তেজপুৰ, 21 নৱেম্বৰ: মজুৰী বৃদ্ধিৰ দাবীৰে ৰাজ্যজুৰি অব্যাহত আছে অংগনবাড়ী কৰ্মী সহায়িকাৰ প্ৰতিবাদ ৷ সমগ্ৰ ৰাজ্যৰ লগতে তেজপুৰতো শনিবাৰে অংগনবাড়ী কৰ্মী সহায়িকা সকলে ৰাজপথলৈ ওলাই আহি প্ৰতিবাদ সাব্যস্ত কৰে ৷
প্ৰতিবাদকাৰী সকলে অভিযোগ চৰকাৰে নতুন শিক্ষা নীতি প্ৰৱৰ্তন কৰি এই কৰ্মীসকলক ভাতে মৰাৰ যোজা চলাইছে ৷ সেয়ে চৰকাৰৰ এই পদক্ষেপৰ বিৰুদ্ধে তেওঁলোকে আন্দোলনৰ পন্থা হাতত লোৱা বুলি প্ৰতিবাদকাৰী সকলে জানিবলৈ দিয়ে ৷
অংগনবাড়ী কৰ্মী সকলৰ বহুকেইটা দীৰ্ঘদিনীয়া দাবীৰ প্ৰতি চৰকাৰে কোনো সঁহাৰি নজনোৱাৰ অভিযোগ উত্থাপন কৰি কৰ্মীসকলে তেওঁলোকক মাননিৰ পৰিৱৰ্তে ন্যূনতম মজুৰী 18,000 টকা ধাৰ্য কৰাৰ লগতে কৰ্মী সহায়িকাসকলক অৱসৰকালীন সা-সুবিধা প্ৰদান কৰাৰ বাবে দাবী উত্থাপন কৰে ৷
প্ৰতিবাদকাৰী সহায়িকা কৰ্মী সকলে জানিবলৈ দিয়ে যে নতুন শিক্ষা নীতিৰ আধাৰত প্ৰাক-প্ৰাথমিক শিক্ষাক প্ৰাথমিক শিক্ষা ব্যৱস্থাত সংলগ্ন কৰাৰ লগে লগে অংগনবাড়ী কেন্দ্ৰসমূহ গুৰুত্বহীন হৈ পৰিব লগে লগে অংগনবাড়ী কৰ্মী সহায়িকা সকলৰ জীৱনলৈ চৰম ভাবুকি মাতি আনিব ৷ সেয়ে সকলোবোৰ দিশ বিবেচনা কৰি চৰকাৰক এক ফলপ্ৰসূ সিদ্ধান্ত ল'বৰ বাবে অংগনবাড়ী কৰ্মী সকলে প্ৰতিবাদৰ জৰিয়তে চৰকাৰক আহ্বান জনায় ৷
লগতে পঢ়ক:বাঘজানবাসীৰ প্ৰতিবাদত পুনৰ উত্তপ্ত দুলীয়াজান
