Fake journalist arrested: ধন দাবীৰ অভিযোগত আটক দুই ভুৱা সাংবাদিক

ফেচবুককে ধৰি বিভিন্ন সামাজিক মাধ্যমত পেজ খুলি নিজকে স্বয়ম্ভু সাংবাদিক বুলি পৰিচয় দি একাংশ জড়িত হৈ পৰিছে ব্লেকমেইল, ধন দাবীকে আদি কৰি বিভিন্ন অনৈতিক কাৰ্যত ৷ শেহতীয়াকৈ তেনে এক ঘটনাই পোহৰলৈ আহিছে ৰূপহীহাটত ৷ ধন দাবী কৰাৰ অভিযোগত আটক হ’ল দুই ভুৱা সাংবাদিক (So called journalists arrested for extorting money) ৷ আটকাধীন সাংবাদিক দুজন ৰূপহীহাট থানাৰ অন্তৰ্গত কুমাৰ গাঁৱৰ ৱাইজুদ্দিন আৰু বৰপেটা গাঁৱৰ ফুৰকানুল ইছলাম বুলি জানিব পৰা গৈছে ৷ উল্লেখ্য যে, ফুৰকানৰ বিৰুদ্ধে পূৰ্বেও বহুকেইটা অপৰাধমূলক কাৰ্যত জড়িত হৈ থকাৰ অভিযোগত গোচৰ ৰুজু হৈ থকা বুলি জানিব পৰা গৈছে । শেহতীয়াকৈ বিভিন্ন অনৈতিক কাৰ্যকলাপৰ ইতিহাস ঢাকিবলৈকে ফুৰকানে বাছি লৈছিল সাংবাদিকতাৰ পেছা । ইয়াৰ পাছতেই বিভিন্নজনক ধন দাবী কৰি ধন ঘটাৰ আন এক কৌশল গ্ৰহণ কৰিলে লগৰীয়া ৱাইজুদ্দিন আৰু ধুৰন্ধৰ ফুৰকানে । পিছে এশ গৰু মাৰিলে বাঘৰো মৰণ ৷ উক্ত আপ্ত বাক্যশাৰীয়েই প্ৰযোজ্য হ'ল তিনিমহীয়া এই স্বয়ম্ভু সাংবাদিক দুজনৰ ক্ষেত্ৰত । অৱশেষত ৰূপহীৰ নতুন বজাৰৰ এখন দোকানত ধন দাবী কৰি আটক হ'ল এই দুই ভুৱা সাংবাদিক ।