মৰিগাঁও, ৫ নৱেম্বৰ: প্ৰাক্তন কংগ্ৰেছী মন্ত্ৰী নীলমণি সেন ডেকাৰ পৰিয়ালৰ বিৰুদ্ধে উত্থাপিত অভিযোগৰ ক্ৰিয়া-প্ৰতিক্ৰিয়া অব্যাহত ৷ পুনৰ কংগ্ৰেছ আমোলৰ মন্ত্ৰীগৰাকীৰ লগতে তেওঁৰ পুত্ৰৰ বিৰুদ্ধে চাঞ্চল্যকৰ অভিযোগ উত্থাপন কৰিছে নিৰ্যাতিতা বোৱাৰীগৰাকীয়ে ৷ পুত্ৰৰ স্বভাৱ সন্দৰ্ভত পৰিয়ালৰ লোক পূৰ্বৰে পৰা অৱগত বুলি বিস্ফোৰক অভিযোগ তোলে পুত্ৰবধুৱে ।
পুত্ৰৰ স্বভাৱ সন্দৰ্ভত ক’বলৈ গৈ প্ৰাক্তন মন্ত্ৰী নীলমণি সেন ডেকাই নিজ মুখে তেওঁৰ পুত্ৰই দুই-তিনি মাহতকৈ অধিক সময় কোনো যুৱতীৰ সৈতে সম্পৰ্ক নাৰাখে বুলি স্বীকাৰ কৰা কথা সংবাদ মাধ্যমৰ আগত উল্লেখ কৰে নিৰ্যাতিতা বোৱাৰীগৰাকীয়ে । উল্লেখ্য যে, শুকুৰবাৰে প্ৰাক্তন কংগ্ৰেছী মন্ত্ৰী নীলমণি সেন ডেকাই বোৱাৰী আৰু বোৱাৰীৰ পিতৃক শাৰীৰিকভাৱে অপদস্থ কৰাৰ অভিযোগ উত্থাপিত হৈছিল ।
বিবাহৰ এবছৰ নৌহওতেই মাহৰ পাচত মাহ নিৰ্যাতনৰ সন্মুখীন হৈ স্বামী পৰিয়ালৰ প্ৰতাৰণাত পিতৃগৃহত আশ্ৰয় লোৱা জীয়ৰীক পুনৰ স্বামীগৃহত থ’বলৈ যোৱাৰ সময়তে নিৰ্যাতনৰ সন্মুখীন হোৱাৰ অভিযোগ উঠিছে ৷ প্ৰাক্তন মন্ত্ৰী ডেকাই বোৱাৰীৰ লগতে তেওঁৰ পিতৃক দুৰ্ব্যৱহাৰ কৰাৰ চাঞ্চল্যকৰ ছবি পোহৰলৈ আহিছিল ৷
নীলমণি সেন ডেকাৰ পুত্ৰই পূৰ্বেও বিবাহপাশত আৱদ্ধ হোৱাৰ লগতে এই কথা তেওঁৰ পৰা লুকুৱাইছিল বুলি গুৰুতৰ অভিযোগ তোলে ভুক্তভোগী তথা নিৰ্যাতিতা বোৱাৰীগৰাকীয়ে । চৰ-ভুকুৰ সমান্তৰালভাৱে গাৰুৰে হেঁচা মাৰি পৰিকল্পিতভাৱে হত্যাৰো চেষ্টা চলোৱা বুলি প্ৰাক্তন মন্ত্ৰীৰ পুত্ৰৰ বিৰুদ্ধে অভিযোগ তুলিছে ভুক্তভোগীয়ে । ভুক্তভোগী বোৱাৰীগৰাকীৰ পিতৃয়ে বিষয়টো সন্দৰ্ভত আৰক্ষীক অৱগত কৰাৰ পিচতো কোনো গুৰুত্ব নিদিয়াৰ অভিযোগ কৰিছে ৷
আনহাতে, এই সমস্ত অভিযোগ নস্যাৎ কৰিছে প্ৰাক্তন কংগ্ৰেছী মন্ত্ৰী নীলমণি সেন ডেকা তথা পৰিয়ালটোৱে ৷ আইনৰ কাষ চাপিব বুলি পৰিয়ালটোৱে সংবাদ মাধ্যমৰ আগত সদৰী কৰে ৷
