মহানগৰীত ৰহস্যজনক অৱস্থাত মৃতদেহ উদ্ধাৰ, কোঠাৰ ভিতৰত তেজৰ চেঁকুৰা

গুৱাহাটী, 12 ডিচেম্বৰ: গুৱাহাটীৰ লাচিত নগৰত ৰহস্যজনক অৱস্থাত এজন লোকৰ মৃতদেহ উদ্ধাৰ কৰা হৈছে । বাসগৃহৰ মজিয়াত পৰি থকা অৱস্থাত উদ্ধাৰ হৈছে ৰূপম গোস্বামী নামৰ লোকজনৰ মৃতদেহ । দীৰ্ঘদিন ধৰি ঘৰটোত অকলে বাস কৰিছিল গোস্বামীয়ে। বহুদিন পূৰ্বেই তেওঁক পত্নীয়ে এৰি থৈ গৈছিল। তেওঁৰ একমাত্ৰ পুত্ৰ সন্তান থাকে বহিঃৰাজ্যত । 

প্ৰত্যক্ষদৰ্শীৰ মতে, সোমবাৰৰে পৰা ৰূপম গোস্বামীক দেখা নাছিল তেওঁৰ ভাৰাঘৰত থকা ভাৰাতীয়াই। ইয়াৰ পিচতে সোমবাৰে পুৱা প্ৰায় 10 বজালৈকে লোকজনক নেদেখাত দুৱাৰত টুকুৰিয়াই মাতিছিল ভাৰাতীয়া লোকে ৷ কিন্তু লোকজনে দুৱাৰত খুলি নিদিয়াত আৰক্ষীক খবৰ দিয়ে। 

ঘটনাস্থলীত আৰক্ষী উপস্থিত হৈ ঘৰটোৰ দুৱাৰ খুলি ঘৰৰ মজিয়াত পৰি থকা অৱস্থাত উদ্ধাৰ কৰে ৰূপম গোস্বামীৰ মৃতদেহটো । ইফালে কোঠাটোৰ ভিতৰৰ মজিয়া আৰু বিচনাত তেজৰ চেঁকুৰাও প্ৰত্যক্ষ কৰিছে আৰক্ষীয়ে ৷ অৱশ্য়ে লোকজনৰ মৃত্যুৰ কাৰণ বৰ্তমানলৈ গম পোৱা নাই ৷ আৰক্ষীৰ তদন্ততহে পোহৰলৈ আহিব মৃত্যুৰ প্ৰকৃত কাৰণ ৷

লগতে পঢ়ক: জঘন্য ! মহিলাক বিবস্ত্ৰা কৰি পেৰেড, বিদ্যুতৰ খুঁটাত বান্ধি প্ৰহাৰ