ಕೇವಲ 15ನೇ ವಯಸ್ಸಿಗೆ ವಿಶ್ವ ಚೆಸ್ ಚಾಂಪಿಯನ್ಶಿಪ್ನಲ್ಲಿ ಗ್ರ್ಯಾಂಡ್‌ಮಾಸ್ಟರ್ ಆದ ಅತಿ ಕಿರಿಯ ಹೆಣ್ಣುಮಗಳು ಎಂಬ ವಿಶ್ವ ದಾಖಲೆ, 10ರಷ್ಟು ಎಳೆಯ ವಯಸ್ಸಿಗೇ ಕಿರಿಯರ ಚೆಸ್ ಚಾಂಪಿಯನ್ಶಿಪ್ನಲ್ಲಿ ಮೂರು ಬಾರಿ ಚಿನ್ನದ ಪದಕ ಗೆದ್ದ ಹೆಗ್ಗಳಿಕೆ, ನಂತರ 2600 ಕ್ಕಿಂತ ಹೆಚ್ಚು ರೇಟಿಂಗಿನಲ್ಲಿ ವಿಶ್ವ ಜೂನಿಯರ್ ಚಾಂಪಿಯನ್‌ಶಿಪ್ ಪ್ರಶಸ್ತಿ. ಈ ಬಗೆಯ ಹಿರಿಮೆ-ಗರಿಮೆಗಳು ಭಾರತೀಯ ಮಹಿಳಾ ಕ್ರೀಡಾತಾರೆಯೊಬ್ಬರಿಗೆ ದೊರೆತ ಅರ್ಹ ಗೌರವಗಳು ! ಪಟ್ಟಿ ಇಲ್ಲಿಗೇ ನಿಲ್ಲುವಂತೆ ತೋರುತ್ತಿಲ್ಲ...
ಎಲ್ಲದಕ್ಕೂ ಕಳಶ ಇಟ್ಟಂತೆ, ಈಗ ಅವರ ಸಾಧನೆಗಳ ಮುಕುಟದಲ್ಲಿ ಮತ್ತೊಂದು ದೊಡ್ಡ ವಜ್ರ ಹೊಳೆಯುತ್ತಿದೆ! ಮದುವೆಯಾದ ನಂತರ, ಅದರಲ್ಲಿಯೂ ತಾಯಿಯಾದ ಬಳಿಕ ಆಕೆ ಸುಮಾರು 2 ವರ್ಷಗಳ ಕಾಲ ಆಟದಿಂದ, ಅಭ್ಯಾಸದಿಂದ ದೂರ ಉಳಿದಿದ್ದರು. ಈಗ, ಎರಡು ವರ್ಷಗಳ ಅಂತರದ ಬಳಿಕ, ಆಕೆ ಅಚ್ಚರಿಯ ಕೊಡುಗೆಯೊಂದಿಗೆ ಮತ್ತೆ ಚದುರಂಗದ ಕಣದಲ್ಲಿ ಕಾಣಿಸಿಕೊಂಡಿದ್ದಾರೆ. ಇನ್ನೂ ಆಶ್ಚರ್ಯದ ಸಂಗತಿ ಎಂದರೆ, ಅವರು ಗೆಲುವಿನ ಬಣ್ಣ ಮೆತ್ತಿಕೊಂಡೇ ರಂಗಕ್ಕಿಳಿದಿದ್ದರು ಮತ್ತು ನೋಡನೋಡುತ್ತಲೇ ಚದುರಂಗ ಜಗತ್ತಿನ ಎತ್ತರದ ಮಜಲಿನ ಮೇಲೆ ನಿಂತಿದ್ದರು. ಅರ್ಥಾತ್ 'ವಿಶ್ವ ಚಾಂಪಿಯನ್' ಆಗಿಬಿಟ್ಟಿದ್ದರು. ಅದರಲ್ಲಿಯೂ ಜಯ ತಂದುಕೊಟ್ಟ ವಿಭಾಗ ಆಕೆಯ ಆಟದ ಶೈಲಿಗೆ ಹೊರತಾದುದಾಗಿತ್ತು ಎಂಬುದು ವಿಶೇಷ! !
ಚಿನ್ನದ ರಾಣಿ ಹಂಪಿಯ ಶ್ರೇಷ್ಠತೆಯ ಬಗ್ಗೆ ಇನ್ನೇನು ಹೇಳಬಹುದು?
ಕೊನೆರು ಹಂಪಿ ಭಾರತೀಯ ಮಹಿಳಾ ಚದುರಂಗದಾಟದ ಓಂಕಾರ. ದೇಶದ ಮಹಿಳಾ ಚೆಸ್‌ನ ಅನೇಕ ಪ್ರಥಮಗಳು ಆಕೆಯ ಹೆಸರಿನೊಂದಿಗೆ ತಳಕು ಹಾಕಿಕೊಂಡಿವೆ. ವಿಶ್ವನಾಥನ್ ಆನಂದ್ ಅವರು ದೇಶದಲ್ಲಿ ಚದುರಂಗ ಕ್ರಾಂತಿಯನ್ನೇ ಎಬ್ಬಿಸಿದರು. ಹಂಪಿ ಅವರ ಸಾಧನೆ, ದೊರೆತ ಪುರಸ್ಕಾರಗಳಿಂದಾಗಿ ಈ ಕ್ರಾಂತಿ ಮಹಿಳಾ ಚೆಸ್ ರಂಗದಲ್ಲಿಯೂ ಸರಿಸಮನಾಗಿ ಮುಂದುವರಿದಂತಾಗಿದೆ. 1997ರಲ್ಲಿ, 10, 12, ಹಾಗೂ 14 ವರ್ಷದವರ ವಿಶ್ವ ಕಿರಿಯರ ಚಾಂಪಿಯನ್ ಆಗಿ ಹಂಪಿ ಹೊರಹೊಮ್ಮಿದರು. 2002ರಲ್ಲಿ, ಚೆಸ್ ಲೋಕದ ದಂತಕತೆ ಜುಡಿತ್ ಪೋಲ್ಗರ್ ಹೆಸರಿನಲ್ಲಿ ಇದ್ದ ದಾಖಲೆ ಮುರಿದ ಕಿರಿಯ ಮಹಿಳಾ ಕ್ರೀಡಾಪಟು (15 ವರ್ಷ ಮತ್ತು 67 ದಿನಗಳು) ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಅದಾದ ಬಳಿಕ, ತನ್ನ ಉತ್ತುಂಗದ ಸ್ಥಿತಿಯಲ್ಲಿ ಅನೇಕ ಯಶಸ್ಸುಗಳು ಅವರ ಪಾಲಾದವು. ಇಷ್ಟಾದರೂ ವಿಶ್ವನಾಥನ್ ಆನಂದ್ ಅವರು ಜಯ ಗಳಿಸಿದ ಬಳಿಕ, ಅಭಿಮಾನಿಗಳಲ್ಲಿ ದೀರ್ಘಕಾಲದಿಂದ ಅಪಾರ ನಿರೀಕ್ಷೆ ಹುಟ್ಟುಹಾಕಿದ್ದ ವಿಶ್ವ ಚಾಂಪಿಯನ್‌ಶಿಪ್ ಪ್ರಶಸ್ತಿ ಆಕೆಯ ವೃತ್ತಿಜೀವನದಲ್ಲಿ ಸುಲಭವಾಗಿ ಕೈಗೆ ಎಟುಕದ ಹುಳಿ ದ್ರಾಕ್ಷಿಯಂತೆ ಕಾಡುತ್ತಿತ್ತು.
ಮದುವೆಯ ನಂತರ ಕಂಚು; ಮಕ್ಕಳಾದ ಬಳಿಕ ಚಿನ್ನ!
ಯಾವುದೇ ಆಟ ತೆಗೆದುಕೊಳ್ಳಿ. ಮದುವೆ ಆಗಿ ಮಕ್ಕಳಾದ ಬಳಿಕ ಮಹಿಳಾ ಕ್ರೀಡಾಪಟುವಿಗೆ ವೃತ್ತಿಜೀವನ ಇರುವುದಿಲ್ಲ ಎಂಬ ತಪ್ಪು ಕಲ್ಪನೆ ಇದೆ! ಇಷ್ಟಾದರೂ, ವಿವಾಹ ನೆರವೇರಿ ಅದರಲ್ಲಿಯೂ ವಿಶೇಷವಾಗಿ ಮಕ್ಕಳಾದ ಬಳಿಕ ಹಂಪಿ ತನ್ನ ವೃತ್ತಿಜೀವನದ ಮಹತ್ವದ ತಿರುವಿನಲ್ಲಿ ನಿಂತಿದ್ದರು. 2014 ರಲ್ಲಿ ದಾಸರಿ ಅನ್ವೇಶ್ ಅವರನ್ನು ಮದುವೆಯಾದ ಹಂಪಿ, ನಂತರದ ವರ್ಷದಲ್ಲಿ ನಡೆದ ವಿಶ್ವ ಮಹಿಳಾ ಚದುರಂಗ ಚಾಂಪಿಯನ್ಶಿಪ್ನಲ್ಲಿ (ಕ್ಲಾಸಿಕ್ ಫಾರ್ಮ್ಯಾಟ್) ಕಂಚಿನ ಪದಕ ಗೆದ್ದರು. ಆದರೆ ತಾಯ್ತನದ ಕಾರಣಕ್ಕಾಗಿ 2016ರ ಬಳಿಕ ಎರಡು ವರ್ಷಗಳ ಕಾಲ ಆಕೆ ಚದುರಂಗದಿಂದ ದೂರ ಉಳಿಯಬೇಕಾಯಿತು. ತಮ್ಮ ಮಗಳಿಗೆ ಒಂದು ವರ್ಷ ಆಗುವ ತನಕ ಆಕೆ ಆಟ ತ್ಯಜಿಸಿದರು. ಎರಡು ವರ್ಷಗಳ ಅಂತರದ ನಂತರ, ಕಳೆದ ವರ್ಷ ಆಕೆ ಪುನರಾಗಮನ ಮಾಡಿದ್ದು ಹಲವರ ಹುಬ್ಬೇರಲು ಕಾರಣ ಆಯಿತು. ಕಳೆದುಕೊಂಡ ಜಾಗದಲ್ಲಿಯೇ ಆಕೆ ಮತ್ತೆ ಗಳಿಸಲು ಸಾಧ್ಯವೇ? ಬಹುದೊಡ್ಡ ವಿರಾಮದ ಬಳಿಕ ಲಯ ಕಂಡುಕೊಳ್ಳಲು ಸಾಧ್ಯ ಇದೆಯೇ ಎಂಬ ಪ್ರಶ್ನೆಗಳು ಎದ್ದವು. ಆದರೆ ಆಕೆಯ ಸರಣಿ ಸಾಧನೆಗಳು ಈ ಅಪಸ್ವರಗಳಿಗೆ ತಿಲಾಂಜಲಿ ಇಟ್ಟಿವೆ. ಯಾವುದೇ ಅಂತಾರಾಷ್ಟ್ರೀಯ ಕೋಚ್ಗಳ ಬಾಹ್ಯ ತರಬೇತಿ ಪಡೆಯದೆ, ಕೇವಲ ತನ್ನ ತಂದೆಯ ನೆರವಿನಿಂದ ಆಕೆ ಮೊದಲಿನಂತೆ ಹುರುಪಿನ ಕ್ರೀಡಾಳುವಾಗಿ ಹೊರಹೊಮ್ಮಿದ್ದರು.
ಈ ವರ್ಷ ಅಂತಾರಾಷ್ಟ್ರೀಯ ಚೆಸ್ ಒಕ್ಕೂಟ ಸಂಘಟಿಸುವ FIDE ಗ್ರ್ಯಾಂಡ್ ಪ್ರಿಕ್ಸ್ ಪ್ರಶಸ್ತಿ ಗೆದ್ದು ಎಲ್ಲರೂ ಮೂಗಿನ ಮೇಲೆ ಬೆರಳು ಇರಿಸುವಂತೆ ಮಾಡಿದ್ದಾರೆ. ಇದು ಈಗ ಆಕೆಯ ವೃತ್ತಿಜೀವನದ ಬಹುದೊಡ್ಡ ಯಶಸ್ಸು. ಯಾರೂ ನಿರೀಕ್ಷಿಸದೇ ಇದ್ದ ಭರವಸೆ ಕೂಡ ಇಡದ ಸ್ಥಿತಿಯಲ್ಲಿ ವಿಶ್ವ ರಾಪಿಡ್ ಚದುರಂಗ ಚಾಂಪಿಯನ್ಶಿಪ್ನಲ್ಲಿ ಅಗ್ರಸ್ಥಾನ ಪಡೆದ ಸಾಧನೆ ಅವರದ್ದಾಗಿದೆ. ಮಾಧ್ಯಮಗಳಿಗೆ ಕೂಡ ಈ ಟೂರ್ನಿಯ ಬಗ್ಗೆ ಯಾವುದೇ ರೀತಿಯ ಆತುರ ಇದ್ದಂತಿರಲಿಲ್ಲ. ರಾಪಿಡ್ ವಿಭಾಗದಲ್ಲಿ ಒಂದೊಂದೇ ಮಜಲುಗಳನ್ನು ಏರುತ್ತಾ ಉಗುರು ಕಚ್ಚುವಷ್ಟು ಕುತೂಹಲಕಾರಿ ಆಗಿದ್ದ ಟೈಬ್ರೇಕ್ ಅನ್ನು ಜಯಿಸುವ ಮೂಲಕ ಆಕೆ ಪ್ರಶಸ್ತಿ ತಮ್ಮದಾಗಿಸಿಕೊಂಡರು.
ತನ್ನದಲ್ಲದ ವಿಭಾಗದಲ್ಲಿ ಗೆಲುವು...
ತಾನು ಕಡಿಮೆ ಆಸಕ್ತಿ ಹೊಂದಿದ್ದ ಮತ್ತು ಹಿಂದೆ ಯಾವುದೇ ದಾಖಲೆ ಮಾಡದೇ ಇದ್ದ ವಿಭಾಗದಲ್ಲಿ ವಿಶ್ವ ಚಾಂಪಿಯನ್ ಆಗುವ ಮೂಲಕ ಹಂಪಿ ಅಚ್ಚರಿಗೆ ಕಾರಣ ಆಗಿದ್ದಾರೆ. ಅವರು ಸಾಮಾನ್ಯವಾಗಿ ಸಾಕಷ್ಟು ಸಮಯಾವಕಾಶ ಇರುವ ಕ್ಲಾಸಿಕ್ ಸ್ವರೂಪಕ್ಕೆ ಆದ್ಯತೆ ನೀಡುತ್ತಾರೆ. ಎಂದಿಗೂ ವೇಗದ ಗತಿಯ ‘ರಾಪಿಡ್’ ಆಟಗಳಲ್ಲಿ ಪಳಗಿದ ವಿಶ್ವಾಸ ಆಕೆಗೆ ಇರಲಿಲ್ಲ. ಪ್ರಸ್ತುತ ಟೂರ್ನಿಯಲ್ಲಿ ಪ್ರಶಸ್ತಿ ಬಗ್ಗೆ ಆಕೆಗೆ ನಿಜವಾಗಿಯೂ ಭರವಸೆ ಇರಲಿಲ್ಲ. ಮಾಸ್ಕೋ ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಅಗ್ರ ಮೂರರ ಪಟ್ಟಿಯಲ್ಲಿ ಸ್ಥಾನ ಪಡೆಯುವ ಗುರಿಯೊಂದಿಗೆ ಹಂಪಿ ಕಣಕ್ಕೆ ಇಳಿದಿದ್ದರು. ಲೀ ತಿಂಗ್ಜಿಯೊಂದಿಗೆ ಶುಭಾರಂಭ ಮಾಡಿದ್ದು ಮತ್ತು ಈಗಾಗಲೇ ಹಲವು ಪ್ರಶಸ್ತಿಗಳನ್ನು ಗೆದ್ದಿದ್ದ ಲೀ ಅಂತಿಮ ಸುತ್ತಿನ ವೇಳೆ ಮುಗ್ಗರಿಸುತ್ತಿರುವಂತೆ ತೋರಿದ್ದು ಹಂಪಿಗೆ ತನ್ನ ಆಟದಲ್ಲಿ ವಿಶ್ವಾಸ ಮೂಡಲು ಕಾರಣ ಆಯಿತು. ಟೈಬ್ರೇಕ್‌ನ ರೋಚಕತೆಯನ್ನು ಗೆದ್ದು ಅವರು ಚಾಂಪಿಯನ್ ಆದರು. ಅದರ ಬಗ್ಗೆ ಮಾತನಾಡುತ್ತಾ, ಹಂಪಿ, "ರಾಪಿಡ್ ಮತ್ತು ಬ್ಲಿಟ್ಜ್ ನನ್ನ ಆದ್ಯತೆಯ ಆಟದ ವಿಭಾಗಗಳಲ್ಲ. ಇದಲ್ಲದೆ, ಕೊನೆಯ ದಿನದ ಪಂದ್ಯದ ಆರಂಭ ಗಮನಿಸಿದರೆ, ನಾನು ಪ್ರಶಸ್ತಿ ಗೆಲ್ಲುತ್ತೇನೆ ಎಂಬ ನಿರೀಕ್ಷೆ ಇರಲಿಲ್ಲ. ಟೈಬ್ರೇಕ್ ಆಡುತ್ತಿದ್ದೇನೆ ಎಂದು ನಾನು ಎಣಿಸಿರಲಿಲ್ಲ. ಆದರೆ ಗುಣಮಟ್ಟದ ಆಟದೊಂದಿಗೆ ವಿಶ್ವ ಪ್ರಶಸ್ತಿ ಗೆದ್ದದ್ದು ಬಹಳ ತೃಪ್ತಿಕರ ಅನ್ನಿಸುತ್ತಿದೆ. ನನ್ನ ಶೈಲಿಯ ಆಟಕ್ಕೆ ಹೊಂದಿಕೆ ಆಗದ ರಾಪಿಡ್ ವಿಭಾಗದಲ್ಲಿ ವಿಶ್ವ ಚಾಂಪಿಯನ್ ಆಗಿರುವುದು ನನ್ನ ವಿಶ್ವಾಸವನ್ನು ಇಡಿಯಾಗಿ ಮತ್ತೊಂದು ಹಂತಕ್ಕೆ ಕೊಂಡೊಯ್ಯುತ್ತಿದೆ" ಎಂದಿದ್ದಾರೆ.
ಹೆಸರಿನ ಹಿಂದಿನ ಕಥೆ...
ಹಂಪಿಯ ತಂದೆ ಕೊನೆರು ಅಶೋಕ್ ಸ್ವತಃ ಕ್ರೀಡಾಪಟು. ಶಾಲಾಮಟ್ಟದಲ್ಲಿ ಅನೇಕ ಆಟಗಳನ್ನು ಆಡಿದವರು. ನಂತರ ಚದುರಂಗವನ್ನು ವೃತ್ತಿಯಾಗಿ ಮುಂದುವರಿಸಿದವರು. ಅವರು ರಾಷ್ಟ್ರಮಟ್ಟದ ಚದುರಂಗ ಕಲಿ. ಕ್ರೀಡೆ ಮತ್ತು ಆಟಗಳ ಬಗ್ಗೆ ಒಲವು ಹೊಂದಿದ್ದ ಅವರು, ತಮ್ಮ ಮಗಳು ಕ್ರೀಡಾ ಕ್ಷೇತ್ರದಲ್ಲಿ ವಿಶಿಷ್ಟ ಹೆಸರುಗಳಿಸಬೇಕು ಎಂದು ಕನಸು ಕಂಡವರು. ಹಾಗೆಂದೇ ‘ಜಯ’ದ ಸಂಕೇತವಾದ ಹಂಪಿ ಎಂಬ ಹೆಸರನ್ನು ಮಗಳಿಗೆ ಇಟ್ಟಿದ್ದರು. ತನ್ನಂತೆಯೇ ಸಾಧನೆ ಮಾಡಬೇಕು ಎಂಬ ಹಂಬಲದೊಂದಿಗೆ ಮಗಳನ್ನು ಚೆಸ್ ಕ್ಷೇತ್ರಕ್ಕೆ ಕರೆತಂದರು. ತಂದೆಯ ವಿಶ್ವಾಸವನ್ನು ಕಾಪಿಟ್ಟುಕೊಂಡ ಹಂಪಿ, ಆಟದಲ್ಲಿ ನಿಜವಾದ ‘ವಿಶ್ವ ಚಾಂಪಿಯನ್’ ಆದರು. ತಂದೆ ಇಟ್ಟಿದ್ದ ಹೆಸರಿಗೆ ತಕ್ಕಂತೆ ಆಕೆ ಅನೇಕ ದೊಡ್ಡ ಸಾಧನೆಗಳನ್ನು ಮಾಡಿದರು. ಆದರೆ, ಆಕೆ ಅಕ್ಷರಶಃ ‘ವಿಜಯಿ’ ಎಂಬ ಹೆಸರುಗಳಿಸಿದ್ದು ಮೊನ್ನೆಯಷ್ಟೇ ನಡೆದ ಚಾಂಪಿಯನ್ಶಿಪ್ನಲ್ಲಿ.
ಇದು ಹಂಪಿಗೆ ಸಂದ ಐದನೇ ವಿಶ್ವಕಪ್ ಪದಕ. ಅವರು ಈ ಹಿಂದೆ ವಿಶ್ವ ಕಿರಿಯರ ವಿಭಾಗದಲ್ಲಿ ಮೂರು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ (ಕ್ರಮವಾಗಿ-1997, 1998, 2000ರಲ್ಲಿ) ಮತ್ತು 2015 ರಲ್ಲಿ ವರ್ಲ್ಡ್ ಟೀಂ ಕಂಚು ಗೆದ್ದರು. ಹಂಪಿಯ ಇತ್ತೀಚಿನ ಸಾಧನೆ ವಿಶ್ವ ರಾಪಿಡ್ ವಿಭಾಗದಲ್ಲಿ ಚಿನ್ನ ಗಳಿಸಿದ್ದು. ಇದು ವಿಶ್ವ ಚದುರಂಗ ಚಾಂಪಿಯನ್ಶಿಪ್ನಲ್ಲಿ ಆಕೆಯನ್ನು ದೊಡ್ಡ ಎತ್ತರಕ್ಕೆ ಕೊಂಡೊಯ್ದು 'ಚದುರಂಗ ರಾಜಕುಮಾರಿ'ಯನ್ನಾಗಿ ಮಾಡಿದೆ.
