ডুমডুমা,3 ফেব্ৰুৱাৰীঃ নাগৰিকত্ব সংশোধনী আইনৰ বিৰুদ্ধে প্ৰতিবাদমুখৰ হৈ আছে সমগ্ৰ ৰাজ্য ৷ আইনখন বাতিলৰ দাবীত ডুমডুমাত আছুৰ মানৱ শৃংখল । ডুমডুমা আঞ্চলিক ছাত্ৰ সন্থাৰ উদ্যোগত আৰু ডুমডুমাৰ বিভিন্ন জাতীয় আৰু জনগোষ্ঠীয় সংগঠনৰ সহযোগত ডুমডুমা নগৰৰ মাজ মজিয়াত আছুৱে সাব্যস্ত কৰে প্ৰতিবাদ ৷ উক্ত প্ৰতিবাদী কাৰ্যসূচীত ডুমডুমা অঞ্চলৰ কেইবাখনো বিদ্যালয়-মহাবিদ্যালয়ৰ ছাত্ৰ-ছাত্ৰীৰ লগতে বহুসংখ্যক লোকে অংশগ্ৰহণ কৰে ৷ "কা" বিৰোধী আন্দোলনত গ্ৰেপ্তাৰ হোৱা নেতাসকলৰ মুক্তিৰ দাবী উত্থাপন কৰে প্ৰতিবাদকাৰীসকলে ৷
কামপুৰঃ ডুমডুমাৰ সমান্তৰালকৈ বঢ়মপুৰৰ কামপুৰতো নাগৰিকত্ব সংশোধনী আইনৰ বিৰুদ্ধে খিলঞ্জীয়া সংগ্ৰামী ঐক্য মঞ্চৰ অৱস্থান ধৰ্মঘট ৷ সোমবাৰে কামপুৰ খিলঞ্জীয়া সংগ্ৰামী ঐক্য মঞ্চই কামপুৰ ৰাজহ চক্ৰ কাৰ্যালয়ৰ সন্মুখত আইনখন বাতিলৰ দাবীত প্ৰতিবাদ সাব্যস্ত কৰে ৷ অখিল গগৈকে ধৰি কাৰাবন্দী হৈ থকা সকলো প্ৰতিবাদকাৰীকে অনতিপলমে মুক্তিৰ দাবীৰে কামপুৰ ৰাজহ চক্ৰৰ চক্ৰ বিষয়াৰ জৰিয়তে ৰাজ্যপাললৈ এখন স্মাৰক পত্ৰ প্ৰদান কৰে কামপুৰ খিলঞ্জীয়া ঐক্য মঞ্চই ৷
লগতে পঢ়ক-বাজেট ২০২০—কি যে এক হতাশা!
