿಂದ ಸ್ಥಗಿತಗೊಳಿಸಲಾಗಿದೆ. ಪುರಿ ಎಕ್ಸ್ಪ್ರೆಸ್ ರೈಲನ್ನು ವೆಟಪಾಲಂ ಎಂಬಲ್ಲಿ ನಿಲ್ಲಿಸಿದ್ದು, ಅದರಲ್ಲಿನ ಪ್ರಯಾಣಿಕರ ಸ್ಥಿತಿ ಅಯೋಮಯವಾಗಿದೆ.
ಇದನ್ನೂ ಓದಿ: Dedication of Thief : ದಿನಕ್ಕೆ ಒಂದೇ ಬಾರಿ ಊಟ, ತೂಕ ಇಳಿಸಿಕೊಂಡು ಕಳ್ಳ ಕದ್ದಿದ್ದು ಬರೋಬ್ಬರಿ 37 ಲಕ್ಷ ರೂ.!
