ಗಾಂಧಿನಗರದಲ್ಲಿ ದಿನೇಶ್​ ಗುಂಡೂರಾವ್ ಸತತ ನಾಲ್ಕನೇ ಗೆಲುವಿಗೆ ತೊಡಕಾಗಲಿದೆಯಾ ಕೇಸರಿ ಪಡೆ?

ರಾಜ್ಯ ರಾಜಧಾನಿ ಬೆಂಗಳೂರಿನ ಗಾಂಧಿನಗರ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್​ನ ಹಿರಿಯ ನಾಯಕ ದಿನೇಶ್ ಗುಂಡೂರಾವ್ ಮೂರು ಬಾರಿ ಗೆಲುವು ಸಾಧಿಸಿದ್ದು, ಈ ಬಾರಿ ನಾಲ್ಕನೇ ಜಯ ದಾಖಲಿಸುವತ್ತ ಚಿತ್ತ ನೆಟ್ಟಿದ್ದಾರೆ. ಮತ್ತೊಂದೆಡೆ, ಬಿಜೆಪಿ ಟಿಕೆಟ್ ಆಕಾಂಕ್ಷಿಗಳು ಕ್ಷೇತ್ರದಲ್ಲಿ ತಮ್ಮ ನೆಲೆ ವಿಸ್ತರಿಸಿಕೊಳ್ಳಲು ಯತ್ನದಲ್ಲಿದ್ದಾರೆ. ಇಡೀ ಕ್ಷೇತ್ರದ ಚಿತ್ರಣ ಇಲ್ಲಿದೆ..

ಬೆಂಗಳೂರು: ರಾಜ್ಯ ವಿಧಾನಸಭೆ ಕ್ಷೇತ್ರಗಳ ಪೈಕಿ ಅತಿಹೆಚ್ಚು ವಾಣಿಜ್ಯ ಚಟುವಟಿಕೆಗಳಿಂದ ಕೂಡಿರುವ ಹಾಗೂ ಕೊಳೆಗೇರಿಗಳ ಸ್ವರ್ಗ ಎಂದೇ ಪ್ರಸಿದ್ಧಿಯಾಗಿರುವ ಕ್ಷೇತ್ರ ಗಾಂಧಿನಗರ. ಇಲ್ಲೀಗ ಚುನಾವಣೆ ಕಾವು ದಟ್ಟವಾಗುತ್ತಿದ್ದು, ಸತತ ನಾಲ್ಕನೇ ಗೆಲುವಿನತ್ತ ನಾಗಾಲೋಟದಲ್ಲಿರುವ ಕಾಂಗ್ರೆಸ್​ನ ದಿನೇಶ್ ಗುಂಡೂರಾವ್​ ಅವರಿಗೆ ಕಮಲ ಪಕ್ಷ ದೊಡ್ಡ ತೊಡಕಾಗಿದೆ.

1999ರಿಂದ ಇದುವರೆಗೂ ನಡೆದಿರುವ ಐದು ಚುನಾವಣೆಗಳ ಪೈಕಿ ನಾಲ್ಕರಲ್ಲಿ ಸ್ಪರ್ಧಿಸಿ ನಾಲ್ಕನ್ನೂ ಗೆದ್ದಿರುವ ದಿನೇಶ್​ ಗುಂಡೂರಾವ್, 2004ರಲ್ಲಿ ಟಿಕೆಟ್​ ಪಡೆಯುವಲ್ಲಿ ವಿಫಲರಾಗಿದ್ದರು. ಆ ವರ್ಷ ಬಿಜೆಪಿ ವಿರುದ್ಧ ಕಾಂಗ್ರೆಸ್ ಸೋತಿತ್ತು. ಕಾಂಗ್ರೆಸ್ ಗೆಲ್ಲುವ ಕ್ಷೇತ್ರಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿರುವ ಗಾಂಧಿನಗರ ನಿಧಾನವಾಗಿ ಬಿಜೆಪಿಯತ್ತ ಒಲಿಯುತ್ತಿರುವಂತೆ ಭಾಸವಾಗುತ್ತಿದೆ. ಆದರೆ, ಸೂಕ್ತ ಅಭ್ಯರ್ಥಿ ಆಯ್ಕೆ ಮಾಡಿಕೊಳ್ಳುವಲ್ಲಿ ಎಡವುತ್ತಿರುವ ಬಿಜೆಪಿ ಈ ಸಾರಿ ಒಬ್ಬ ಪ್ರಬಲ ಅಭ್ಯರ್ಥಿಯನ್ನು ಕಣಕ್ಕಿಳಿಸಲು ಚಿಂತನೆ ನಡೆಸಿದೆ. ಕ್ಷೇತ್ರದಲ್ಲಿ ದಿನೇಶ್​ ಗುಂಡೂರಾವ್ ಜನಪ್ರಿಯತೆ ಉತ್ತಮವಾಗಿದ್ದು, ಕೊಳೆಗೇರಿ ಮತದಾರರ ಸಂಪೂರ್ಣ ಬೆಂಬಲ ಹೊಂದಿದ್ದಾರೆ. ಈ ಸಾರಿಯೂ ಕೊಳೆಗೇರಿ ಮತದಾರರು ದಿನೇಶ್​ ಕೈ ಹಿಡಿದರೆ ಗೆಲುವು ಸುಲಭ ಎನ್ನುತ್ತಿದ್ದಾರೆ ರಾಜಕೀಯ ಪಂಡಿತರು.

ಕ್ಷೇತ್ರದ ಹಿನ್ನೋಟ: 1957ರಿಂದ ನಡೆದಿರುವ ಚುನಾವಣೆಯಲ್ಲಿ ಗಾಂಧಿನಗರ ವಿಧಾನಸಭೆ ಕ್ಷೇತ್ರದ ಮತದಾರರು ಕೈ ಹಿಡಿದದ್ದೇ ಹೆಚ್ಚು. 1957ರಲ್ಲಿ ನಾಗರತ್ನಮ್ಮ ಪಕ್ಷೇತರ ಅಭ್ಯರ್ಥಿ ಜೆ. ಲಿಂಗಯ್ಯ ವಿರುದ್ಧ 8,098 ಮತಗಳ ಅಂತರದ ಗೆಲುವು ಸಾಧಿಸುವ ಮೂಲಕ ಕಾಂಗ್ರೆಸ್​ಗೆ ಶುಭಾರಂಭ ನೀಡಿದ್ದರು. 1962ರಲ್ಲಿಯೂ ನಾಗರತ್ನಮ್ಮ ಅವರೇ ಗೆದ್ದಿದ್ದರು. ಪಕ್ಷೇತರ ಅಭ್ಯರ್ಥಿ ಎಚ್​.ಎಲ್​ ನಂಜಪ್ಪ ವಿರುದ್ಧ ಅವರಿಗೆ 5917 ಮತಗಳ ಅಂತರದ ಗೆಲುವು ಲಭಿಸಿತ್ತು. 1967ರಲ್ಲಿ ಪಕ್ಷೇತರ ಅಭ್ಯರ್ಥಿ ಬಲ್ಸು ಪುರ್ಸುಕದಂ ಕಾಂಗ್ರೆಸ್​​ನ ಗಾಂವಕರ್ ಸಖರಾಮ್ ದತ್ತಾತ್ರೇಯ ವಿರುದ್ಧ 9,320 ಮತಗಳ ಅಂತರದಿಂದ ಗೆದ್ದಿದ್ದರು. ಈ ಮೂಲಕ ಮೊದಲ ಬಾರಿಗೆ ಕ್ಷೇತ್ರ ಕಾಂಗ್ರೆಸ್ ಕೈತಪ್ಪಿತ್ತು.

ಗಾಂಧಿನಗರ ವಿಧಾನಸಭಾ ಕ್ಷೇತ್ರದ ಮಾಹಿತಿ

ಆದರೆ 1972ರಲ್ಲಿ ಬಲ್ಸು ಪುರ್ಸುಕದಂ ಕಾಂಗ್ರೆಸ್ ಸೇರಿ ಪಕ್ಷದ ಟಿಕೆಟ್​ ಪಡೆದು ಸ್ಪರ್ಧಿಸಿದ್ದರು. ಆಗ ಬಿಜೆಎಸ್​ನ ಅಭ್ಯರ್ಥಿಯಾಗಿದ್ದ ಕೃಷ್ಣಾಪುರ ಚಾರು ದೇಮು ವಿರುದ್ಧ 11,111 ಮತಗಳ ಅಂತರದಿಂದ ಗೆದ್ದರು. 1978ರಲ್ಲಿ ಐಎನ್​ಸಿ (ಐ) ಅಭ್ಯರ್ಥಿ ಕೆ.ಲಕ್ಷ್ಮಣ್ ಜೆಎನ್​ಪಿಯ ಎಂ.ಆರ್. ಜಯರಾಂ ವಿರುದ್ಧ 3,918 ಮತಗಳ ಅಂತರದಿಂದ ಗೆದ್ದು ಬೀಗಿದ್ದರು. 1983ರಲ್ಲಿ ಜೆಎನ್​ಪಿ ಅಭ್ಯರ್ಥಿ ಎಂ.ಎಸ್. ನಾರಾಯಣ ರಾವ್ ಕಾಂಗ್ರೆಸ್​ನ ಬಿ.ಕೆ. ಹರಿಪ್ರಸಾದ್ ವಿರುದ್ಧ 9399 ಮತಗಳ ಅಂತರದಿಂದ ಗೆದ್ದಿದ್ದರು.

1985ರಲ್ಲಿ ಬಿ.ಸ್ವಾಮಿರಾವ್ ಕೈ ಅಭ್ಯರ್ಥಿಯಾಗಿ ಕಣಕ್ಕಿಳಿದ್ದರು. ಜೆಎನ್​ಪಿಯ ಜಿ. ನಂಜುಂಡಪ್ಪ ವಿರುದ್ಧ 2,461 ಮತಗಳ ಅಂತರದಿಂದ ಜಯ ಸಾಧಿಸಿದ್ದರು. 1989ರಲ್ಲಿ ಕಾಂಗ್ರೆಸ್​ನಿಂದ ಕಣಕ್ಕಿಳಿದ ಆರ್. ದಯಾನಂದರಾವ್ ಜನತಾ ಪರಿವಾರದ ಅಭ್ಯರ್ಥಿ ಲೀಲಾದೇವಿ ಆರ್. ಪ್ರಸಾದ್ ವಿರುದ್ಧ 13,352 ಮತಗಳ ಅಂತರದಿಂದ ಗೆಲುವು ಕಂಡಿದ್ದರು. 1994ರಲ್ಲಿ ಬಿಜೆಪಿಯ ಆಯನೂರು ಮಂಜುನಾಥ್ ಜನತಾಪರಿವಾರದ ಅಭ್ಯರ್ಥಿ ಜಿ. ನಂಜುಂಡಪ್ಪ ವಿರುದ್ಧ 627 ಮತಗಳ ಅಂತರದ ಗೆಲುವು ಸಾಧಿಸಿದ್ದರು.

ದಿನೇಶ್ ಪ್ರವೇಶ: 1999ರಲ್ಲಿ ಕಾಂಗ್ರೆಸ್ ಪಕ್ಷದಿಂದ ದಿನೇಶ್​ ಗುಂಡೂರಾವ್ ಪ್ರವೇಶವಾಯಿತು. ಮಾಜಿ ಸಿಎಂ ಆರ್.ಗುಂಡೂರಾವ್ ಪುತ್ರ ಎನ್ನುವ ಖ್ಯಾತಿಯ ಜತೆಗೆ ಒಂದಿಷ್ಟು ರಾಜಕೀಯ ಅನುಭವವನ್ನೂ ಪಡೆದಿದ್ದ ದಿನೇಶ್​ ಆ ವರ್ಷ ಜೆಡಿಯುನಿಂದ ಸ್ಪರ್ಧಿಸಿದ್ದ ಜಿ. ನಂಜುಂಡಪ್ಪ ವಿರುದ್ಧ 11,331 ಮತಗಳ ಅಂತರದಿಂದ ಜಯ ದಾಖಲಿಸಿದ್ದರು. ಆದರೆ, 2004ರಲ್ಲಿ ಕಾಂಗ್ರೆಸ್ ಡಾ. ನಾರಾಯಣಪ್ಪ ಜಿಡಿ ಅವರಿಗೆ ಟಿಕೆಟ್ ನೀಡಿತ್ತು. ಇವರು ಬಿಜೆಪಿಯ ಹಾಲಪ್ಪ ಎಚ್ ವಿರುದ್ಧ 16,850 ಮತಗಳ ಅಂತರದ ಸೋಲನ್ನು ಕಂಡಿದ್ದರು. ಇದಾದ ಬಳಿಕ 2008ರಲ್ಲಿ ಕಾಂಗ್ರೆಸ್ ದಿನೇಶ್​ ಗುಂಡೂರಾವ್ ಅವರನ್ನೇ ಕಣಕ್ಕಿಳಿಸಿತ್ತು. ಪಿ.ಸಿ. ಮೋಹನ್ ವಿರುದ್ಧ 2008ರಲ್ಲಿ 2,946 ಮತಗಳ ಹಾಗೂ 2013ರಲ್ಲಿ 22,607 ಮತಗಳ ಅಂತರದಿಂದ ಗುಂಡೂರಾವ್ ಗೆಲುವು ಸಾಧಿಸಿದ್ದರು. 2018ರಲ್ಲಿ ಅಭ್ಯರ್ಥಿ ಬದಲಿಸಿದ ಬಿಜೆಪಿ ಮಾಜಿ ಸಚಿವ ರಾಮಚಂದ್ರಗೌಡರ ಪುತ್ರ ಸಪ್ತಗಿರಿ ಗೌಡರಿಗೆ ಟಿಕೆಟ್ ನೀಡಿತ್ತು. ದಿನೇಶ್ ಗುಂಡೂರಾವ್ ಈ ಯುವ ನಾಯಕನ ವಿರುದ್ಧ 10,070 ಮತಗಳ ಅಂತರದಿಂದ ಸುಲಭವಾಗಿ ಗೆಲುವು ಸಾಧಿಸಿದ್ದರು.

ಮತ್ತೊಮ್ಮೆ ಸ್ಪರ್ಧೆಗೆ ಸಪ್ತಗಿರಿಗೌಡ ಪ್ರಯತ್ನ: ಈ ಸಲ ಬಿಜೆಪಿಯಿಂದ ಮತ್ತೊಮ್ಮೆ ಸ್ಪರ್ಧೆಗೆ ಸಪ್ತಗಿರಿಗೌಡ ಪ್ರಯತ್ನ ನಡೆಸಿದ್ದಾರೆ. ಇತ್ತೀಚೆಗೆ ಉದ್ಯೋಗ ಮೇಳ ಸಹ ನಡೆಸಿ ಗಮನ ಸೆಳೆದಿದ್ದಾರೆ. ಇವರಿಗೆ ಕಳೆದ ಬಾರಿ ಆಕಾಂಕ್ಷಿ ಹಾಗೂ ಚಿಕ್ಕಪೇಟೆ ಮಾಜಿ ಕಾರ್ಪೊರೇಟರ್ ಎಲ್. ಶಿವಕುಮಾರ್ ಪ್ರಬಲ ಸ್ಪರ್ಧಿಯಾಗಿದ್ದಾರೆ. ‘ಇದಲ್ಲದೇ ಮಾಜಿ ಸಚಿವ ಕೃಷ್ಣಯ್ಯ ಶೆಟ್ಟಿ ಸಹ ತಮ್ಮ ರಾಜಕೀಯದ ಇನ್ನೊಂದು ಇನಿಂಗ್ಸ್​ ಇಲ್ಲಿಂದಲೇ ಆರಂಭಿಸುವ ಪ್ರಯತ್ನದಲ್ಲಿದ್ದು, ವಿವಿಧ ಸಮುದಾಯದವರನ್ನು ಭೇಟಿಯಾಗಿ ಸಮಾಲೋಚಿಸುತ್ತಿದ್ದಾರೆ. ಇನ್ನೂ ನಾಲ್ಕೈದು ಟಿಕೆಟ್​ಗಾಗಿ ಬಿಜೆಪಿಯಲ್ಲಿ ಪ್ರಯತ್ನ ನಡೆಸಿದ್ದಾರೆ.

ಜೆಡಿಎಸ್​ನಿಂದ ಕಳೆದ ಬಾರಿ ಅಭ್ಯರ್ಥಿ ಆಗಿದ್ದ ನಾರಾಯಣಸ್ವಾಮಿ 3ನೇ ಸ್ಥಾನ ಗಳಿಸಿದ್ದರು. ಈ ಸಾರಿಯೂ ಇವರಿಗೆ ಜೆಡಿಎಸ್​ ಟಿಕೆಟ್ ಘೋಷಿಸಲಾಗಿದೆ. ಗೆದ್ದ ದಿನೇಶ್​ ಗುಂಡೂರಾವ್ ಶೇ.37ರಷ್ಟು ಅಂದರೆ 47,354 ಮತ ಗಳಿಸಿದ್ದರು. ಬಿಜೆಪಿಯ ಸಪ್ತಗಿರಿಗೌಡ ಶೇ. 29ರಷ್ಟು ಅಂದರೆ 37,284 ಮತ ಗಳಿಸಿದ್ದರೆ, ಶೇ.29ರಷ್ಟು ಅಂದರೆ 36,635 ಮತ ಗಳಿಸಿದ್ದ ನಾರಾಯಣಸ್ವಾಮಿ ಮೂರನೇ ಸ್ಥಾನ ಪಡೆದಿದ್ದರು.

ಕ್ಷೇತ್ರ ಚಿತ್ರಣ: ಈ ಕ್ಷೇತ್ರದ ಬಹುತೇಕ ಪ್ರದೇಶಗಳು ವಾಣಿಜ್ಯ ಚಟುವಟಿಕೆಗಳ ಕೇಂದ್ರಗಳಾಗಿವೆ. ಈ ಕ್ಷೇತ್ರದಲ್ಲಿರುವ ಬರುವ ಗಾಂಧಿ ನಗರ, ಒಕಳಿಪುರ, ಸುಭಾಶ್‌ ನಗರ, ಕಾಟನ್‌ಪೇಟೆ ಪ್ರದೇಶಗಳು ಕೊಳೆಗೇರಿಯನ್ನು ಒಳಗೊಂಡಿದ್ದು, ದೊಡ್ಡ ಸಂಖ್ಯೆಯಲ್ಲಿ ದುಡಿಯುವ ವರ್ಗದವರಿದ್ದಾರೆ. ಸರ್ವಧರ್ಮಗಳ ಜನರನ್ನು ಒಳಗೊಂಡಿರುವ ಈ ಕ್ಷೇತ್ರದಲ್ಲಿ ಇಂತಹ ಸಮುದಾಯವೇ ನಿರ್ಣಯಕ ಎಂದು ಹೇಳುವ ಪರಿಸ್ಥಿತಿ ಕಾಣಿಸುತ್ತಿಲ್ಲ. ಇಲ್ಲಿನ ಮತದಾರರನ್ನು ಗಮನಿಸಿದಾಗ ಒಟ್ಟು ಮತದಾರರ ಸಂಖ್ಯೆ 2,75,600 ಇದೆ.

ಈ ಕ್ಷೇತ್ರವು ಚಿತ್ರರಂಗದ ಚಟುವಟಿಕೆ, ಕೆಂಪೇಗೌಡ ಬಸ್​ ನಿಲ್ದಾಣ, ನಗರ ಕೇಂದ್ರ ರೈಲು ನಿಲ್ದಾಣ, ಗಾಂಧಿನಗರ, ಕಾಟನ್​ಪೇಟೆ ಮತ್ತತರ ವಾಣಿಜ್ಯ ಚಟುವಟಿಕೆಯ ತಾಣವನ್ನು ಒಳಗೊಂಡಿದೆ. ಅಭಿವೃದ್ಧಿ ಮಾತ್ರ ನಿರೀಕ್ಷಿತ ಮಟ್ಟದಲ್ಲಿ ಆಗಿಲ್ಲ. ಕೊಳಚೆ ಪ್ರದೇಶಗಳು, ಕೊಳೆಗೇರಿಗಳು, ಹಾಳಾದ ರಸ್ತೆ, ಚರಂಡಿ ವ್ಯವಸ್ಥೆ ಕ್ಷೇತ್ರದ ದುಸ್ಥಿತಿಗೆ ಕನ್ನಡಿ ಹಿಡಿದಂತಿದೆ. ದತ್ತಾತ್ರೇಯ ದೇವಸ್ಥಾನ, ಗಾಂಧಿನಗರ, ಸುಭಾಷ್ ನಗರ, ಓಕಳೀಪುರಂ, ಚಿಕ್ಕಪೇಟೆ, ಕಾಟನ್ ಪೇಟೆ, ಬಿನ್ನಿಪೇಟೆಯನ್ನು ಈ ಕ್ಷೇತ್ರ ಒಳಗೊಂಡಿದೆ. ಹಳೆಯ ಬೆಂಗಳೂರಿನ ಭಾಗವಾಗಿರುವ ಈ ಕ್ಷೇತ್ರದಲ್ಲಿ ಬಡಾವಣೆಗಳು ಒತ್ತೊತ್ತಾಗಿವೆ. ರಸ್ತೆಗಳು, ಅಂಗಡಿಗಳು ಇನ್ನೂ ಹಳೇ ಸ್ವರೂಪದಲ್ಲೇ ಇದ್ದು, ಆಧುನಿಕ ಬೆಂಗಳೂರಿನ ಲಕ್ಷಣ ಪಡೆದಿಲ್ಲ.

ಕ್ಷೇತ್ರಕ್ಕೆ ಅಭಿವೃದ್ಧಿಯ ಮೂಲಕ ಹೊಸ ಸ್ವರೂಪದ ಸ್ಪರ್ಶ ನೀಡುವುದು ಜನಪ್ರತಿನಿಧಿಗಳಿಗೆ ಸವಾಲೇ ಆಗಿದೆ. ಇಲ್ಲಿ ರಸ್ತೆ ಅಗಲ ಮಾಡಲು ಸಾಧ್ಯವಿಲ್ಲ. ವ್ಯಾಪಾರಿಗಳು ಮತ್ತು ನಿವಾಸಿಗಳಿಂದ ಪ್ರತಿರೋಧ ಬರುತ್ತದೆ. ಹೀಗಾಗಿ ಕ್ಷೇತ್ರದ ಎಲ್ಲೆಡೆ ಕಿರಿದಾದ ರಸ್ತೆಗಳಿಗೆ ತೇಪೆ ಹಾಕುವ ಕೆಲಸವೇ ಆಗುತ್ತಿದೆ. ಮತ್ತೊಂದೆಡೆ ಕೊಳಗೇರಿ ನಿವಾಸಿಗಳಿಗೆ ಬೇರೆಡೆ ಮನೆ ಕಟ್ಟಿಕೊಟ್ಟರೂ ಹೋಗಲು ತಯಾರಿಲ್ಲ. ಇವೆರಡೂ ವರ್ಗಗಳನ್ನು ಎದುರು ಹಾಕಿಕೊಳ್ಳಲು ಜನಪ್ರತಿನಿಧಿಗಳು ಸಿದ್ಧರಿಲ್ಲ. ಗಾಂಧಿನಗರ ವಿಧಾನಸಭಾ ಕ್ಷೇತ್ರದಲ್ಲಿ ಕನ್ನಡ, ತಮಿಳು, ತೆಲುಗು, ಮಲಯಾಳಂ, ಉರ್ದು ಸೇರಿದಂತೆ ಹಲವು ಭಾಷೆ ಮಾತನಾಡುವ ಜನರಿದ್ದಾರೆ.

ಇದನ್ನೂ ಓದಿ: ಬಿಜೆಪಿಯ ಭದ್ರಕೋಟೆ ಬೆಂಗಳೂರು ದಕ್ಷಿಣ ಕ್ಷೇತ್ರದ ವಶಕ್ಕೆ ಕಾಂಗ್ರೆಸ್, ಜೆಡಿಎಸ್ ಪ್ರತಿತಂತ್ರ