মৰিগাঁও, 3 নৱেম্বৰ : মৰিগাঁও দক্ষিণ ধৰমতুলৰ কিডনী কাণ্ডৰে জড়িত মূল মাষ্টাৰ মাইণ্ড প্লাৱন বৰঠাকুৰক মঙলবাৰে তামিলনাডুৰ পৰা গ্ৰেপ্তাৰ কৰে মৰিগাঁও আৰক্ষীয়ে । বুধবাৰে সংবাদমেল সম্বোধন কৰি এই কথা সদৰী কৰে মৰিগাঁও জিলাৰ আৰক্ষীৰ অধীক্ষক অপৰ্ণা নটৰাজনে ।
মৰিগাঁৱৰ দক্ষিণ ধৰমতুলত কিডনীৰ বেহা চলোৱা মূল অভিযুক্ত প্লাৱন বৰঠাকুৰক চাৰি মাহৰ অন্তত গ্ৰেপ্তাৰ কৰে মৰিগাঁও আৰক্ষীয়ে । সমগ্র ৰাজ্য তোলপাৰ লগোৱা কিডনী ব্যৱসায়ৰ লগত জড়িত মূল মাষ্টাৰ মাইণ্ড প্লাৱন বৰঠাকুৰে আত্মগোপন কৰি আছিল তামিলনাডুৰ কোয়েম্বাটুৰত ।
লগতে পঢ়ক: আৰক্ষীৰ জালত কিডনী ব্যৱসায়ী চক্ৰৰ অন্যতম অভিযুক্ত নিতু দাস
মৰিগাঁও আৰক্ষীয়ে ধাৰাবাহিক অনুসন্ধান চলাই আছিল বিগত চাৰিমাহ ধৰি । অৱশেষত মঙলবাৰে নিশা মূল মাষ্টাৰ মাইণ্ড প্লাৱন বৰঠাকুৰক গ্ৰেপ্তাৰ কৰিবলৈ সক্ষম হয় মৰিগাঁও আৰক্ষীয়ে ।
বুধবাৰে মৰিগাঁও আৰক্ষীৰ অধীক্ষক অপৰ্ণা নটৰাজনে জিলা আৰক্ষী অধীক্ষকৰ কাৰ্যালয়ত সংবাদমেল সম্বোধন কৰি কয়, গ্ৰেপ্তাৰ কৰাৰ পাচতে প্লাৱন বৰঠাকুৰক জেৰা অব্যাহত ৰাখিছে মৰিগাঁও আৰক্ষীয়ে ৷ মানৱ দেহৰ অংগৰ ব্যৱসায়ৰ লগত আৰু কোন কোন জড়িত আছে সেয়া আৰু অধিক অনুসন্ধানৰ পাছতহে জানিব পৰা যাব বুলি সদৰী কৰে আৰক্ষীৰ অধীক্ষক গৰাকীয়ে ।
লগতে পঢ়ক: ধৰমতুল কাণ্ডৰ অভিযুক্ত ৰমেন মেধিৰ আত্মসমৰ্পণ
