Fire in Rangia: ৰঙিয়াৰ হিৰাগাটাত বিধ্বংসী অগ্নিকাণ্ড

ৰঙিয়া,২৭ জুন: ৰঙিয়াৰ হিৰাগাটাত বিধ্বংসী অগ্নিকাণ্ড । বাসগৃহসহ চাৰিখন দোকান ভস্মীভূত । জুইত জাহ গ'ল মৰণা মৰা যন্ত্ৰ, লক্ষাধিক টকাৰ ধান, সৰিয়হসহ চাৰিখন ব্যৱসায়িক প্ৰতিষ্ঠানৰ কেইবা লক্ষাধিক টকাৰ সা-সামগ্ৰী । ঘটনাৰ বিৱৰণী অনুসৰি মঙ্গলবাৰে দিনৰ ভাগত হিৰাগাটাৰ চাৰি চকৰ নিবাসী মিৰেল কুদ্দুচৰ গৃহত অগ্নিকাণ্ডৰ সূত্ৰপাত হয় ।  

মুহুৰ্ততে দপদপাই জুই জ্বলি চাৰিওফালে ছানি ধৰে । স্থানীয় লোকসকলে বালি, পানী ছটিয়াই জুই নিৰ্বাপন কৰিবলৈ অশেষ চেষ্টা কৰিও বিফল হয় । যাৰফলত দুটা কোঠালীসহ চাৰিখনকৈ দোকান ভস্মীভূত হয় । পিছত ঘটনাস্থলীত উপস্থিত হৈ অগ্নিনিৰ্বাপক বাহিনীয়ে কোনোমতে জুই নিৰ্বাপন কৰিবলৈ সক্ষম হয় ।  

অগ্নিকাণ্ডৰ ফলত পৰিয়ালটো সৰ্বস্বান্ত হয় । এই অগ্নিকাণ্ডৰ বাবে অঞ্চলটোত এক আতংকময় পৰিৱেশৰ সৃষ্টি হয় । ইফালে অগ্নিকাণ্ডত সৰ্বস্বান্ত হোৱা ভুক্তভোগী পৰিয়ালৰ হিয়াভগা কান্দোন । ওচৰত থকা কেইবাটাও পৰিয়ালৰ বাসগৃহ কোনোমতে ৰক্ষা পৰে । বৰ্তমানেও জানিব পৰা হোৱা নাই অগ্নিকাণ্ডৰ স্পষ্ট কাৰণ । 

লগতে পঢ়ক: Constituency Delimitation 2023: মুখ্যমন্ত্ৰীক ক্ষুৰধাৰ সমালোচনা CPIM ৰ