વડોદરા પોલીસ દ્વારા એકતા દોડનું આયોજન કરવામાં આવ્યું

વડોદરા: લોખંડી પુરુષ સરદાર વલ્લભભાઈ પટેલની સ્મૃતિમાં વડોદરા શહેર પોલીસ દ્વારા એકતા દોડ રન ફોર યુનિટીનું આયોજન કરવામાં આવ્યું હતું. જે દોડ કોરોના મહામારીને ધ્યાનમાં રાખી સિમિત વ્યક્તિઓ વચ્ચે કોવિડ-19ની ગાઈડલાઈન અનુસાર યોજવામાં આવી હતી. આ દોડનું પ્રસ્થાન સોમવારે વહેલી સવારે નવલખી ગ્રાઉન્ડ ખાતેથી પોલીસ કમિશ્નર ચિરાગ કોરડીયાએ લીલી ઝંડી આપી કરાવ્યું હતું. આ 5.5 કિલોમીટર દોડમાં વડોદરા શહેર પોલીસના 300 જેટલા જવાનો ઉપરાંત વડોદરા ટ્રાફિક બ્રિગેડના જવાનો પણ જોડાયા હતા. આ સાથે જ દોડવીરોનો ઉત્સાહ વધારવા શહેર પોલીસના DCP ઝોન 2 અને DCP ઝોન 4એ પણ ભાગ લીધો હતો.