ಕುಟುಂಬಸಮೇತ ಟಿವಿ ನೋಡ್ತಿದ್ದೀರಾ? ಈ ಫೀಚರ್‌ನಿಂದ ವಯಸ್ಕರ ದೃಶ್ಯಗಳ​ ಭಯವಿಲ್ಲ

ನೀವು ಮನೆಯಲ್ಲಿ ಕುಟುಂಬ ಸದಸ್ಯರ ಜೊತೆ ಟಿವಿ ನೋಡ್ತಿದ್ದೀರಾ?. ಇಂಥ ಸಂದರ್ಭದಲ್ಲಿ ಅಡಲ್ಟ್​ ಸೀನ್​ಗಳು(ವಯಸ್ಕರ ದೃಶ್ಯಗಳು) ಬಂದಾಗ ಮುಜುಗರವಾಗುತ್ತದೆಯೇ? ಹಾಗಾದ್ರೆ, ನಿಮಗೆ ಇಲ್ಲೊಂದು ಉಪಾಯವಿದೆ.

JioTV+ New Feature to Hide Adult Scenes: ಕೆಲವರು ಒಂಟಿಯಾಗಿ ಸಿನಿಮಾ ಅಥವಾ ಟಿವಿ ಕಾರ್ಯಕ್ರಮವನ್ನು ವೀಕ್ಷಿಸಲು ಇಷ್ಟಪಟ್ಟರೆ, ಇನ್ನು ಕೆಲವರು ಕುಟುಂಬದೊಂದಿಗೆ ವೀಕ್ಷಿಸುತ್ತಾರೆ. ಆದರೆ ಇಂದಿನ ಕಾಲಘಟ್ಟದಲ್ಲಿ ಕುಟುಂಬಸಮೇತ ಟಿವಿ ನೋಡುವುದಕ್ಕೂ ಸ್ವಲ್ಪ ಧೈರ್ಯ ಬೇಕು. ಯಾಕೆಂದರೆ ಥಟ್ಟನೆ ಅಡಲ್ಟ್ ಸೀನ್​ಗಳು ಬಂದರೆ ತುಂಬಾ ಮುಜುಗರವಾಗುತ್ತದೆ. ಇಂತಹ ಸಮಯದಲ್ಲಿ ಚಿಕ್ಕ ಮಕ್ಕಳಿದ್ದರೆ ಪರಿಸ್ಥಿತಿ ಏನಾಗಬಹುದು ಎಂದು ಹೇಳಬೇಕಿಲ್ಲ. ಇಂಥ ಸನ್ನಿವೇಶಗಳನ್ನು ತಪ್ಪಿಸಲು JioTV+ ಹೊಸ ವೈಶಿಷ್ಟ್ಯವನ್ನು ತಂದಿದೆ.

Jio TV Plus ತಂದಿರುವ ಈ ವೈಶಿಷ್ಟ್ಯದ ಸಹಾಯದಿಂದ ನೀವು ಈಗ ನಿಮ್ಮ ಕುಟುಂಬದೊಂದಿಗೆ ಆರಾಮವಾಗಿ ಟಿವಿ ವೀಕ್ಷಿಸಬಹುದು. ಎಐ ಸಹಾಯದಿಂದ ಟಿವಿ ನೋಡುವಾಗ ಈ ವೈಶಿಷ್ಟ್ಯವು ವಯಸ್ಕರ ದೃಶ್ಯಗಳನ್ನು ಸ್ವಯಂಚಾಲಿತವಾಗಿ ಬ್ಲರ್​ ಮಾಡುತ್ತದೆ. ಅಲ್ಲದೆ, 'ಎಐ ಸೆನ್ಸಾರ್​' ಹೆಸರಿನಲ್ಲಿ ತಂದಿರುವ ಇದನ್ನು ಅಗತ್ಯವಿದ್ದಾಗ ಆಡಿಯೋ ಸಹ ಮ್ಯೂಟ್ ಮಾಡಬಹುದು. ಗ್ರಾಹಕ ತಂತ್ರಜ್ಞಾನದ ಅನುಭವಿ ರಾಜೀವ್ ಮಖಾನಿ ಇನ್​ಸ್ಟಾಗ್ರಾಮ್​ನಲ್ಲಿ ಹಂಚಿಕೊಂಡ ವಿಡಿಯೋದಲ್ಲಿ ಮಾಹಿತಿ ನೀಡಿದ್ದಾರೆ.

ರಾಜೀವ್ ಮಖಾನಿ ಹೇಳುವಂತೆ, R-ರೇಟ್ ಅಥವಾ 18+ ವಿಷಯ ಪತ್ತೆಯಾದಾಗ ವೈಶಿಷ್ಟ್ಯವು ಸಂಪೂರ್ಣ ಸ್ಕ್ರೀನ್​ ಅನ್ನು ಬ್ಲರ್​ ಮಾಡುತ್ತದೆ. ಅಲ್ಲದೇ ಈ OTT ಅಪ್ಲಿಕೇಶನ್ ವಯಸ್ಕರ ದೃಶ್ಯಗಳಿರುವಾಗ ಅಗತ್ಯವಿದ್ದರೆ ಆಡಿಯೋವನ್ನೂ ಸಹ ಮ್ಯೂಟ್​ ಮಾಡುತ್ತದೆ.

Anti JioTV Plus: JioTV+ ಅಪ್ಲಿಕೇಶನ್ JioTV ಅಪ್ಲಿಕೇಶನ್‌ಗಿಂತ ಭಿನ್ನ. JioTV ಮೊಬೈಲ್ ಆಧರಿತ ವೇದಿಕೆಯಾಗಿದೆ. ಇದು Android, iOSನಲ್ಲಿ ಲಭ್ಯ. JioTV+ ಎನ್ನುವುದು ಜಿಯೋ ಸೆಟ್-ಟಾಪ್-ಬಾಕ್ಸ್‌ಗಳಲ್ಲಿ ಮೊದಲೇ ಸ್ಥಾಪಿಸಲಾದ ಕಂಟೆಂಟ್ ಅಗ್ರಿಗೇಟರ್ ಪ್ಲಾಟ್‌ಫಾರ್ಮ್ ಆಗಿದೆ. ಆಂಡ್ರಾಯ್ಡ್ ಟಿವಿ, ಆ್ಯಪಲ್ ಟಿವಿ, ಅಮೆಜಾನ್ ಫೈರ್ ಒಎಸ್ ಸೇರಿದಂತೆ ಇತರ ಸ್ಮಾರ್ಟ್ ಟಿವಿ ಪ್ಲಾಟ್‌ಫಾರ್ಮ್‌ಗಳಿಗೂ ಅಪ್ಲಿಕೇಶನ್ ಲಭ್ಯವಿದೆ.

ಆದರೆ ಇದು JioFiber, JioAirFiber ಗ್ರಾಹಕರಿಗೆ ಮಾತ್ರ ಕಾರ್ಯನಿರ್ವಹಿಸುತ್ತದೆ. JioTV+ ಅಪ್ಲಿಕೇಶನ್ Disney+ Hotstar, Amazon Prime Video, SonyLIV, Zee5 ಸೇರಿದಂತೆ 14 OTT ಪ್ಲಾಟ್‌ಫಾರ್ಮ್‌ಗಳಿಂದ ವಿಷಯವನ್ನು ನೀಡುತ್ತದೆ. 800ಕ್ಕೂ ಹೆಚ್ಚು ಲೈವ್ ಟಿವಿ ಚಾನೆಲ್‌ಗಳನ್ನೂ ಸಹ ಹೊಂದಿದೆ. ಲಭ್ಯವಿರುವ OTT ಚಂದಾದಾರಿಕೆಗಳು ನಿಮ್ಮ JioFiber ಯೋಜನೆಯನ್ನು ಅವಲಂಬಿಸಿರುತ್ತದೆ.

ಸ್ಮಾರ್ಟ್ ಟಿವಿಯಲ್ಲಿ JioTV+ ಅನ್ನು ಪ್ರವೇಶಿಸುವುದು ಹೇಗೆ?:

• ಸ್ಮಾರ್ಟ್ ಟಿವಿಯಲ್ಲಿ JioTV+ ಪ್ರವೇಶಿಸಲು ನೀವು ಮೊದಲು ಸ್ಮಾರ್ಟ್ ಟಿವಿ ಆಪ್ ಸ್ಟೋರ್‌ನಿಂದ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಬೇಕಾಗುತ್ತದೆ.
• ಅದರ ನಂತರ ನಿಮ್ಮ JioFiber ಅಥವಾ JioAirFiber ಖಾತೆಯೊಂದಿಗೆ ನೋಂದಾಯಿಸಲಾದ ಮೊಬೈಲ್ ಸಂಖ್ಯೆಯೊಂದಿಗೆ ಲಾಗಿನ್ ಮಾಡಿ.
• ನಿಮ್ಮ ಫೋನ್‌ಗೆ ಕಳುಹಿಸಲಾದ ಒನ್​ ಟೈಂ ಪಾಸ್‌ವರ್ಡ್ (OTP) ನಮೂದಿಸಿದ ತಕ್ಷಣ ಅಪ್ಲಿಕೇಶನ್ ಕಾರ್ಯನಿರ್ವಹಿಸಲು ಪ್ರಾರಂಭಿಸುತ್ತದೆ.

ಇದನ್ನೂ ಓದಿ: ಅಪ್ರಾಪ್ತರ ವಯಸ್ಸಿನ ನಿಖರತೆ ಕಂಡುಹಿಡಿಯಲು AI ಚಾಲಿತ ಹೊಸ ಟೂಲ್​ ತರ್ತಿದೆ ಮೆಟಾ