তেজপুৰ,২ ডিচেম্বৰ : ভাৰতীয় সেনাই ২৭ দিনত সম্পূৰ্ণ কৰা মণিপুৰৰ টামেংলং জিলাৰ তোবাম গাঁৱৰ এখন অত্যন্ত গুৰুত্বপূৰ্ণ দলঙৰ বুধবাৰে শুভ উদ্বোধন কৰে মণিপুৰৰ মুখ্যমন্ত্ৰী এন বীৰেন সিঙে । যোৱা ১ নৱেম্বৰত এখন বালি ভৰ্তি ট্ৰাক এই দলং ভাঙি ইৰাং নদীত সোমাই পৰাত চালকজন থিতাতে মৃত্যু হৈছিল । এই দলংখন 37 নং ৰাষ্ট্ৰীয় ঘাই পথেৰে ৰাজধানী ইম্ফল সংযোগী অতি জৰুৰী দলং ।
যাতায়তৰ বাবে প্ৰয়োজনীয়তা সাপেক্ষে ৰাজ্য চৰকাৰৰ তৰফৰ পৰা সেনাৰ ছপীয়েৰ কৰ্পছক দায়িত্ব দিয়াত যুদ্ধকালীন প্ৰস্তুতিৰে ২৭ দিনৰ ভিতৰতে সম্পূৰ্ণ কৰিলে নিৰ্মাণৰ কাম ৷ বুধবাৰে মুখ্যমন্ত্ৰী এন বীৰেন সিঙে অনুষ্ঠানিকভাবে ৰাইজৰ বাবে মুকলি কৰে দলংখন । তেওঁ সেনাৰ এই পদক্ষেপক প্ৰশংসা কৰে । সেনাৰ কাৰিকৰী বিভাগে বিগত ৯ নৱেম্বৰত এই দলংখন নিৰ্মাণৰ বাবে কাম হাতত লৈছিল ৷ উল্লেখ্য যে, সীমান্ত পথ সুৰক্ষা সংস্থা তেজপুৰে আৰু দুটা দিনত এখন বেইলি দলং সম্পূৰ্ণ কৰি কাষেৰে অহা-যোৱা কৰিবলৈ সুবিধা প্ৰদান কৰিছিল ।
লগতে পঢ়ক : সম্পূৰ্ণ ধৰ্মীয় পৰম্পৰাৰে মৰাণত আৰম্ভ হৈছে অসম দিৱস
