তিনিচুকীয়া : আজি ভোগৰ উৎসৱ ভোগালীৰ উৰুকা, কাইলৈ বিহু ৷ ভোগালী বিহুৰ বাবে ৰাজ্যৰ চৌদিশে উখল-মাখল পৰিৱেশে বিৰাজ কৰিছে ৷ কোনোৱে যদি মন পছন্দৰ মাছটো কিনিবলৈ মাছৰ বজাৰত মাজনিশাৰ পৰাই খাপ পাতিছে, আন কোনোৱে আকৌ ভিৰ কৰিছে লাড়ু-পিঠাৰ বিপণিত ৷
ভোগালীৰ এই বতৰত বাণিজ্যিক চহৰ তিনিচুকীয়াত গঢ়ি উঠিছে মহিলাৰ এখন বিশেষ বজাৰ ৷ বাণিজ্যিক চহৰখনৰ কাষৰীয়া গাঁও পানীতোলা, বৰুৱাহোলা, গুইজান, নতুন ৰংগাগড়া, বাৰেকুৰি, লাইপুলিকে ধৰি বহুকেইখন গাঁৱৰ মহিলাই ঘৰতে নিজ হাতেৰে ভোগালীৰ জলপান প্ৰস্তুত কৰি লৈ আহিছে বজাৰলৈ বুলি ৷
তিনিচুকীয়া প্ৰাণকেন্দ্ৰ থানা চাৰিআলিৰ সমীপৰ জি এন বি পথৰ কাষত অৰ্ধশতাধিক মহিলাই চহৰখনৰ লগতে বিভিন্ন প্ৰান্তৰ লোকসকলক যান্ত্ৰিকতাৰ মাজতো ভোগালীৰ প্ৰকৃত সোৱাদ লোৱাৰ সুবিধা কৰি দিছে ৷ তিনিদিনৰ বাবে গঢ়ি উঠা মহিলাৰ এই বিশেষ বজাৰখনত কি কিযে নাই ৷ ভোগালীৰ জলপান চিৰা, তিলৰ পিঠা, সকলো প্ৰকাৰৰ লাড়ুৰ লগতে কাঠ আলু, মিঠা আলু, কোমল চাউল, বৰ পিঠাকে ইত্যাদি সকলো সামগ্ৰীয়ে উপলব্ধ হৈছে ৷
এগৰাকী বিক্ৰেতাই সংবাদ মাধ্যমৰ আগত কয়, ‘‘প্ৰতিবাৰৰ দৰে এইবাৰো বহু মহিলাই ঘৰতে নিজ হাতেৰে প্ৰস্তুত কৰা ভোগালীৰ জলপান লৈ এই বজাৰলৈ আহিছে ৷ বিগত বৰ্ষতকৈ এইবাৰৰ পিঠাসমূহৰ দাম কিছু বাঢ়িছে ৷ কিন্তু অন্য প্ৰতিষ্ঠান বা ঠাইতকৈ এই বজাৰখনত কম মূল্যত গ্ৰাহকে পিঠা লাভ কৰিব ৷’’
বিক্ৰেতাগৰাকীয়ে আৰু কয়, ‘‘ঘৰৰ পৰাই এই পিঠাসমূহ বিক্ৰী হৈ যায় ৷ কিন্তু এই বজাৰলৈ আহি ভাল লাগে ৷ সকলোকে লগ পোৱা যায় ৷’’
লগতে পঢ়ক : ৪৬ হাজাৰ টকাৰ এটা চিতল মাছ লগতে পঢ়ক : মাঘ বিহুৰ উৰুকা : ভোগালীৰ ভোগ বিচাৰি মহানগৰীৰ বজাৰত গ্ৰাহকৰ ভিৰ |
