Man Elephant Conflict: সোণাৰিত বন্যহস্তীৰ তাণ্ডৱত কথমপি প্ৰাণৰক্ষা মাতৃ কন্যাৰ

মৰাণ, 6 ফেব্ৰুৱাৰী: ৰাজ্যত দিনক দিনে বৃদ্ধি হৈছে হাতী মানুহৰ সংঘাত (Man Elephant Conflict) ৷ ৰাজ্যৰ ভিন্ন প্ৰান্তত ইটোৰ পিছত সিটো বন্যহস্তীৰ আক্ৰমণৰ ঘটনাই প্ৰতিদিনে বাতৰিৰ শিৰোনাম দখল কৰি আহিছে (Man Elephant Conflict at Sonari) ৷ এইবাৰ চৰাইদেউ জিলাৰ সোণাৰিত পুনৰ বনৰীয়া হাতীৰ তাণ্ডৱে ৰাইজৰ টোপনি হৰিছে (Wild Elephant Terror at Sonari) ৷ 

সোণাৰিৰ খামলুং কৈলাশ বস্তিত দেওবাৰে নিশা হাতীয়ে ঘৰ দুৱাৰ ভাঙি লণ্ড-ভণ্ড কৰাৰ লগতে খেতিপথাৰ নষ্ট কৰে ৷ হাতীৰ উপদ্ৰৱত কথমপি প্ৰাণৰক্ষা পৰে মালতী ক্ষেত্ৰপালৰ দুজনীয়া পৰিয়ালটো ৷ ভুক্তভোগী পৰিয়ালটোৱে সংবাদমাধ্যমৰ আগত কয় যে কেৱল এইবাৰেই নহয় ইয়াৰ পূৰ্বেও পাঁচবাৰকৈ বন্যহস্তীয়ে আক্ৰমণ কৰি আহিছে পৰিয়ালটোক ৷ 

প্ৰতিবাৰেই হাতীয়ে ভাঙি থৈ যোৱাৰ পিচত তেওঁলোকে নতুনকৈ ঘৰ নিৰ্মাণ কৰে যদিও হাতীৰ আক্ৰমণৰ পৰা সাৰিব পৰা নাই ৷ এতিয়া প্ৰাণৰ সংশয়ত ভুগিছে পৰিয়ালটো ৷ কোনোবা দিনা হাতীৰ আক্ৰমণত প্ৰাণ হেৰুৱাব লগা হ’ব পাৰে বুলি আতংকিত হয় দুজনীয়া পৰিয়ালটো ৷  

অভয়পুৰ সংৰক্ষিত বনাঞ্চলৰ পৰা খাদ্যৰ সন্ধানত ওলাই অহা হাতীয়ে অঞ্চলটোত প্ৰতিদিনে উপদ্ৰৱ  চলাই আহিছে ৷ উক্ত অঞ্চলৰ সমীপতে কিছুদিন পূৰ্বে হাতীৰ আক্ৰমণত প্ৰাণ গৈছিল দুজন লোকৰ ৷ দীৰ্ঘদিন ধৰি এই অঞ্চলৰ লগতে সোণাৰিৰ দাঁতিকাষৰীয়া অঞ্চলত বন্যহস্তীৰ জাকে সন্ত্ৰাস চলাই আহিছে ৷  

ইয়াৰ পিচতো হাতীক নিয়ন্ত্ৰণ কৰাত বন বিভাগ ব্যৰ্থ হোৱাত ক্ষোভ প্ৰকাশ কৰিছে স্থানীয় ৰাইজে ৷ প্ৰতি বছৰে বনৰীয়া হাতীয়ে এই অঞ্চলৰ ঘৰ ভাঙি ৰাইজক ক্ষতি কৰিছে যদিও আজি পৰ্যন্ত কোনো ক্ষতিপূৰণ ৰাইজে লাভ নকৰাৰ অভিযোগ উত্থাপন কৰে ভুক্তভোগী ৰাইজে ৷ উল্লেখ্য যে বিগত 2022  বৰ্ষত চৰাইদেউৰ সোণাৰিত বনৰীয়া হাতীৰ আক্ৰমণত কেইবাজনৰো মৃত্যু হৈছে ৷ ইয়াৰ সমান্তৰালভাৱে দুটাকৈ হাতী বিদ্যুৎপৃষ্ট হৈ মৃত্যৰ মুখত পৰিছে ৷

স্মৰ্তব্য যে খাদ্যৰ সন্ধানত বনাঞ্চলৰ পৰা প্ৰায়ে জনাঞ্চলত প্ৰৱেশ কৰে ভোকাতুৰ বন্যহস্তীয়ে ৷ ভিন্ন সময়ত ৰাজ্যজুৰি  ঘৰ-দুৱাৰ-ভঁড়াল ভাঙি, ধান, চাউল, সা-সম্পত্তি নষ্ট কৰাৰ লগতে আতংকৰ সৃষ্টি কৰিছে বন্যহস্তীয়ে ৷

লগতে পঢ়ক: Drugs Seized in Tezpur: তেজপুৰত একে নিশাই ড্ৰাগছসহ 8 সৰবৰাহকাৰীক গ্ৰেপ্তাৰ