ಕೋವಿಡ್-19 ಪ್ರಪಂಚದಾದ್ಯಂತ ಅಪಾಯಕಾರಿ ಮಟ್ಟದಲ್ಲಿ ಹರಡುತ್ತಿದೆ. ನಮ್ಮ ದೇಶ ಈಗ ಅನ್‌ಲಾಕ್ ಆಗಿದ್ದರೂ, ಜನರು ವೈರಸ್ ಕುರಿತು ಭಯವನ್ನು ಹೊಂದಿದ್ದಾರೆ. ಇನ್ನು ಕೆಲವರು ಸೋಂಕಿಗೆ ಒಳಗಾದ್ರೆ ಅದನ್ನು ಹೇಗೆ ಮತ್ತು ಎಲ್ಲಿ ವ್ಯಕ್ತಪಡಿಸಬೇಕು ಎಂಬುದನ್ನು ತಿಳಿದಿಲ್ಲ. ಈ ಸಂಬಂಧ ಹೈದರಾಬಾದ್‌ನ ವಿಐಎನ್ಎನ್ ಆಸ್ಪತ್ರೆಯ ವೈದ್ಯರಾದ ಡಾ. ರಾಜೇಶ್ ವುಕ್ಕಲಾ ಅವರನ್ನು ಕೇಳಿದಾಗ ಅವರು, ಈ ವೈರಸ್ ನಮ್ಮ ದೇಹದಲ್ಲಿ ಎಲ್ಲಿಯಾದರೂ ಹರಡಬಹುದು, ಹಾಗಾಗಿಯೇ ನಾವು ದೇಹದಾದ್ಯಂತ ವಿವಿಧ ರೋಗಲಕ್ಷಣಗಳನ್ನು ಹೊಂದುತ್ತಿದ್ದೇವೆ ಎಂದರು.
ಕೊರೊನಾ ಸೋಂಕಿತರ ಲಕ್ಷಣಗಳು:
ಡಾ. ರಾಜೇಶ್ ಸೂಚಿಸಿದಂತೆ ಜ್ವರ ಮತ್ತು ಕೆಮ್ಮಿನ ಹೊರತಾಗಿ ಕೆಲವು ಲಕ್ಷಣಗಳನ್ನು ನಾವು ಇಲ್ಲಿ ನೋಡಬಹುದಾಗಿದೆ.
- ಯಾವುದೇ ವಾಸನೆ ತಿಳಿಯದಿರುವುದು
- ಆಹಾರದ ರುಚಿ ಗೊತ್ತಾಗದೆ ಇರುವುದು
- ತುಂಬಾ ಆಯಾಸ
- ಸ್ನಾಯುಗಳ ನೋವು
- ದಿನನಿತ್ಯದ ಚಟುವಟಿಕೆಗಳನ್ನು ನಡೆಸಲು ಅಸಮರ್ಥತೆ
- ಉಸಿರಾಟದ ತೊಂದರೆ
- ತಲೆನೋವು
- ತಲೆತಿರುಗುವಿಕೆ
- ಯಾವುದೇ ಜ್ವರವಿಲ್ಲದೆ ಅತಿಸಾರವಾಗುವುದು
- ಹೊಟ್ಟೆ ನೋವು
- ಕಾಲು ನೋವು
ಮೆದುಳಿನ ದಾಳಿ, ಹೃದಯಾಘಾತ, ಮೆನಿಂಜೈಟಿಸ್, ಬೆನ್ನುಹುರಿಯ ನೋವು ಮುಂತಾದ ಕೆಲವು ಲಕ್ಷಣಗಳಿದ್ದು, ಇವು ಅಪರೂಪವಾಗಿವೆ.
ನೀವು ಈ ರೋಗಲಕ್ಷಣಗಳನ್ನು ಹೊಂದಿದ್ದರೆ ಏನು ಮಾಡಬೇಕು?
“ಕೊರೊನಾ ವೈರಸ್ ಬಹಳ ವೇಗವಾಗಿ ಹರಡುತ್ತಿದ್ದರೂ, ಇತರ ವೈರಸ್‌ಗಳಿಗಿಂತ ಭಿನ್ನವಾಗಿ ಶೇ. 80ರಷ್ಟು ಜನರು ಲಕ್ಷಣರಹಿತರಾಗಿದ್ದಾರೆ ಅಥವಾ ತುಂಬಾ ಸೌಮ್ಯ ರೋಗಲಕ್ಷಣಗಳನ್ನು ಹೊಂದಿದ್ದಾರೆ. ಶೇ. 20ರಷ್ಟು ಜನರು ವೈರಸ್ನ ಗಂಭೀರ ಪರಿಣಾಮವನ್ನು ಹೊಂದಿದ್ದಾರೆ, ಅದರಲ್ಲಿ ಕೇವಲ ಶೇ. 5ರಷ್ಟು ಜನರು ಮಾತ್ರ ತೀವ್ರವಾಗಿ ಅಸ್ವಸ್ಥರಾಗಿದ್ದಾರೆ, ಅಂತವರು ಆಸ್ಪತ್ರೆಗೆ ದಾಖಲಾಗುವ ಅಗತ್ಯವಿರುತ್ತದೆ” ಎನ್ನುತ್ತಾರೆ ಡಾ. ರಾಜೇಶ್ ವುಕ್ಕಲಾ.
ಕೊರೊನಾ ರೋಗಲಕ್ಷಣವನ್ನು ಹೊಂದಿದ್ರೆ, ಮೊದಲು ನಿಮ್ಮನ್ನು ನೀವು ಐಸೋಲೇಟ್ ಮಾಡಿಕೊಳ್ಳಿ. ಯಾರ ಸಂಪರ್ಕಕ್ಕೂ ಬರಬೇಡಿ.
ಮೇಲೆ ತಿಳಿಸಿದ ಯಾವುದೇ ಲಕ್ಷಣಗಳು ನಿರಂತರವಾಗಿ 3 ದಿನಗಳವರೆಗೆ ಇದ್ದರೆ, ವೈದ್ಯರನ್ನು ಸಂಪರ್ಕಿಸಿ.
ಪರೀಕ್ಷೆಗಳನ್ನು ವೈದ್ಯರ ಪ್ರಿಸ್ಕ್ರಿಪ್ಷನ್‌ನೊಂದಿಗೆ ಮಾತ್ರ ನಡೆಸಲಾಗುತ್ತದೆ. ಇದು ಸ್ವ್ಯಾಬ್ ಪರೀಕ್ಷೆ ಅಥವಾ ರಕ್ತ ಪರೀಕ್ಷೆ ಯಾವುದೇ ಆಗಿರಬಹುದು. ರೋಗಲಕ್ಷಣಗಳನ್ನು ಅನುಭವಿಸುವ ಐದನೇ ದಿನದಂದು ನಡೆಸಿದ ಪರೀಕ್ಷೆಯ ಫಲಿತಾಂಶ ತುಂಬಾ ಮುಖ್ಯವಾಗಿರುತ್ತದೆ.
ಹೊಟ್ಟೆ, ಹೃದಯ, ಶ್ವಾಸಕೋಶದಂತಹ ರೋಗಲಕ್ಷಣಗಳನ್ನು ಹೊಂದಿದ್ದರೇ ಪರೀಕ್ಷೆಗಳನ್ನು ನಡೆಸಬೇಕಾಗುತ್ತದೆ.
ಸೌಮ್ಯ ಅಥವಾ ಯಾವುದೇ ರೋಗಲಕ್ಷಣಗಳನ್ನು ಹೊಂದಿರದ ಸೋಂಕಿತರು ಆಸ್ಪತ್ರೆಗೆ ದಾಖಲಾಗುವ ಅಗತ್ಯವಿರುವುದಿಲ್ಲ. ಅವರು ಮನೆಯಲ್ಲಿಯೇ ತಮ್ಮನ್ನು ಪ್ರತ್ಯೇಕಿಸಿಕೊಳ್ಳಬಹುದು ಮತ್ತು ಅವಶ್ಯಕತೆ ಅಥವಾ ಆರೋಗ್ಯ ತುರ್ತು ಸಂದರ್ಭಗಳಲ್ಲಿ ವೈದ್ಯರನ್ನು ಸಂಪರ್ಕಿಸಬಹುದು.
ಸೋಂಕಿತರು ಪ್ರತಿದಿನ ಸಾಕಷ್ಟು ಪ್ರಮಾಣದ ನೀರನ್ನು ಸೇವಿಸಬೇಕು. ವಿಟಮಿನ್ಯುಕ್ತ ಆಹಾರವನ್ನು ಸೇವಿಸಬೇಕು. ಇದರಿಂದ ಅವರು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಬಹುದಾಗಿದೆ. ಅವುಗಳೆಂದರೆ ವಿಟಮಿನ್ ಸಿ ಮತ್ತು ಡಿ. ಈ ಎರಡೂ ಜೀವಸತ್ವಗಳು ವಿವಿಧ ಆಹಾರ ಪದಾರ್ಥಗಳಲ್ಲಿ ಇರುತ್ತವೆ,ಇವುಗಳನ್ನು ತೆಗೆದುಕೊಳ್ಳುವುದು ಉತ್ತಮ. ನೀವು 10 ದಿನಗಳವರೆಗೆ ಪ್ರತ್ಯೇಕವಾಗಿರುವುದು ಒಳ್ಳೆಯದು.
ಈ ರೋಗದ ಬಗ್ಗೆ ಜನರು ಭಯಪಡುವ ಅವಶ್ಯಕತೆ ಇಲ್ಲ. ಏಕೆಂದರೆ ಹೆಚ್ಚಿನ ಜನರು ಆಸ್ಪತ್ರೆಗೆ ಹೋಗದೇ ಚೇತರಿಸಿಕೊಳ್ಳುತ್ತಿದ್ದಾರೆ. ಅಂತರ ಕಾಯ್ದುಕೊಳ್ಳುವುದರ ಮೂಲಕ ನಾವು ಈ ವೈರಸ್ನಿಂದ ದೂರವಿರಬಹುದಾಗಿದೆ. ಭಾರತದ ಜವಾಬ್ದಾರಿಯುತ ಪ್ರಜೆಯಾಗಿ ನೀವು ಮಾಡಬಹುದಾದ ಅತ್ಯುತ್ತಮ ಕಾರ್ಯ ಇದಾಗಿದೆ.
