নগাঁৱৰ লাংগীয়াত চোৰাং গৰুসহ ৩ সৰবৰাহকাৰীক আটক

ধুবুৰীৰ পিছত এইবাৰ নগাঁৱত সৰবৰাহকাৰীয়ে আৰম্ভ কৰিছে গৰুৰ অবৈধ সৰবৰাহ । জিলাখনত ধাৰাবাহিকভাৱে আৰক্ষীৰ জালত পৰিছে গৰু সৰবৰাহকাৰী । জিলাখনৰ লক্ষ্মীনগৰৰ পিছত এইবাৰ ধিঙৰ লাংগীয়াত আৰক্ষীয়ে অভিযান চলাই জব্দ কৰে ৫টা গৰু । আৰক্ষীৰ জালত পৰে তিনি গৰু সৰবৰাহকাৰী । গোপন সূত্ৰৰ পৰা তথ্য লাভ কৰাৰ পাচতে ডুমডুমীয়া আৰক্ষীয়ে ধিঙৰ লাংগীয়াত অভিযান চলায় । এই অভিযানতে আৰক্ষীয়ে চোৰাং গৰুসহ ছহৰ উদ্দিন, তফাজ্জুল ইছলাম আৰু আজাহাৰ উদ্দিনক আটক কৰে । সৰবৰাহকাৰীকেইটা দীৰ্ঘ দিন ধৰি বিভিন্ন অপৰাধজনিত কাৰ্যৰ লগতে গৰুৰ চোৰাং বেহাৰে জড়িত হৈ আছিল বুলি আৰক্ষীয়ে জানিবলৈ দিছে । আৰক্ষীয়ে জনোৱা মতে, ধৃত সৰবৰাহকাৰীকেইটাই বাংলাদেশৰ পৰা অবৈধভাৱে গৰুকেইটা সৰবৰাহ কৰি আনিছে । দীৰ্ঘদিন ধৰি এই চক্ৰটোৱে বাংলাদেশৰ পৰা এনেদৰে চোৰাংভাৱে গৰু সৰবৰাহ কৰি অহা বুলি জানিবলৈ দিছে আৰক্ষীয়ে । ইতিমধ্যে আৰক্ষীয়ে চোৰাং গৰু সৰবৰাহকাৰীকেইটাৰ বিৰুদ্ধে গোচৰ ৰুজু কৰিছে । লগতে তিনিওকে জেল হাজোতলৈ প্ৰেৰণ কৰিব বুলি আৰক্ষীয়ে জানিবলৈ দিছে । উল্লেখ্য যে, দেওবাৰে নিশা নগাঁও চহৰৰ লক্ষ্মীনগৰৰ পৰা আৰক্ষীয়ে ৮টা চোৰাং গৰুসহ এখন টাটা মেজিক বাহন জব্দ কৰিবলৈ সক্ষম হয় । জিলাখনত একাংশ অসাধু লোকে প্ৰশাসনৰ নিৰ্দেশক ভ্ৰূক্ষেপ নকৰি এনেদৰে গৰুৰ চোৰাং বেহা চলাই আহিছে ।