নগাঁও,২১ ছেপ্টেম্বৰ: জম্মু কাশ্মীৰৰ কুলগ্ৰাম জিলাৰ বটগ্ৰামত BSF ৰ ৫৮ নং বেটেলিয়ানত উপ-পৰিদৰ্শক হিচাপে কৰ্মৰত নগাঁও জিলাৰ বেবেজীয়াৰ কুৰুৱাবাহীৰ দুলাল চন্দ্ৰ শৰ্মাই কৰ্তব্যৰত অৱস্থাত দূৰ্ঘটনাগ্ৰস্ত হৈ অকাল মৃত্যুক সাৱটি লয় (Sub-Inspector in 58th BSF Battalion) । কৰ্তব্যৰত অৱস্থাত দুলাল চন্দ্ৰ শৰ্মাই ১৭ চেপ্টেম্বৰত মেচত নিশাৰ আহাৰ গ্ৰহণ কৰি তৃতীয় মহলাৰ পৰা তললৈ নামি আহোতেই ষ্টেপৰ পৰা পিচলি প্ৰায় ৮ ফুট তলত পৰাত বেয়াকৈ আঘাতপ্ৰাপ্ত হৈছিল ।
লগে লগে শৰ্মাক চিকিৎসালয়লৈ প্ৰেৰণ কৰা হৈছিল যদিও জীৱন মৰণৰে যুঁজি অৱশেষত ১৯ চেপ্টেম্বৰত চিকিৎসাধীন অৱস্থাতে শৰ্মাই মৃত্যুক সাৱটি লয় । অকাল মৃত্যুক সাবটি লোৱা দুলাল শৰ্মাৰ নশ্বৰ দেহ বুধবাৰে দুপৰীয়া তেখেতৰ কুৰুৱাবাহীৰ নিজ বাসগৃহ আহি পায়হি । শৰ্মাৰ মৃতদেহ নিজ বাসগৃহ আহি পোৱাৰ লগে লগে এক শোকাকুল পৰিবেশৰ সৃষ্টি হয় । অঞ্চলৰ ৰাইজে জানিবলৈ দিয়ামতে অতি অমায়িক আৰু নিষ্ঠাবান দুলাল শৰ্মাই দুই এদিনতে ছুটী লৈ ঘৰলৈ অহা কথা আছিল ।
ইতিমধ্যে ভাৰতীয় সীমা সুৰক্ষা বলত উপ পৰিদৰ্শকগৰাকীক সামৰিক মৰ্যদাৰে শেষকৃত্য সম্পন্ন কৰা হয় । জম্মু কাশ্মীৰৰ পৰা অহা সেনা বাহিনীৰ লগতে নগাঁও জিলা আৰক্ষী আৰু প্ৰশাসনৰ লোক প্ৰয়াত শৰ্মাৰ বাসগৃহত উপস্থিত থাকি শেষ শ্ৰদ্ধা জ্ঞাপন কৰে । দুলাল শৰ্মাৰ শেষ শ্ৰদ্ধাঞ্জলি প্ৰদান অনুষ্ঠানত নগাঁও জিলাৰ অতিৰিক্ত উপায়ুক্ত গায়ত্ৰী শৰ্মা লগতে নগাঁও উপ আৰক্ষী অধীক্ষক ত্ৰিদীপ কুম্বাং,বেবেজীয়াৰ পহৰা আৰক্ষী চকীৰ ভাৰাপ্ৰাপ্ত বিষয়া কল্যান গগৈ উপস্থিত থাকে । উল্লেখযোগ্য জম্মু কাশ্মীৰত অকাল মৃত্যুক সাবটি লোৱা দুলাল শৰ্মাই মৃত্যুৰ সময়ত মাতৃ,পত্নী, পুত্ৰক ইহ সংসাৰত এৰি থৈ গৈছে ।
