নাজিৰা, ১২ আগষ্ট : নাজিৰা নগৰৰ মাজেৰে যোৱা ঐতিহাসিক ধোদৰ আলিৰ দিখৌ দলঙৰ কাষত বুধবাৰে তিনিঘণ্টীয়া পথ অৱৰোধ কাৰ্যসূচী ৰূপায়ন কৰে বীৰ লাচিত সেনাৰ লগতে বহুকেইটা জাতীয় সংগঠনৰ সদস্যই ৷ ঐতিহাসিক ধোদৰ আলি নিৰ্মাণ আৰু দিখৌ দলং মেৰামতিৰ দাবীতে পথ অৱৰোধ কৰি প্ৰতিবাদ সাব্যস্ত কৰে প্ৰতিবাদকাৰীসকলে ৷ পথ অৱৰোধৰ ফলত পথটোত বহু সময় ধৰি আবদ্ধ হৈ পৰে যানবাহন ৷
ঐতিহাসিক এই পথটোৰ উপৰেদিয়েই দৈনিক অহাযোৱা কৰে অএনজিচৰ লগতে শিল বালি কয়লা কঢ়িওৱা গধুৰ গধুৰ যান বাহন । কিন্তু আজি পৰ্যন্ত নিৰ্মাণ নহ'ল পথটো ৷ গড়কাপ্তানি বিভাগকো বহুবাৰ আবেদন নিবেদন কৰাৰ পিছতো ধোদৰ আলিৰ পুনৰ নিৰ্মাণ আৰু দিখৌ দলং মেৰামতি নকৰিলে বিভাগটোৱে ৷ যাৰ কাৰণেই বুধবাৰে ৰাজপথলৈ উলাই আহি পথ অৱৰোধ কাৰ্যসূচী হাতত ল'লে বীৰ লাচিত সেনা অসমৰ লগতে অনুসূচিত জাতি যুৱ ছাত্ৰ পৰিষদ, বৃহত্তৰ অসমীয়া যুৱ মঞ্চ, ছাত্ৰ মুক্তি সংগ্ৰাম সমিতি , ঐক্য সেনা অসমৰ সদস্য সকলে ৷
লগতে পঢ়ক : ২৭ আগষ্টৰ ভিতৰত গৰ্গ চেটাৰ্জীক গুৱাহাটী আদালতত হাজিৰ হোৱাৰ নিৰ্দেশ
