ವೇತನ ಪಾವತಿಸಲು ನೌಕರರ ರಾಜ್ಯ ವಿಮಾ ನಿಗಮದ ಹಣ ಬಳಸಿಕೊಳ್ಳುವಂತೆ ಸೂಚನೆ

ಲಾಕ್ ಡೌನ್​​ನಿಂದಾಗಿ ಉದ್ಯೋಗ ಸಂಸ್ಥೆಗಳು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿವೆ. ಹೀಗಾಗಿ, ನೌಕರರಿಗೆ ವೇತನ ಪಾವತಿಸಲು ಸಮಸ್ಯೆಯುಂಟಾಗಿದೆ. ಈ ಸಮಸ್ಯೆಯನ್ನು ಬಗೆಹರಿಸಲು ನೌಕರರ ರಾಜ್ಯ ವಿಮಾ ನಿಗಮದ ಹಣವನ್ನು ಬಳಸಿಕೊಂಡು ವೇತನ ಪಾವತಿಸುವಂತೆ ಸಂಸ್ಥೆಗಳಿಗೆ ಕೇಂದ್ರ ಕಾರ್ಮಿಕ ಇಲಾಖೆ ಕಾರ್ಯದರ್ಶಿ ಸೂಚಿಸಿದ್ದಾರೆ.

ನವದೆಹಲಿ: ಲಾಕ್​ ಡೌನ್​ ಸಮಯದಲ್ಲಿ ಕಾರ್ಮಿಕರು ಮತ್ತು ಉದ್ಯೋಗಿಗಳಿಗೆ ವೇತನ ಪಾವತಿಸಲು ನೌಕರರ ರಾಜ್ಯ ವಿಮಾ ನಿಗಮ (ಇಎಸ್​ಐಸಿ)ದ ಹಣವನ್ನು ಬಳಸಿಕೊಳ್ಳುವಂತೆ ಕಾರ್ಮಿಕ ಇಲಾಖೆ ಕಾರ್ಯದರ್ಶಿ ಹೀರಾಲಾಲ್ ಸಮರಿಯಾ ಸೂಚಿಸಿದ್ದಾರೆ.

ಕೈಗಾರಿಕಾ ಸಂಸ್ಥೆ ಎಫ್‌ಐಸಿಸಿಐ ಆಯೋಜಿಸಿದ ವೆಬ್‌ನಾರ್‌ನಲ್ಲಿ ಮಾತನಾಡಿದ ಅವರು, ನಿವೃತ್ತಿ ನಿಧಿಯ ಅಧೀನದಲ್ಲಿ ಬರುವ ಇಪಿಎಫ್​ ಮತ್ತು ಇಎಸ್​ಐಸಿ ಹಣವನ್ನು ಬಳಸಿಕೊಳ್ಳಲು ತುಂಬಾ ದಿನಗಳಿಂದ ಲಾಬಿ ನಡೆಯುತ್ತಿದೆ. ಆದ್ದರಿಂದ, ವೇತನ ಪಾವತಿಸಲು ಇಎಸ್​ಐಸಿ ಹಣವನ್ನು ಬಳಸಿಕೊಳ್ಳಿ ಎಂದಿದ್ದಾರೆ.

ಇಎಸ್​ಐಸಿ ವಿಮೆ ಮಾಡಿದ ನೌಕರರು ಅಥವಾ ಉದ್ಯೋಗದಾತರು ಸಾಮಾಜಿಕ ಭದ್ರತೆಗೆಂದು ಕೊಡುಗೆ ನೀಡುತ್ತಿರುವ ಹಣವಾಗಿದೆ. ಉದ್ಯೋಗಿ ನಿರುದ್ಯೋಗಿಯಾದರೆ ಅವರ ವಿಮೆಯಿಂದ 25 ಶೇಕಡವನ್ನು ವೇತನ ರೂಪದಲ್ಲಿ ಪಾವತಿಸಬಹುದು. ಆದರೆ, ಭವಿಷ್ಯ ನಿಧಿಯಾದ ಇಎಸ್​ಐಯ ಹಣವನ್ನು ಬಳಸಿಕೊಳ್ಳುವುದು ಸೂಕ್ತವಲ್ಲ ಎಂದಿದ್ದಾರೆ.

ಈ ತಿಂಗಳ ಆರಂಭದಲ್ಲಿ ಈ ಕುರಿತಂತೆ ಪ್ರತಿಕ್ರಿಯಿಸಿದ್ದ ಕಾರ್ಮಿಕ ಸಚಿವಾಲಯದ ವಕ್ತಾರರು, ಪ್ರಧಾನಮಂತ್ರಿ ಗರೀಬ್ ಕಲ್ಯಾಣ್​ ಅಥವಾ ಇತರ ಯೋಜನೆಯಡಿ ಕಾರ್ಮಿಕರಿಗೆ ಪರಿಹಾರ ನೀಡಲು ನೌಕರರ ಭವಿಷ್ಯ ನಿಧಿಗಳನ್ನು ಬಳಸಿಕೊಳ್ಳದಂತೆ ತಿಳಿಸಿದ್ದರು.