গুৱাহাটী, ২৭ জুনঃ লক্ ডাউনে বিধ্বস্ত কৰি থৈ যোৱা ক্ষুদ্ৰ, লঘু আৰু মজলীয়া উদ্যোগসমূহ পুনৰুজ্জীৱিতকৰণৰ বাবে ইতিমধ্যে প্ৰধানমন্ত্ৰীয়ে ঘোষণা কৰা "আত্মনিৰ্ভৰ ভাৰত" ৰ অধীনত অসমৰ ক্ষুদ্ৰ উদ্যোগ সমূহৰ বাবে চৰকাৰে মোকলাই দিছে ৭৩৮.৪৪ কোটি টকা । এই বৃহৎ ধনৰাশি অসমৰ ২৮,৬৫৪ টা ক্ষুদ্ৰ, লঘু আৰু মজলীয়া উদ্যোগে জামাতবিহীন ঋণ হিচাপে ল'ব পাৰিব । ইতিমধ্যে এই ধনৰাশি ক্ষুদ্ৰ উদ্যোগীসকলক ঋণ হিচাপে আগবঢ়াবলৈ বেংকসমূহৰ সৈতে কথা পাতি সকলো ব্যৱস্থা গ্ৰহণ কৰাৰ বাবে জিলা উদ্যোগ বিষয়াসকলক ৰাজ্যৰ উদ্যোগ বিভাগে যাৱতীয় নিৰ্দেশনাও জাৰি কৰিছে ।
মন কৰিবলগীয়া কথাটো হ'ল এই ঋণ কিন্তু ক্ষুদ্ৰ উদ্যোগীসকলে নিৰ্দিষ্ট সময়ৰ ভিতৰত সুত সহ ওভতাই দিব লাগিব । কিন্তু চৰকাৰৰ এনে ব্যৱস্থাই ৰাজ্যৰ ক্ষুদ্ৰ, লঘু আৰু মজলীয়া উদ্যোগীসকলক উপকৃত কৰিব নোৱাৰে বুলি মন্তব্য কৰিছে ৰাজ্যৰ প্ৰাক্তন উদ্যোগ মন্ত্ৰী, জ্যেষ্ঠ কংগ্ৰেছ নেতা তথা বৰ্তমানৰ সাংসদ প্ৰদ্যুৎ বৰদলৈয়ে । ইটিভি ভাৰতৰে হোৱা এক আছুতীয়া সাক্ষাৎকাৰত সাংসদ বৰদলৈয়ে কয় যে ভাৰতবৰ্ষৰ আন ৰাজ্যৰ সৈতে অসমৰ ক্ষুদ্ৰ, লঘু আৰু মজলীয়া উদ্যোগৰ (MSME) বৈশিষ্ট্য আৰু চৰিত্ৰ নিমিলে । কিয়নো অসমৰ এই ধৰণৰ উদ্যোগ সমূহে আঞ্চলিক বজাৰখনৰ বাবেহে সীমিত পৰিসৰত কাম কৰে ।
তেনেক্ষেত্ৰত এইধৰণে ঋণ প্ৰদান কৰি তেওঁলোকৰ ব্যৱসায় পুনৰুজ্জীৱিত কৰাৰ ধাৰণা অসমত মুঠেও গ্ৰহণযোগ্য নহয় । তাৰ পৰিৱৰ্তে নগদ ধন প্ৰদানেৰে তেওঁলোকৰ উপকাৰ সাধিব পৰা গ'লহেঁতেন ৷ বৰদলৈয়ে আৰু কয় যে ৰাজ্যৰ উদ্যোগ মন্ত্ৰী চন্দ্ৰমোহন পাটোৱাৰীয়ে অসমত এডভান্টেজ আছাম অনুষ্ঠিত কৰি দেশী-বিদেশী বিনিয়োগকাৰীৰে অসম ভৰি পৰিব বুলি কৈছিল । কিন্তু প্ৰকৃতাৰ্থত তেনে একোৱেই হোৱা দেখা নগ'ল বুলি মন্তব্য কৰে উদ্যোগ মন্ত্ৰী গৰাকীয়ে ৷
