তামুলপুৰ সমষ্টিত ভোটদান শান্তিপূৰ্ণ : ভোটদানৰ হাৰ ৬৮ শতাংশ

ৰাজ্যৰ আন চাৰিটা বিধানসভা সমষ্টিৰ লগতে বাক্সা জিলাৰ ৫৮ নং তামুলপুৰ বিধানসভা সমষ্টিত অনুষ্ঠিত হোৱা উপ-নিৰ্বাচনত ভোটগ্ৰহণ প্ৰক্ৰিয়া শান্তিপূৰ্ণভাৱে সামাপ্ত হয় ৷ সন্ধিয়া ৫ বজালৈ ভোটদানৰ হাৰ ৬৮ শতাংশ বুলি জিলা উপায়ুক্তই সাংবাদিকক জনায় ৷ আজিৰ সমগ্ৰ ভোটদান প্ৰক্ৰিয়াত সমষ্টিটোৰ ভোটাৰ ৰাইজে জিলা প্ৰশাসনৰ নিৰ্দেশমৰ্মে ক'ভিড প্ৰট'কল মানি চলাৰ লগতে শাৰী পাতি শৃংখলাৱদ্ধভাৱে ভোটদান প্ৰক্ৰিয়াত অংশ লোৱা পৰিলক্ষিত হয় ৷ ভোটদানৰ সময়ত স্বাস্থ্য বিভাগৰ কর্মচাৰীয়ে ভোটাৰসকলক কভিড প্রট’কল অনুসৰি প্রথমতে থার্মেল মেচিনেৰে শৰীৰৰ উষ্ণতা জোখাৰ লগতে হেণ্ড ছেনিটাইজাৰৰ ব্যৱস্থা কৰে ৷ লগতে মাস্ক পৰিধান নকৰা ভোটাৰসকলক মাস্ক প্রদান কৰে স্বাস্থ্য বিভাগে ৷ সমষ্টিটোৰ মুঠ ছয় গৰাকী প্ৰাৰ্থীৰ ওপৰত অনুষ্ঠিত হয় উপ-নিৰ্বাচনৰ ভোটগ্ৰহণ ৷