তিনিচুকীয়াত বোৱাৰীৰ ৰহস্যজনক মৃত্যুক লৈ চাঞ্চল্য

এগৰাকী বোৱাৰীৰ ৰহস্যজনক মৃত্যুক লৈ তিনিচুকীয়াত সৃষ্টি হৈছে চাঞ্চল্যৰ (Suspected murder in Tinsukia) ৷ তিনিচুকীয়াৰ মাকুম টুকুৰিজানৰ মনিকা শৰ্মা নামৰ এগৰাকী বোৱাৰীৰ মৃতদেহ উদ্ধাৰ হয় ৰহস্যজনকভাৱে ৷ ডুমডুমা দিয়ামুলি চাহ বাগিচাত সংঘটিত হয় এই চাঞ্চল্যকৰ ঘটনা । বিয়াৰ পিছৰে পৰা স্বামীগৃহৰ পৰিয়ালে বোৱাৰীগৰাকীক নানান অত্যাচাৰ কৰি অহাৰ অভিযোগ উত্থাপিত হৈছে৷ মাকুম টুকুৰিজানৰ নিৱাসী মনিকা শৰ্মাই যোৱা ৯ মাহৰ পূৰ্বে দিয়ামুলি চাহ বাগিচাৰ নিৱাসী তথা তাৰাজান চাহ বাগিচাৰ সহঃ পৰিচালক নৱীন শৰ্মা নামৰ ব্যক্তিজনৰ লগত বিবাহপাশত আৱদ্ধ হৈছিল । বিয়া হোৱাৰ পিছতেই স্বামীগৃহৰ পৰিয়ালে বিভিন্ন সময়ত বোৱাৰীগৰাকীক নানান অত্যাচাৰ কৰি অহাৰ অভিযোগ উত্থাপিত হৈছে । বৃহস্পতিবাৰে নিশা দিয়ামুলি চাহ বাগিচাৰ স্বামীগৃহত বোৱাৰীগৰাকীৰ ৰহস্যজনক মৃত্যু হয় । স্বামী গৃহৰ মতে এয়া আত্মহত্যা, কিন্তু বোৱাৰীগৰাকীৰ মাতৃৰ পৰিয়ালৰ লোকে এয়া হত্যাকাণ্ড বুলি অভিযোগ কৰিছে । ইতিমধ্যে মৃতদেহটো মৰণোত্তৰ পৰীক্ষাৰ বাবে তিনিচুকীয়া ককৰাতলিস্থিত মৰণোত্তৰ পৰীক্ষা গৃহলৈ প্ৰেৰণ কৰিছে । মৰণোত্তৰ পৰীক্ষাৰ পিছতহে পোহৰলৈ আহিব প্ৰকৃত ৰহস্য ।