ডুমডুমা,21মেঃ ডুমডুমাত প্ৰধানমন্ত্ৰী গ্ৰাম চড়ক যোজনাৰ পথ নিৰ্মাণত অনিয়মৰ অভিযোগ । উক্ত ঘটনাৰ বিৰুদ্ধে তিনিঘন্টীয়া অৱস্থান ধৰ্মঘট কাৰ্যসূচী ৰূপায়ন স্থানীয় ৰাইজৰ ।
লক ডাউনৰ মাজতেই তিনিচুকীয়াৰ ডুমডুমাত প্ৰধানমন্ত্ৰী গ্ৰাম চড়ক যোজনাৰ পথ নিৰ্মাণত দূৰ্নীতিৰ অভিযোগ উত্থাপিত হৈছে । উল্লেখ্য যে, কাকজান গাওঁ পঞ্চায়তৰ চুকৰেটিং-শীতলপাটী গাঁৱৰ বাবে অনুমোদন হোৱা পথ বৰডুবি গাওঁ পঞ্চায়তত নিৰ্মাণ কৰাক কেন্দ্ৰ কৰি বৃহস্পতিবাৰে তিনিঘন্টীয়া অৱস্থান ধৰ্মঘট কাৰ্যসূচী ৰূপায়ণ কৰি প্ৰতিবাদ সাব্যস্ত কৰে স্থানীয় লোকসকলে । প্ৰধানমন্ত্ৰী গ্ৰাম চড়ক যোজনাৰ অধীনত ৩,৪৯,৫৫,৪৭১ টকা ব্যয় সাপেক্ষে চুকৰেটিং-শীতলপাটী গাঁৱত নিৰ্মাণ হ'বলগীয়া পথটোৰ প্ৰথমে জোখ-মাপ কৰিছিল যদিও পৰৱৰ্তী সময়ত আচৰ্যজনকভাৱে বৰডুবি গাওঁ পঞ্চায়তৰ বাদলাভেটা চাহ বাগিছাত পথটোৰ নিৰ্মাণ কাৰ্য আৰম্ভ কৰে ।
একাংশ ৰাজনৈতিক ব্যক্তিৰ লগতে ঠিকাদাৰে কু-চক্ৰান্তৰে পথটো অন্য স্থানত নিৰ্মান কৰিবলৈ লোৱা বুলি গুৰুতৰ অভিযোগ কৰিছে স্থানীয় ৰাইজে । অন্যহাতে, ঠিকাদাৰ উৎপল বৰদলৈ আৰু লালন মৰাণৰ বিৰুদ্ধে প্ৰসাশনক অতি শীঘ্ৰে বিহিত ব্যৱস্থা গ্ৰহণ কৰিবলৈ দাবী জনাইছে ৰাইজে ৷ লগতে চুকৰেটিং-শীতলপাটী গাঁৱৰ পথটো নিৰ্মাণৰ ব্যৱস্থা নকৰিলে জংগী আন্দোলনৰ কাৰ্যসূচী গ্ৰহণ কৰাৰ কথা জনাইছে স্থানীয় লোকসকলে ।
লগতে পঢ়ক- তৈলক্ষেত্ৰ ব্যক্তিগতকৰণৰ বিৰোধিতা বীৰ লাচিত সেনাৰ
