মাজুলী, ১১ অক্টোবৰ: সোমবাৰে মাজুলীত ৪৮ ঘন্টীয়া ব্যৱসায়িক প্ৰতিষ্ঠান বন্ধৰ ব্যাপক প্ৰভাৱ দেখিবলৈ পোৱা গৈছে । মালবাহী ফেৰীৰ চলাচল পুনৰ আৰম্ভ কৰাৰ দাবীত বন্ধৰ আহ্বান জনাইছে জিলা বণিক সন্থাই । কিয়নো, মালবাহী ফেৰীসমূহৰ চলাচল বন্ধ হৈ থকাৰ বাবে মাজুলীৰ ব্যৱসায়িক প্ৰতিষ্ঠানসমূহে যথেষ্ট সমস্যাৰ সন্মুখীন হ'বলগীয়া হৈছে । যোৱা ৮ ছেপ্টেম্বৰত ব্ৰহ্মপুত্ৰৰ বুকুত সংঘটিত হোৱা ভয়ংকৰ ফেৰী দুৰ্ঘটনাৰ পাচত মুখ্যমন্ত্ৰী ড০ হিমন্ত বিশ্ব শৰ্মাই বন্ধ কৰিছিল এটা ইঞ্জিন যুক্ত ফেৰী সেৱা ।
এই ফেৰী সেৱা বন্ধ হোৱাৰ লগে লগে বন্ধ হৈ পৰিছে এটা ইঞ্জন যুক্ত যাত্রীবাহী ফেৰী সেৱাৰ লগতে খাদ্য সামগ্ৰীকে আদি কৰি আন আন সামগ্ৰী কঢ়িয়াই অনা ফেৰী সেৱা । খাদ্য সামগ্ৰী কঢ়িয়াই অনা ফেৰীৰ চলাচল বন্ধ হোৱাৰ ফলত মাজুলীত খাদ্য সামগ্ৰীকে আদি কৰি আন আন সামগ্ৰীৰ নাটনিৰ লগতে মূল্যবৃদ্ধিও হৈছে । খাদ্য সামগ্ৰীকে আদি কৰি আন আন সামগ্ৰী মাজুলীলৈ আনিবলৈ সুবিধা কৰি দিবলৈ জিলা বণিক সন্থাই প্ৰশাসনক আহ্বান জনাইছিল যদিও কোনো সুফল নাপালে । সেয়ে, মাজুলীৰ জিলা বণিক সন্থাই সোমবাৰে পুৱা ৬ বজাৰ পৰা সমগ্ৰ মাজুলী জিলাতে ৪৮ ঘন্টাৰ বাবে ব্যৱসায়িক প্ৰতিষ্ঠান বন্ধৰ আহবান জনায় ।
সংগঠনটোৰ এই আহ্বানৰ প্ৰতি সঁহাৰি জনাই মাজুলীৰ দোকান-পোহাৰবোৰ পুৱাৰে পৰা বন্ধ ৰখা পৰিলক্ষিত হৈছে । মাজুলীৰ কমলাবাৰী, গড়মূৰ, ফুলনি, জেংৰাইমুখ, নতুন বজাৰ, ভকতি দুৱাৰ আদি স্থানত পুৱাৰে পৰা নিমাওমাও পৰিৱেশে বিৰাজ কৰি থকা পৰিলক্ষিত হৈছে । মাজুলী জিলা বণিক সন্থাই চৰকাৰ তথা প্ৰশাসনক অতি সোনকালে মালবাহী ফেৰীৰ চলাচল পুনৰ আৰম্ভ কৰাৰ অনুমতি দিবলৈ দাবী জনাইছে ।
লগতে পঢ়ক:ৰামেশ্বৰ তেলীৰ অদ্ভুত মন্তব্যৰ পাছতে দল-সংগঠনৰ প্ৰতিক্ৰিয়া
