তেজপুৰ,৩০ নৱেম্বৰ : উত্তৰ-পূৰ্বাঞ্চলৰ অন্যতম ৰাজ্য অৰুণাচল প্ৰদেশৰ ৰাইজৰ বাবে এক গৌৰৱৰ খবৰ । শেহতীয়াকৈ অৰুণাচলৰ জিৰো উপত্যকাৰ খেতিপথাৰত উৎপাদিত কিৱি ফলে লাভ কৰিছে জৈৱিক প্ৰমাণ পত্ৰ । নতুন দিল্লীত অনুষ্ঠিত 'আদি মহোৎসৱ'ত মুকলি কৰা হয় ভাৰতৰ প্ৰথম এই জৈৱিক কিৱি ফল (certified organic kiwi launched in New Delhi)।
উল্লেখ্য যে উত্তৰ-পূৰ্বাঞ্চলৰ বাবে থকা বিশেষ আঁচনি মিছন জৈৱিক মূল্য শৃংখলা বিকাশৰ অধীনত (MOVCD-NER) কিৱি ফলৰ বাবে জৈৱিক প্ৰমাণপত্ৰ লাভ কৰা প্ৰথম খন ৰাজ্য হৈছে অৰুণাচল প্ৰদেশ । অৰুণাচল প্ৰদেশ চৰকাৰ আৰু ৰাষ্ট্ৰীয় কৃষি সমবায় বিপণন ফেডাৰেচন অৱ ইণ্ডিয়া লিমিটেড (Nafed)ৰ সহযোগত নতুন দিল্লীত অনুষ্ঠিত কাৰ্যসূচীত মুকলি কৰা হয় ভাৰতৰ প্ৰথম জৈৱিক ফল কিৱি । কেন্দ্ৰীয় মন্ত্ৰী কিৰেন ৰিজিজু আৰু অৰুণাচল প্ৰদেশৰ মুখ্যমন্ত্ৰী পেমা খাণ্ডুয়ে টুইটাৰযোগে ইয়াক লৈ প্ৰশংসা কৰা দেখা গৈছে ।
অৰুণাচল প্ৰদেশৰ ৰাইজক শুভেচ্ছা জ্ঞাপন কৰাৰ লগতে কিৱি ফলৰ প্ৰশংসা কৰে প্ৰধানমন্ত্ৰী নৰেন্দ্ৰ মোডীয়ে । এই সুস্বাদু ফল বিধি সকলোৰে ঘৰত থকাটো অতি দৰকাৰ বুলিও প্ৰধানমন্ত্ৰীগৰাকীয়ে উল্লেখ কৰে ।
উল্লেখ্য যে 'কিৱি' এবিধ অতি উপকাৰী ফল । উত্তৰ-পূৰ্বাঞ্চলৰ ৰাজ্যসমূহত এই ফল সহজলভ্য যদিও হিমালয়ৰ পাদদেশৰ একাংশ স্থানত ইয়াৰ খেতি পূৰ্বতকৈ বহু গুণে বৃদ্ধি পাইছে । এতিয়া অৰুণাচল প্ৰদেশৰ প্ৰায় প্ৰতিগৰাকী লোকে জৈৱিক ফাৰ্ম(started organic farm) আৰম্ভ কৰিছে । ৰাজ্য চৰকাৰ আৰু জিলা বিষয়াসকলেও এই খেতি কৰিবলৈ স্থানীয় ৰাইজক উদগনি দিছে ।
এই ফল বিধ যথেষ্ট মিঠা আৰু সোৱাদ যুক্ত । কিৱি ফলৰ খেতি সোৱণশিৰি জিলাৰ জিৰো আৰু ডিবাং ভেলীত যথেষ্ট পৰিমাণে হয় যদিও এতিয়া আনিনি, পশ্চিম কামেং জিলাৰ বিভিন্ন পাহাৰীয়া সমতল ভূমিতো ইয়াৰ খেতি কৰিবলৈ আৰম্ভ কৰিছে । ২০২০ বৰ্ষত অৰুণাচল চৰকাৰৰ কৃষি বিভাগে জিৰো উপত্যকাৰ পৰা দিল্লীলৈ ৬ টন কিৱি ফল এখন ব্যক্তিগত ফাৰ্মক বিক্ৰী কৰিছিল । অৰুণাচল প্ৰদেশৰ নামনি সোৱণশিৰি জিলাৰ জিৰো উপত্যকাত কিৱি ফল যোৱা ২০১৬ চনত ৬০ টন উৎপাদন হৈছিল আৰু ২০১৯ চনত ১০২ টন উৎপাদন হয় ।
ৰাজ্য চৰকাৰে আশা কৰে যে অহা ২০২৩ চনৰ ভিতৰত অৰুণাচল প্ৰদেশ দেশৰ ভিতৰতে অধিক কিৱি ফল উৎপাদনকাৰী ৰাজ্য হিচাবে স্বীকৃতি লাভ কৰিব । ইফালে কৃষি বিভাগে ৰাজ্য চৰকাৰৰ তাৎপৰতাত এখন কিৱি ফলৰ ৰিচাৰ্জ কেন্দ্র স্থাপনৰ পদক্ষেপ গ্ৰহণ কৰিছে । উল্লেখ্য যে এই কিৱি ফলৰ পৰা এবিধ সুৰা তৈয়াৰ কৰা হয় আৰু ই উত্তৰ-পূৰ্বাঞ্চলৰ মাত্ৰ অৰুণাচল প্ৰদেশতে উৎপাদন হয় । ভাৰতৰ প্ৰথম কিৱি ফলৰ পৰা অৰ্গেনিকভাৱে সুৰা প্ৰস্তুত কৰিছে জিৰো ভেলীত ।
লগতে পঢ়ক:Chalo loku festival : অৰুণাচলৰ নক্তে জনগোষ্ঠীৰ চল' লকুৰ বিষয়ে জানে নে ?
