ডাম্পাৰ ভাড়ালৈ দিয়াৰ প্ৰলোভনেৰে দুৰ্বৃত্তই তিনি ব্যক্তিৰ পৰা কাঢ়ি লৈ গ’ল নগদ ধনসহ মোবাইল

নগাঁও, 23 নৱেম্বৰ : নগাঁৱৰ ৰূপহীহাটত চাঞ্চল্যকৰ ঘটনা । 12 জনীয়া দুৰ্বৃত্তৰ দলে তিনি ব্যক্তিৰ পৰা লুটি নিলে প্ৰায় তিনি লক্ষাধিক টকা । ঘটনা অনুসৰি, তেজপুৰ জামুগুৰিৰ তিনিজন লোকে ৰূপহীহাটৰ পৰা ডাম্পাৰ ভাড়ালৈ ল’বলৈ আহিছিল ৷ কিন্তু ডাম্পাৰ ভাড়ালৈ দিয়াৰ প্ৰলোভনেৰে তিনি ব্যক্তিক জামুগুৰিৰ পৰা ৰূপহীহাটলৈ মাতি আনিছিল দুৰ্বৃত্তই ৷ তাৰ পাচতে দুৰ্বৃত্তই মাৰধৰ কৰাৰ লগতে পিষ্টল মূৰত থৈ তিনি ব্যক্তিৰ পৰা কাঢ়ি লৈ যায় সোণৰ আঙুঠি আৰু নগদ ধন ৷ 

এই সন্দৰ্ভত ভুক্তভোগী লোককেইজনে কয়, ‘‘এন এইচ পি চিত ডাম্পাৰৰ প্ৰয়োজন হোৱৰ বাবে ৰূপহীহাটৰ এজন ব্যক্তিৰ সৈতে আমি যোগাযোগ কৰিছিলোঁ ৷ সেই অনুসৰি আমি ডাম্পাৰখন চাবলৈ আহিছিলো ৰূপহীহাটলৈ ৷ আমি ফোনত কথা পতা ব্যক্তিজনক লগ পোৱাৰ পাচত ভাড়ালৈ দিব লগা ডাম্পাৰখন চাবলৈ আমি বিচাৰিলো ৷ তেওঁ প্ৰথমে আমাক তেওঁলোকৰ ঘৰলৈ লৈ গ’ল চাহ খাবলৈ ৷ কিন্তু চাহ খাই থকাৰ সময়তে 12 জনীয়া দুৰ্বৃত্তৰ দলে ঘৰটোত প্ৰৱেশ কৰে ৷ লগতে আমাৰ মূৰত পিষ্টল ৰাখি আমি নিয়া নগদ ধন কাঢ়ি লৈ যায় দুৰ্বৃত্তৰ দলটোৱে ৷’’

লগতে পঢ়ক:অভি-নীল হত্যাকাণ্ডৰ সাক্ষ্যগ্ৰহণ সম্পূৰ্ণ