ಕೇಂದ್ರ ಸರ್ಕಾರದ ಉನ್ನತ ಅಧಿಕಾರಿಗಳ ವಲಯದಲ್ಲಿ ನಿರಂತರವಾಗಿ ಏರುತ್ತಿರುವ ಕೋವಿಡ್‌-19 ಪ್ರಕರಣಗಳು ಹಿರಿಯ ಅಧಿಕಾರಿಗಳಲ್ಲಿ ಚಿಂತೆ ಮೂಡಿಸಿದ್ದು, ಈ ಹಿನ್ನೆಲೆಯಲ್ಲಿ ಮಂಗಳವಾರ ಹೊಸ ಸೂಚನೆಗಳನ್ನು ಹೊರಡಿಸಲು ಸರ್ಕಾರವನ್ನು ಪ್ರೇರೇಪಿಸಿವೆ.
ಇತ್ತೀಚಿನ ಸೂಚನೆಗಳ ಪ್ರಕಾರ, ಯಾವುದೇ ಕೋಣೆಯಲ್ಲಿ ಯಾವುದೇ ಸಮಯದಲ್ಲಿ ಇಬ್ಬರಿಗಿಂತ ಹೆಚ್ಚು ಅಧಿಕಾರಿಗಳು ಉಪಸ್ಥಿತರಿರುವುದಕ್ಕೆ ನಿರ್ಬಂಧ ವಿಧಿಸಲಾಗಿದೆ ಮತ್ತು ಉಪ ಕಾರ್ಯದರ್ಶಿಗಿಂತ ಕೆಳಗಿನ ಹಂತದ ಯಾವುದೇ ಕಚೇರಿಯಲ್ಲಿ ಯಾವುದೇ ಸಮಯದಲ್ಲಿ ಇರಬಹುದಾದ ಅಧಿಕಾರಿಗಳು ಮತ್ತು ಸಿಬ್ಬಂದಿ ಸಂಖ್ಯೆಯನ್ನು 30ಕ್ಕೆ ನಿರ್ಬಂಧಿಸಲಾಗಿದೆ ಎಂಬ ಮಾಹಿತಿ ಈಟಿವಿ ಭಾರತಕ್ಕೆ ಸಿಕ್ಕಿದೆ.
ಹೂಡಿಕೆ ಹಿಂತೆಗೆತ ಕಾರ್ಯದರ್ಶಿ ತುಹಿನ್‌ ಕಾಂತ್‌ ಪಾಂಡೆ ಅವರಿಗೆ ಕೋವಿಡ್‌-19 ವೈರಸ್ ಇರುವುದು ದೃಢಪಟ್ಟ ನಂತರ ಮಂಗಳವಾರ ಈ ಹೊಸ ಆದೇಶವನ್ನು ಹೊರಡಿಸಲಾಗಿದೆ. ಈ ಘಟನೆಯ ನಂತರ, ಕೇಂದ್ರ ಸರ್ಕಾರದ ಕಾರ್ಯದರ್ಶಿ ಹಂತದ ಅಧಿಕಾರಿಗಳ ಪೈಕಿ ಸೋಂಕು ದೃಢಪಟ್ಟಿರುವ ಎರಡನೇ ಅಧಿಕಾರಿ ಅವರಾಗಿದ್ದಾರೆ. ರಕ್ಷಣಾ ಕಾರ್ಯದರ್ಶಿ ಡಾ. ಅಜಯ ಕುಮಾರ ಮತ್ತು ಕೇಂದ್ರ ಸರ್ಕಾರದ ಮುಖ್ಯ ವಕ್ತಾರ ಕೆ.ಎಸ್. ಧಾಟ್‌ವಾಲಿಯಾ ಅವರಿಗೂ ಕೊರೊನಾ ಸೋಂಕು ತಗಲಿರುವ ವಿಷಯ ಕಳೆದ ವಾರವಷ್ಟೇ ದೃಢಪಟ್ಟಿತ್ತು.
"ಸರ್ಕಾರಿ ಕಟ್ಟಡದಲ್ಲಿರುವ ಅಧಿಕಾರಿಗಳು ಪಾಸಿಟಿವ್‌ ಆಗುತ್ತಿರುವ ಪ್ರಕರಣಗಳು ದಿನದಿಂದ ದಿನಕ್ಕೆ ವೇಗವಾಗಿ ಏರಿಕೆಯಾಗುತ್ತಿವೆ. ಅಧಿಕಾರಿಗಳನ್ನು ಸುರಕ್ಷಿತವಾಗಿಡಲು ಅತೀವ ಮುನ್ನೆಚ್ಚರಿಕೆಯನ್ನು ವಹಿಸಬೇಕಾದ ಅವಶ್ಯಕತೆಯಿದೆ" ಎಂದು ಜವಳಿ ಸಚಿವಾಲಯವು ನಿನ್ನೆ ಆದೇಶ ಹೊರಡಿಸಿದ್ದು, ಆ ಪ್ರತಿಯನ್ನು ಈಟಿವಿ ಭಾರತ ಪರಿಶೀಲಿಸಿದೆ.
ಈ ಪ್ರಕರಣದ ಕುರಿತು ಮಾಹಿತಿ ಹೊಂದಿರುವ ವ್ಯಕ್ತಿಯೊಂದರ ಪ್ರಕಾರ, ಇನ್ನೂ ಒಂದು ಅಥವಾ ಎರಡು ದಿನಗಳಲ್ಲಿ ಇತರ ಸಚಿವಾಲಯಗಳು ಸಹ ಇದೇ ರೀತಿಯ ಆದೇಶಗಳನ್ನು ಹೊರಡಿಸುವ ಪ್ರಕ್ರಿಯೆಯಲ್ಲಿವೆ.
ಯಾವುದೇ ಸಮಯದಲ್ಲಿ ಯಾವುದೇ ಕೊಠಡಿಯಲ್ಲಿ ಇಬ್ಬರಿಗಿಂತ ಹೆಚ್ಚು ವ್ಯಕ್ತಿಗಳಿರುವುದನ್ನು ಈ ಆದೇಶ ನಿರ್ಬಂಧಿಸುತ್ತದೆ. ಅಷ್ಟೇ ಅಲ್ಲ, ಖಾಸಗಿ ಬಾಡಿಗೆ ವಾಹನಗಳ ಸಹಿತ ಸಾರ್ವಜನಿಕ ಸಾರಿಗೆ ವ್ಯವಸ್ಥೆ ಬಳಕೆ, ಅಥವಾ ನಿರ್ಬಂಧಿತ ವಲಯಗಳಿಗೆ ಹತ್ತಿರ ಅಥವಾ ಪಕ್ಕದಲ್ಲಿ ವಾಸವಾಗಿರುವ ಸಿಬ್ಬಂದಿ ಕಚೇರಿಗೆ ಹಾಜರಾಗುವುದನ್ನೂ ಇದು ಬೆಂಬಲಿಸುವುದಿಲ್ಲ.
ಕಾರ್ಯದರ್ಶಿ ಹಂತದ ಎರಡನೇ ಅಧಿಕಾರಿ ದೀಪಂ (ಡಿಐಪಿಎಂ) ಕಾರ್ಯದರ್ಶಿ ತುಹಿನ್‌ ಕಾಂತ್‌ ಪಾಂಡೆ ಅವರಿಗೆ ಕೊರೊನಾ ದೃಢಪಟ್ಟಿರುವ ವಿಷಯ ಮಂಗಳವಾರ ಬಯಲಾಗುತ್ತಲೇ ಈ ವಿಷಯ ತುರ್ತು ಸ್ವರೂಪವನ್ನು ಪಡೆದುಕೊಂಡಿತು.
ಸೋಂಕುರಹಿತವಾಗಿಸುವ ಉದ್ದೇಶದಿಂದ ಕಟ್ಟಡವನ್ನು ಮುಚ್ಚಲಾಗುತ್ತಿದೆ ಎಂದು ಕಚೇರಿ ಆದೇಶವೊಂದು ದೀಪಂ ಸಿಬ್ಬಂದಿಗೆ ಮಾಹಿತಿ ನೀಡಿತ್ತಲ್ಲದೇ, ಹೂಡಿಕೆ ಹಿಂತೆಗೆತ ಕಾರ್ಯದರ್ಶಿ ಸಹಿತ ಇನ್ನಿಬ್ಬರು ಅಧಿಕಾರಿಗಳಿಗೆ ಸೋಂಕು ತಗಲಿರುವುದನ್ನು ಅದು ದೃಢಪಡಿಸಿತ್ತು.
ತುಹಿನ್‌ ಕಾಂತ್‌ ಪಾಂಡೆ ಪ್ರಕರಣ ಆಕಸ್ಮಿಕವಲ್ಲ ಎಂಬ ಅಂಶ ಸರ್ಕಾರಿ ವಲಯಗಳಲ್ಲಿ ಎಚ್ಚರಿಕೆಯ ಗಂಟೆಯನ್ನು ಮೊಳಗಿಸಲು ಕಾರಣವಾಯಿತು. ರಕ್ಷಣಾ ಕಾರ್ಯದರ್ಶಿ ಡಾ. ಅಜಯ ಕುಮಾರ್‌ ಮತ್ತು ಪಿಐಬಿ (ಪ್ರೆಸ್‌ ಇನ್ಫರ್ಮೇಶನ್‌ ಬ್ಯುರೊ) ಮುಖ್ಯಸ್ಥ ಕೆ.ಎಸ್. ಧಾಟ್‌ವಾಲಿಯಾ ಅಲ್ಲದೇ ಇತ್ತೀಚಿನ ದಿನಗಳಲ್ಲಿ ಹಲವಾರು ಹಿರಿಯ ಅಧಿಕಾರಿಗಳಲ್ಲಿ ಕೊರೊನಾ ಸೋಂಕು ದೃಢಪಟ್ಟಿದೆ. ಈ ಪೈಕಿ ಹಣಕಾಸು ಸಚಿವಾಲಯದ ಆಧೀನ ಕಾರ್ಯದರ್ಶಿ ರಿತಾ ಮಲ್‌ ಹಾಗೂ ಕಾನೂನು ಮತ್ತು ನ್ಯಾಯ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಡಾ. ನಾರಾಯಣ ರಾವ್‌ ಬತ್ತು ಸಹ ಸೇರಿದ್ದಾರೆ.
ಕೇಂದ್ರ ಸರ್ಕಾರದ ಪ್ರಚಾರ ಅಂಗದ ಪ್ರಧಾನ ಮಹಾ ನಿರ್ದೇಶಕರಾಗಿ ಧಾಟ್‌ವಾಲಿಯಾ ಅವರು ಕೋವಿಡ್‌ ಕುರಿತು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಹಾಗೂ ಗೃಹ ಸಚಿವಾಲಯಗಳು ನಡೆಸುತ್ತಿದ್ದ ಜಂಟಿ ಗೋಷ್ಠಿಗಳಲ್ಲಿ ಪ್ರಶ್ನೆ ಮತ್ತು ಉತ್ತರಗಳನ್ನು ನಿಭಾಯಿಸುತ್ತಿದ್ದರು.
ಈ ವಿಷಯಕ್ಕೆ ಸಂಬಂಧಿಸಿದಂತೆ ಮಾಹಿತಿ ಹೊಂದಿರುವ ಕೆಲವರ ಪ್ರಕಾರ, ಕೆ.ಎಸ್. ಧಾಟ್‌ವಾಲಿಯಾ ಅವರ ಚಾಲಕ ಮತ್ತು ಸಿಬ್ಬಂದಿ ಪೈಕಿ ಒಬ್ಬ ವ್ಯಕ್ತಿಗೂ ಸೋಂಕು ದೃಢಪಟ್ಟಿದೆ. ಇದಾದ ನಂತರ, ಅವರ ಜೊತೆ ನಿಕಟವಾಗಿ ಕೆಲಸ ಮಾಡುತ್ತಿದ್ದ ಎಲ್ಲಾ ಅಧಿಕಾರಿಗಳೂ ಧಾಟ್‌ವಾಲಿಯಾ ಅವರಂತೆ ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆ.
ಅದಾಗ್ಯೂ, ಉನ್ನತ ಅಧಿಕಾರಿಗಳೊಳಗೆ ಎಚ್ಚರಿಕೆಯ ಗಂಟೆಗಳು ಮೊಳಗಲು ಕಾರಣವೇನೆಂದರೆ, ಕೇಂದ್ರ ಸರ್ಕಾರದ ಪ್ರಚಾರ ಅಂಗದ ಮುಖ್ಯಸ್ಥರಾಗಿರುವ ಕೆ.ಎಸ್. ಧಾಟ್‌ವಾಲಿಯಾ ಅವರು ಕೇಂದ್ರದ ಹಲವಾರು ಸಚಿವರು ಮತ್ತು ಮಹತ್ವದ ಸಚಿವಾಲಯದ ಹಲವಾರು ಉನ್ನತ ಅಧಿಕಾರಿಗಳೊಂದಿಗೆ ನಿಕಟ ಸಂಪರ್ಕದಲ್ಲಿ ಇದ್ದುದು.
ಕಳೆದ ವಾರ ನಡೆದಿದ್ದ ಎರಡು ಸಂಪುಟ ಸಭೆಗಳ ಕುರಿತ ವಿವರಗಳನ್ನು ಕೆ.ಎಸ್. ಧಾಟ್‌ವಾಲಿಯಾ ಅವರು ಸೋಮವಾರ (ಜೂನ್‌ 1) ಮತ್ತು ಬುಧವಾರ (ಜೂನ್‌ 3) ಸಹ ಹಂಚಿಕೊಂಡಿದ್ದರು. ಈ ಸಂದರ್ಭದಲ್ಲಿ ಮಾಹಿತಿ ಮತ್ತು ಪ್ರಸಾರ ಸಚಿವ ಪ್ರಕಾಶ ಜಾವಡೇಕರ್‌, ಸಾರಿಗೆ ಮತ್ತು ಎಂಎಸ್‌ಎಂಇ ಸಚಿವ ನಿತಿನ್‌ ಗಡ್ಕರಿ ಮತ್ತು ಕೃಷಿ ಮತ್ತು ರೈತರ ಕಲ್ಯಾಣ ಸಚಿವ ನರೇಂದ್ರ ಸಿಂಗ್‌ ತೋಮರ್‌ ಜೊತೆ ಅವರು ಸುದ್ದಿಗೋಷ್ಠಿಯಲ್ಲಿ ಪಾಲ್ಗೊಂಡಿದ್ದರು.
ಮಂಗಳವಾರದಂದು ಧಾಟ್‌ವಾಲಿಯಾ ಅವರು ಸಂಪರ್ಕ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವ ರವಿಶಂಕರ್‌ ಪ್ರಸಾದ್‌ ಅವರೊಂದಿಗಿನ ಮತ್ತೊಂದು ಸುದ್ದಿಗೋಷ್ಠಿಯಲ್ಲಿ ಹಾಜರಿದ್ದರು. ಈ ಗೋಷ್ಠಿಯಲ್ಲಿ ನೀತಿ ಆಯೋಗದ ಸಿಇಒ ಅಮಿತಾಬ್‌ ಕಾಂತ್‌ ಮತ್ತು ಸಂಪರ್ಕ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆಯ ಕಾರ್ಯದರ್ಶಿ ಸಂಜಯ್‌ ಧೋತ್ರೆ ಸಹ ಪಾಲ್ಗೊಂಡಿದ್ದರು.
ಈ ಸಚಿವರೆಲ್ಲರೂ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಅಧ್ಯಕ್ಷತೆ ವಹಿಸಿದ್ದ ಬುಧವಾರದ ಕೇಂದ್ರ ಸಂಪುಟ ಸಭೆಗೂ ಹಾಜರಾಗಿದ್ದರು. ಅವಶ್ಯಕ ಸೇವೆಗಳ ಕಾಯ್ದೆಗೆ ಸಂಬಂಧಿಸಿದ ದೂರಗಾಮಿ ಪರಿಣಾಮಗಳನ್ನು ಹೊಂದಿರುವ ತಿದ್ದುಪಡಿಗಳನ್ನು ಈ ಸಭೆ ಅನುಮೋದಿಸಿತ್ತು. ಅಲ್ಲದೆ ದೇಶಾದ್ಯಂತ ತಮ್ಮ ಉತ್ಪನ್ನಗಳನ್ನು ಮಾರುಕಟ್ಟೆಗೆ ತರುವಲ್ಲಿ ರೈತರಿಗೆ ಹೆಚ್ಚಿನ ಸ್ವಾತಂತ್ರ್ಯವನ್ನು ಒದಗಿಸುವ ಎರಡು ಸುಗ್ರೀವಾಜ್ಞೆಗಳಿಗೂ ಈ ಸಭೆ ಸಮ್ಮತಿ ಸೂಚಿಸಿತ್ತು.
ಧಾಟ್‌ವಾಲಿಯಾ ಅವರಿಗೆ ಕೊರೊನಾ ಸೋಂಕು ದೃಢಪಟ್ಟ ನಂತರ ಎಷ್ಟು ಜನ ಕೇಂದ್ರ ಸಚಿವರು ಮತ್ತು ಉನ್ನತ ಅಧಿಕಾರಿಗಳು ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಅದಾಗ್ಯೂ, ಸೋಂಕುರಹಿತವಾಗಿಸುವ ಉದ್ದೇಶದಿಂದ ಪಿಐಬಿ ಕಟ್ಟಡವನ್ನು ಮುಚ್ಚಲಾಗಿತ್ತು. ಪ್ರತಿ ಬುಧವಾರ ಮಾಮೂಲಿನಂತೆ ನಡೆಯುತ್ತಿದ್ದ ಸಂಪುಟ ಸಭೆ ಈ ಸಲ ನಡೆಯಲಿಲ್ಲ.
ಪಿಐಬಿಯ ಉನ್ನತ ಅಧಿಕಾರಿಗಳಿಗೆ ಕೊರೊನಾ ಸೋಂಕು ತಗಲಿದ ಸುದ್ದಿ ಸಾರ್ವಜನಿಕವಾಗಿ ಹರಡಿದ ನಂತರ, ಆರೋಗ್ಯ ಸಚಿವಾಲಯ ಮತ್ತು ಗೃಹ ಸಚಿವಾಲಯಗಳು ಕೋವಿಡ್‌ ಕುರಿತು ಜಂಟಿಯಾಗಿ ನಡೆಸುತ್ತಿದ್ದ ಮಾಮೂಲು ಸುದ್ದಿಗೋಷ್ಠಿ ಸಹ ನಡೆಯಲಿಲ್ಲ.
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಲವ ಅಗರವಾಲ್‌, ಗೃಹ ವ್ಯವಹಾರಗಳ ಜಂಟಿ ಕಾರ್ಯದರ್ಶಿ ಪುಣ್ಯ ಸಲೀಲ ಶ್ರೀವಾಸ್ತವ ಹಾಗೂ ಇಂಡಿಯನ್‌ ಕೌನ್ಸಿಲ್‌ ಫಾರ್‌ ಮೆಡಿಕಲ್‌ ರೀಸರ್ಚ್‌ (ಐಸಿಎಂಆರ್‌) ಸಂಸ್ಥೆಯ ರೋಗೌಷಧ ಮತ್ತು ಸಾಂಕ್ರಾಮಿಕ ರೋಗಗಳ ವಿಭಾಗದ ಮುಖ್ಯಸ್ಥ ರಮಣ ಆರ್. ಗಂಗಾಖೇಡ್ಕರ್‌ ಅವರು ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆಯೇ ಇಲ್ಲವೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಕೆ.ಎಸ್. ಧಾಟ್‌ವಾಲಿಯ ಸಹಿತ ಈ ಮೂವರೂ ಅಧಿಕಾರಿಗಳು ಕೋವಿಡ್‌-19ಗೆ ಸಂಬಂಧಿಸಿದಂತೆ ನವದೆಹಲಿಯ ನ್ಯಾಶನಲ್‌ ಮೀಡಿಯಾ ಸೆಂಟರ್‌ನಲ್ಲಿ ನಿಯಮಿತವಾಗಿ ನಡೆಸಲಾಗುತ್ತಿದ್ದ ಸುದ್ದಿಗೋಷ್ಠಿಯಲ್ಲಿ ಹಾಜರಿರುತ್ತಿದ್ದರು ಮತ್ತು ಕೊರೊನಾ ಮಾಹಿತಿ ನೀಡಿಕೆ ಕುರಿತಂತೆ ಕೇಂದ್ರ ಸರ್ಕಾರದ ಮುಖವಾಣಿ ಎನಿಸಿದ್ದರು.
ಅದೇ ರೀತಿ, ರಕ್ಷಣಾ ಕಾರ್ಯದರ್ಶಿ ಡಾ. ಅಜಯ ಕುಮಾರ್‌ ಅವರಿಗೆ ಕಳೆದ ವಾರ ಕೋವಿಡ್‌-19 ಸೋಂಕು ದೃಢಪಟ್ಟ ನಂತರ, ರಕ್ಷಣಾ ಸಚಿವಾಲಯದ ಅಧಿಕಾರಿಗಳು ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆಯೇ ಎಂಬುದೂ ಸಹ ಇನ್ನೂ ಸ್ಪಷ್ಟವಾಗಿಲ್ಲ.
ರಕ್ಷಣಾ ಸಚಿವಾಲಯದ ಅತ್ಯಂತ ಹಿರಿಯ ನಾಗರಿಕ ಅಧಿಕಾರಿಯಾಗಿರುವ ಡಾ. ಅಜಯ ಕುಮಾರ್‌ ಅವರು ರಕ್ಷಣಾ ಸಚಿವ ರಾಜನಾಥ ಸಿಂಗ್‌, ಮೂರೂ ರಕ್ಷಣಾ ಪಡೆಗಳ ಸಿಬ್ಬಂದಿಯ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ಹಾಗೂ ಮೂರೂ ಸೇನಾ ಪಡೆಗಳ ಮುಖ್ಯಸ್ಥರ ಜೊತೆ ನಿಯಮಿತವಾಗಿ ಸಂಪರ್ಕದಲ್ಲಿರುತ್ತಿದ್ದರು.
ಪಿಟಿಐ ವರದಿಯೊಂದರ ಪ್ರಕಾರ, ರಕ್ಷಣಾ ಸಚಿವ ರಾಜನಾಥ ಸಿಂಗ್‌ ಅವರು ಮುನ್ನೆಚ್ಚರಿಕೆ ಕ್ರಮವಾಗಿ ಮರುದಿನ ತಮ್ಮ ಕಚೇರಿಗೆ ಹಾಜರಾಗಲಿಲ್ಲ.
ಮೂಲಗಳ ಪ್ರಕಾರ, ಡಾ. ಅಜಯ ಕುಮಾರ್‌ ಅವರೊಂದಿಗೆ ನಿಕಟ ಸಂಪರ್ಕದಲ್ಲಿರುತ್ತಿದ್ದ ಎಲ್ಲಾ ಅಧಿಕಾರಿಗಳು, ನಿಯಮಾವಳಿಗಳ ಪ್ರಕಾರ ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆ. ಆದರೆ, ಸೈನ್ಯದ ಉನ್ನತ ಅಧಿಕಾರಿಗಳು ಸಹ ಇದರಲ್ಲಿ ಇದ್ದಾರೆಯೇ ಇಲ್ಲವೇ ಎಂಬುದು ಮಾತ್ರ ಬಹಿರಂಗವಾಗಿಲ್ಲ.
ರಾಜ್ಯದ ನಾಯಕರು ಸಹ ಕೋವಿಡ್‌ ವೈರಸ್ ಸೋಂಕಿನ ಭೀತಿಯಲ್ಲಿದ್ದಾರೆ. ಈ ತೀವ್ರ ಸಾಂಕ್ರಾಮಿಕ ವೈರಸ್ ಕೇಂದ್ರ ಸರ್ಕಾರವಷ್ಟೇ ಅಲ್ಲದೇ, ರಾಜ್ಯಗಳನ್ನು ಸಹ ಅಪ್ಪಳಿಸಿದೆ.
ದೇಶಾದ್ಯಂತ 8,000ಕ್ಕೂ ಹೆಚ್ಚು ಹಾಗೂ ಜಗತ್ತಿನಾದ್ಯಂತ 4,19,000ಕ್ಕೂ ಹೆಚ್ಚು ಜನರ ಸಾವಿಗೆ ಕಾರಣವಾದ ಈ ಮಾರಕ ವೈರಸ್‌ಗೆ ಡಿಎಂಕೆ ಶಾಸಕ ಜೆ. ಅನ್ಬಳಗನ್‌ ಅವರು ಬುಧವಾರ ಬಲಿಯಾಗುವುದರೊಂದಿಗೆ ಹೀಗೆ ಮೃತಪಟ್ಟ ದೇಶದ ಶಾಸನ ಸಭೆಯ ಮೊದಲ ವ್ಯಕ್ತಿ ಎನಿಸಿದ್ದಾರೆ.
ಕಳೆದ ವಾರ ಉತ್ತರಾಖಂಡದ ಸಚಿವ ಸತ್ಪಾಲ್‌ ಮಹಾರಾಜ್‌, ಅವರ ಪತ್ನಿ ಅಮೃತಾ ರಾವತ್‌, ಒಂದೂವರೆ ವರ್ಷದ ಮೊಮ್ಮಗ, ಇಬ್ಬರು ಮಕ್ಕಳು, ಮತ್ತವರ ಪತ್ನಿಯರು ಹಾಗೂ ಸಿಬ್ಬಂದಿ ಸಹಿತ ಎಲ್ಲರಲ್ಲಿಯೂ ಕೊರೊನಾ ವೈರಸ್ ದೃಢಪಟ್ಟಿತ್ತು. ಆನಂತರ, ಮುಖ್ಯಮಂತ್ರಿ ತ್ರಿವೇಂದ್ರ ಸಿಂಗ್‌ ರಾವತ್‌ ಮತ್ತವರ ಸಂಪುಟದ ಸಹೋದ್ಯೋಗಿಗಳ ಸಹಿತ ಎಲ್ಲರೂ ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದರು.
ಮುಖ್ಯಮಂತ್ರಿ ತ್ರಿವೇಂದ್ರ ಸಿಂಗ್‌ ರಾವತ್‌ ಅವರು ಮೇ 29ರಂದು (ಶುಕ್ರವಾರ) ಅಧ್ಯಕ್ಷತೆ ವಹಿಸಿದ್ದ ಸಂಪುಟ ಸಭೆಯಲ್ಲಿ ಸತ್ಪಾಲ್‌ ಮಹಾರಾಜ್‌ ಹಾಜರಾಗಿದ್ದರು.
ಸತ್ಪಾಲ್‌ ಮಹಾರಾಜ್‌ ಅವರ ಪತ್ನಿ ಅಮೃತಾ ರಾವತ್‌ ಅವರಿಗೆ ಕೋವಿಡ್‌ ಸೋಂಕು ಶನಿವಾರ (ಮೇ 30) ದೃಢಪಟ್ಟಿದ್ದರೆ, ಅವರ ಕುಟುಂಬದ ಸದಸ್ಯರು ಮತ್ತು ಸಿಬ್ಬಂದಿಯ ಮೇಲೆ ನಡೆಸಲಾದ ಮತ್ತೊಂದು ಪರೀಕ್ಷೆಯಲ್ಲಿ ಸಚಿವರು, ಅವರ ಕುಟುಂಬದ ಸದಸ್ಯರ ಸಹಿತ 20ಕ್ಕೂ ಹೆಚ್ಚು ಜನರಲ್ಲಿ ಸೋಂಕು ದೃಢಪಟ್ಟಿತ್ತು. ನಿಕಟವಾಗಿ ವಾಸಿಸುವ ಜನರ ನಡುವೆ ಕೊರೊನಾ ವೈರಸ್ ಅದೆಷ್ಟು ವೇಗವಾಗಿ ಹರಡುತ್ತಿದೆ ಎಂಬುದನ್ನು ಈ ಪ್ರಕರಣ ತೋರಿಸುತ್ತದೆ.
ಅದೇ ರೀತಿ, ಕೊರೊನಾ ವೈರಸ್ ಭೀತಿಯು ಕಳೆದ ತಿಂಗಳು ಗುಜರಾತ್‌ ಸರ್ಕಾರವನ್ನೂ ಅಪ್ಪಳಿಸಿತ್ತು. ಕಾಂಗ್ರೆಸ್‌ ಶಾಸಕ ಇಮ್ರಾನ್‌ ಖೇಡಾವಾಲಾ ಜೊತೆಗೆ ಮುಖ್ಯಮಂತ್ರಿ ವಿಜಯ ರೂಪಾಣಿ ಅವರು ಸಭೆ ನಡೆಸಿದ್ದರು. ನಂತರದಲ್ಲಿ ಖೇಡಾವಾಲಾ ಅವರಿಗೆ ಕೊರೊನಾ ಇರುವುದು ದೃಢಪಟ್ಟ ನಂತರ ಮುಖ್ಯಮಂತ್ರಿಗಳು ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಬೇಕಾಯಿತು.
