হাট-বজাৰৰ ব্যৱসায়ীৰ মাজত নিৰ্বাচনী প্ৰচাৰ চলালে কৃষ্ণ গগৈয়ে

30 অক্টোবৰত ৰাজ্যৰ পাঁচটা সমষ্টিত অনুষ্ঠিত হ’বলগীয়া উপ নিৰ্বাচনৰ প্ৰচাৰ সমাপ্ত হ’ব 27 অক্টোবৰত ৷ ইতিমধ্যেই আটাইকেইটা সমষ্টিতে দলীয় প্ৰক্ষেপিত প্ৰাৰ্থীক জয়যুক্ত কৰাৰ লক্ষ্যৰে প্ৰচাৰত নামি পৰিছে প্ৰতিটো ৰাজনৈতিক দল ৷ ইতিমধ্যে উপ নিৰ্বাচনৰ বাবে আটাইতকৈ গুৰুত্বপূৰ্ণ সমষ্টি হিচাপে বিবেচিত হৈ পৰা থাওৰা সমষ্টিটো শাসক-বিৰোধীৰ লগতে ব্যতিক্ৰমী ৰূপত প্ৰচাৰ চলাইছে চিপিআই প্ৰাৰ্থী কৃষ্ণ গগৈয়ে ৷ খেতি পথাৰ, মিচিং গাঁও নহয়, এইবাৰ হাত-বজাৰৰ ব্যৱসায়ীৰ মাজত দেখা গ’ল থাওৰা সমষ্টিৰ চিপিআই প্ৰাৰ্থী কৃষ্ণ গগৈক ৷ পদপথৰ কাষৰ ব্যৱসায়ীসকলৰ মাজত নিৰ্বাচনী প্ৰচাৰ চলালে প্ৰাৰ্থীগৰাকীয়ে ৷ বিজেপিৰ একনায়কত্ববাদ আৰু মূল্যবোধহীন ৰাজনীতিৰ বিৰুদ্ধে এইবাৰ সমষ্টিবাসীয়ে ভোটদান কৰিব বুলি আশাবাদী প্ৰাৰ্থীগৰাকী ৷ মূল্যবৃদ্ধিয়ে ৰাইজক কোঙা কৰাৰ সময়ত ৰাইজক সকাহ প্ৰদান কৰিব নোৱাৰা চৰকাৰখনে উন্নয়নৰ ভূৱা প্ৰচাৰ চলোৱা বুলি অভিযোগ কৰে চিপিআই দলৰ প্ৰাৰ্থীগৰাকীয়ে ৷