তেজপুৰ, ৩০ আগষ্ট : তেজপুৰত উত্তৰ অসম বন্য প্ৰাণী সংৰক্ষণ কাৰ্য্যালয়ৰ নেতৃত্বত চলা এক গোপন অভিযানত উদ্ধাৰ হৰিণাৰ ছাল(barking deer skin) আৰু অন্যান্য বন্য প্ৰাণীৰ দেহৰ আপত্তি জনক সামগ্ৰী । গোপন সূত্ৰৰ পম খেদি, তেজপুৰ বাৰীকা চুবুৰীত এজন ব্যক্তিৰ ঘৰৰ পৰা হৰিণাৰ ছাল উদ্ধাৰ কৰাৰ লগতে লোক জনক গ্ৰেপ্তাৰ কৰি আৰক্ষীক গতাই দিয়ে ।
নৰডাৰ্ণ ৰেঞ্জৰ বন্য প্ৰাণী বিভাগৰ বিষয়া দেবাশীষ বৰগোহাঞিৰ নেতৃত্বত অসম আৰক্ষীৰ এটা দলৰ সহযোগিতাত বন বিভাগে ৰাজা আলি নামৰ লোক জনক গ্ৰেপ্তাৰ কৰে । প্ৰাথমিক তদন্তত বন বিভাগৰ আগত লোকজনে জনায় যে, তেওঁৰ সঘনাই অৰুণাচল প্ৰদেশলৈ আহ-যাহ আছে আৰু চুবুৰীয়া ৰাজ্যখনৰ পৰাই এই সামগ্ৰী সমূহ তেওঁ আনি থৈছে ৷
অৱশ্যে, বিষয়টো সন্দৰ্ভত আৰক্ষীয়ে এতিয়াও তদন্ত অব্যাহত ৰাখিছে ৷
আনহাতে, বন বিভাগে জনোৱা মতে চোৰাং ভাৱে চিকাৰ( poaching) নকৰাকৈ এই সামগ্ৰী সমূহ লাভ কৰা সম্ভৱ নহ’য় ৷ মন কৰিব লগীয়া বিষয় যে, বন্যপ্ৰাণী সুৰক্ষা আইন 1972(Wild life protection act 1972) ৰ অধীনত উল্লেখ থকা যিকোনো ধৰণৰ জীৱ-জন্তুৰ হত্যাই আইন মতে দণ্ডনীয় ৷
লগতে পঢ়ক : বানৰ মাজতে পোৱালি সহ নিমাতিত গজৰাজৰ মুক্ত বিচৰণ
