সুৰামত্ত বাইক চালকৰ খুন্দাত থিতাতে মৃত্যু শাকপাচলি বেপাৰীৰ

শিলচৰ, 10 জানুৱাৰী: নিশা শিলচৰৰ মণিপুৰ ৰাষ্ট্ৰীয় ঘাইপথৰ মধুৰাপুলত সংঘটিত হৈছে এক ভয়ংকৰ পথ দুৰ্ঘটনা । বাইকৰ খুন্দাত থিতাতে মৃত্যু গটিছে এগৰাকী শাক-পাচলি বিক্ৰেতাৰ । নিহত লোকজনৰ নাম নজৰুল হক বৰভূঞা বুলি জানিব পৰা গৈছে ।

নিহত লোকজনৰ ঘৰ কাছাৰৰ কাশিপুৰত । জানিব পৰা মতে, নজৰুল হক নামৰ লোকজনে প্ৰতিদিনৰ দৰে মংগলবাৰেও শাকপাচলি বিক্ৰী কৰিবলৈ শিলচৰলৈ গৈছিল । নিশা শাক-পাচলি বিক্ৰী কৰি ঠেলাগাড়ী লৈ খোজকাঢ়ি ঘৰলৈ উভতি অহাৰ সময়তে শিলচৰৰ মণিপুৰ ৰাষ্ট্ৰীয় ঘাইপথৰ মধুৰাপুলত পিছপিনৰ পৰা অহা এখন দ্ৰুতবেগী বাইকে খুন্দা মাৰে নজৰুল হক নামৰ শাক-পাচলি বেপাৰীজনক । ফলত ঘটনাস্থলীতে মৃত্যু ঘটে নজৰুল হক নামৰ লোকজনৰ । 

ভয়ংকৰ এই দুৰ্ঘটনাৰ পাছত আৰক্ষী ঘটনাস্থলীত উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজলৈ প্ৰেৰণ কৰে । লগতে বাইক সহ বাইক চালকক আটক কৰি থানালৈ লৈ যায় । ইপিনে মৃতকৰ পৰিয়ালৰ অভিযোগ, বাইক চালকজন সুৰামত্ত অৱস্থাত আছিল বুলি । 

সুৰাপান কৰি বাইক চলোৱাৰ বাবেই এই দুৰ্ঘটনা সংঘটিত হৈছে বুলি অভিযোগ কৰে মৃতকৰ পৰিয়ালৰ লোকসকলে ।

লগতে পঢ়ক: গোলাঘাটত তীব্ৰবেগী ডাস্পাৰে মহতিয়াই নিলে চাইকেল আৰোহীক