নগাঁও, 20 ফেব্ৰুৱাৰী : নগাঁও জিলাৰ নৰ্থ ইষ্ট স্মল ফাইনেন্স বেংকৰ কঠিয়াতলী শাখাত কৰ্মৰত হাজোৰ কৃষ্ণ বৈশ্য নামৰ কৰ্মচাৰীজনৰ নৃশংস হত্যাকাণ্ডৰ ন্যায় বিচাৰি শনিবাৰে নগাঁৱৰ কঠিয়াতলীত স্থানীয় লোকে তীব্ৰ প্ৰতিবাদ সাব্যস্ত কৰে ৷ হত্যাকাৰীক শীঘ্ৰে গ্ৰেপ্তাৰ কৰি উচিত শাস্তি দিয়াৰ দাবী তুলি ৰাজপথ ঘেৰাও কৰে স্থানীয় ৰাইজে ৷ আৰক্ষীয়ে 10 দিন উকলি যোৱাৰ পাছতো হত্যাকাৰীক গ্ৰেপ্তাৰ কৰিব নোৱাৰাটো অসম আৰক্ষীৰ চৰম ব্যৰ্থতা বুলি অভিযোগ কৰে প্ৰতিবাদকাৰীসকলে ৷
উল্লেখ্য যে, কৃষ্ণ বৈশ্যই 10 ফেব্ৰুৱাৰীত ঋণৰ ধন তুলিবলৈ যোৱাৰ পাছৰে পৰা সন্ধানহীন হৈ পৰে আৰু 12 ফেব্ৰুৱাৰীত কন্দলী ফায়েৰিং ফিল্ডৰ কাষৰ জংঘলত ডিঙি কটা অৱস্থাত উদ্ধাৰ হয় যুৱকজনৰ মৃতদেহ ৷ ধনৰ লালসাত কোনো দূৰ্বৃত্তই কৃষ্ণ দাসক হাত ভৰি বান্ধি ডিঙি কাটি হত্যা কৰাৰ সন্দেহ কৰিছে স্থানীয় লোকে ৷ স্থানীয় ৰাইজে নিহত যুৱকজনৰ পৰিয়ালক 50 লাখ টকা ক্ষতিপূৰণ দিবলৈও ৰাজ্য চৰকাৰক আহ্বান জনাইছে ৷
লগতে পঢ়ক : আলফাৰ নতুন বিবৃতি পিচতে বীৰ লাচিত সেনাৰ প্ৰতিক্ৰিয়া
