ৰাজ্যত পুনৰ ধৰ্মীয় স্থানত চুৰি: ৰঙিয়াৰ মন্দিৰত চোৰৰ লুটপাত

ৰাজ্যত পুনৰ ধৰ্মীয় স্থলীত চুৰি । এইবাৰ ৰঙিয়াৰ ঐতিহ্যমণ্ডিত তৰণী হৰি মন্দিৰত চোৰৰ লুটপাত (Theft at temple in Rangia) । বিদ্যুতৰ ব্যৱস্থা নথকাৰ সুযোগ লৈ নিশা চোৰে এই মন্দিৰটোত চলালে লুটপাত । সোমবাৰে নিশা হোৱা এই চুৰিকাণ্ডত চোৰে মন্দিৰত থকা বৰঙনিৰ ধন লুট কৰাৰ লগতে মন্দিৰৰ ভড়াল গৃহ, আৰিমত্ত ভৱনৰ কাৰ্যালয়তো চলালে লুটপাত । চোৰে লৈ গ’ল চিচি টিভিৰ মনিটৰ, মিক্সাৰ গ্ৰাইণ্ডাৰকে ধৰি বহু মূল্যবান বৈদ্যুতিক সামগ্ৰীও । মন্দিৰৰ সেৱকজনে মঙলবাৰে পুৱা ঘটনাস্থলীত উপস্থিত হৈ মন্দিৰৰ অৱস্থা প্ৰত্যক্ষ কৰি পৰিচালনা সমিতিক অৱগত কৰাৰ পিছতে তুলসীবাৰী আৰক্ষী চকীত চুৰিৰ ঘটনাটোৰ সন্দৰ্ভত এখন এজাহাৰ দাখিল কৰে । মন্দিৰ চৌহদত বিদ্যুতৰ যোগান ব্যাহত হৈ থকাৰ সুযোগতে দুৰ্বৃত্তই নিশাৰ ভাগত এনেদৰে তাণ্ডৱ চলাই অহাৰ অভিযোগ উত্থাপিত কৰিলে অঞ্চলটোৰ ৰাইজে ।