চামগুৰিত নিৰ্বাচনী প্ৰচাৰ চলালে স্মৃতি ইৰাণীয়ে

প্ৰথম পৰ্যায়ত অনুষ্ঠিত হ’বলগীয়া নগাঁৱৰ চামগুৰি সমষ্টিত আৰম্ভ হৈছে হেভিৱেইট নিৰ্বাচনী প্ৰচাৰ । ৰকিবুল হুছেইনৰ দুৰ্গ হিচাপে পৰিচিত চামগুৰি সমষ্টিত শনিবাৰে বিজেপি প্ৰাৰ্থী অনিল শইকীয়াৰ হৈ নিৰ্বাচনী প্ৰচাৰ চলাই কেন্দ্ৰীয় মন্ত্ৰী স্মৃতি ইৰাণীয়ে । শনিবাৰে বিয়লি চামগুৰিৰ আমবাগান উচ্চতৰ মাধ্যমিক বিদ্যালয়ৰ খেলপথাৰত হেলিকপ্তাৰ লৈ অৱতৰণ কৰাৰ পিছত কেন্দ্ৰীয় মন্ত্ৰী স্মৃতি ইৰাণীক উষ্ম আদৰণি জনালে মন্ত্ৰী কেশৱ মহন্তসহ চামগুৰিৰ বিজেপি প্ৰাৰ্থী অনিল শইকীয়াই ৷ এই নিৰ্বাচনী প্ৰচাৰত অংশগ্ৰহণ কৰে সমষ্টিটোৰ একাংশ নেতা-কৰ্মীয়ে । চামগুৰিত প্ৰায় 2000 ৰাইজৰ উপস্থিতিত এক বিশাল জনসভা সম্বোধন কৰে স্মৃতি ইৰাণীয়ে । ৰকিবুল হুছেইনৰ দুৰ্গস্বৰূপ চামগুৰি সমষ্টিত এইবাৰ পদুম ফুল ফুলিবই বুলি ভাষণ প্ৰসংগত উল্লেখ কৰে কেন্দ্ৰীয় মন্ত্ৰী গৰাকীয়ে । লগতে বিজেপিয়ে ৰাইজৰ সুবিধাৰ্থে মুকলি কৰা আঁচনিৰ বিষয়েও ৰাইজক অৱগত কৰে কেন্দ্ৰীয় মন্ত্ৰী স্মৃতি ইৰাণীয়ে ।