ಬರೈಲಿ (ಉತ್ತರ ಪ್ರದೇಶ): ಇಲ್ಲಿನ ಟ್ರಾಫಿಕ್ ಪೊಲೀಸ್ ಒಬ್ಬರು ಮಾಡಿದ ಯಡವಟ್ಟಿನಿಂದ ಕಾರು ಚಲಾವಣೆ ಮಾಡಿದ ಚಾಲಕನಿಗೆ ಸುಖಾ ಸುಮ್ಮನೆ 500 ರೂ. ದಂಡ ವಿಧಿಸಿ ಇ-ಚಲನ್ ನೀಡಿದ್ದಾರೆ.
ಬಿಸ್ನೆಸ್ ಮ್ಯಾನ್ ಅನಿಶ್ ನೂರುಲ್ಲಾ, ಇ- ಚಲನ್ ಪಡೆದ ವ್ಯಕ್ತಿ. ಇವರಿಗೆ ತಮಗೆ ತಿಳಿಯದಂತೆ 500 ರೂ. ದಂಡ ಹಾಕಲಾದ ಚಲನ್ ಬಂದಿದೆ. ಹೆಲ್ಮೆಟ್ ಇಲ್ಲದ ಪ್ರಯಾಣಕ್ಕೆ ವಿಧಿಸಿದ ಚಲನ್ ನೋಡಿ ಅನಿಶ್ ಶಾಕ್ ಆಗಿದ್ದಾರೆ. ಅಷ್ಟಕ್ಕೂ ಅನಿಸ್ ನೂರುಲ್ಲಾ ಬಳಿ ಎಲ್ಲಾ ದಾಖಲೆಗಳೂ ಇತ್ತು. ಆದರೆ ಟ್ರಾಫಿಕ್ ಪೊಲೀಸರ ಪ್ರಮಾದದಿಂದಾಗಿ ಚಲನ್ ತಪ್ಪಾಗಿ ಇವರಿಗೆ ಬಂದಿದೆ.
ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಇಲ್ಲಿನ ಎಸ್ಪಿ ಸುಭಾಷ್ ಚಂದ್ರ ಗ್ಯಾಂಗ್ವರ್, ಟ್ರಾಫಿಕ್ ಪೊಲೀಸರ ತಪ್ಪಿನಿಂದ ಈ ಯಡವಟ್ಟು ನಡೆದಿದೆ. ಈ ಥರದ ತಪ್ಪುಗಳು ನಡೆದಿರುವ ಬಗ್ಗೆ ಈ ಹಿಂದೆಯೂ ವರದಿಯಾಗಿವೆ. ಕಂಪ್ಯೂಟರೀಕೃತ ಚಲನ್ ಮುದ್ರಿಸುವಾಗ, ಟಚ್ ಸ್ಕ್ರೀನ್ನಲ್ಲಿರುವ ಆಯ್ಕೆಯ ಮೇಲೆ ಟಚ್ ಮಾಡುವ ವೇಳೆ ಈ ತಪ್ಪು ನಡೆದಿದೆ. ಅನಿಶ್ ನೂರುಲ್ಲಾ ಬಳಿಯಿಂದ ಯಾವುದೇ ದಂಡ ಪಡೆದಿಲ್ಲ ಎಂದು ಎಸ್ಪಿ ಸ್ಪಷ್ಟಪಡಿಸಿದ್ದಾರೆ.
