নগাঁও,21অক্টোবৰঃ পূজাৰ বতৰত নগাঁও চহৰ বাসীৰ বাবে এটা ভাল খৱৰ ৷ বিগত তিনি দশক ধৰি ওলমি থকা এখন অতি গুৰুত্বপূৰ্ণ পকী দলঙৰ শুভাৰম্ভনী হ’ব শাৰদীয় দূৰ্গোৎসৱৰ সপ্তমীৰ দিনা ৷ ১৯৮৯ চনতে নগাঁও চহৰৰ ভুঞাপট্টিত কলঙৰ ওপৰত থকা পকী দলং খনৰ নিৰ্মাণ কাৰ্য সম্পূৰ্ণ হৈছিল ৷ কিন্তু বিগত সময়চোৱাত ৰাজ্য চৰকাৰৰ সদিচ্ছা অভাৱ আৰু বিভাগীয় ফাইলৰ মেৰপাকত দলং খনৰ দুইটা মূৰ সংলগ্ন হোৱা নাছিল নগাঁও পুলিচ ৰিজাৰ্ভ আৰু ভুঞাপট্টিৰ পথৰ লগত ৷
যাৰবাবে যোৱা তিনিটা দশক ধৰি যাতায়তৰ বাবে মুকলি নোহোৱা নগাঁৱৰ এই পকী দলংখন সকলোয়ে অভিহিত কৰিছিল ওলমা দলং বুলি ৷ শেহতীয়াকৈ নগাঁও সদৰ সমষ্টিৰ বিধায়ক ৰূপক শৰ্মাৰ প্ৰচেষ্টাত ওলমা পকী দলং খনৰ দুয়ো পাৰ নিৰ্মাণ কৰি ন-ৰূপত সাজি উলিয়াইছে কলঙৰ ওপৰৰ দলংখন ৷
নগঞা ৰাইজৰ বহু আকাংখিত এই পকী দলংখন যাতায়তৰ বাবে অহা ২৩ অক্টোবৰত আনুষ্ঠানিক ভাবে মুকলি কৰিব বিত্ত, স্বাস্থ্য, গড়কাপ্তানি আদি দপ্তৰৰ মন্ত্ৰী ড৹ হিমন্ত বিশ্ব শৰ্মাই ৷ যাকলৈ এতিয়া উৎফুল্লিত হৈ পৰিছে নগাঁও পুলিচ ৰিজাৰ্ভ, মিলনপুৰ, ফৌজদাৰীপট্টি আৰু ভুঞাপট্টি অঞ্চলৰ স্থানীয় ৰাইজৰ লগতে নগাঁও চহৰবাসী ৷
