নাওবৈচা, ৫ জুন : আজি বিশ্ব পৰিৱেশ দিৱস (World Environment Day 2022) ৷ আজিৰ এই বিশেষ দিনটোত এটা ভাল লগা খবৰ । এক সেউজীয়া সপোন দেখা এজন প্ৰকৃতিপ্ৰেমী । নিজ হাতে গঢ়িছে তেওঁ এখন অৰণ্য । সন্তানৰ দৰে লালন-পালন কৰিছে ইয়াৰ প্ৰতিজোপা গছ । মানুহজনৰ দুচকুত প্ৰতিনিয়ত উদ্ভাসিত হৈ থাকে এখন সেইজীয়া পৃথিৱীৰ স্বপ্ন ।
প্ৰকৃতি ধ্বংসৰ বিপৰীতে প্ৰাকৃতিক ভাৰসাম্য ৰক্ষাৰ চেষ্টাত ব্ৰতী হৈছে লখিমপুৰ ঢকুৱাখনাৰ এগৰাকী প্ৰকৃতিপ্ৰেমী ৷ গছ থাকিলেহে মানুহ থাকিব আপ্তবাক্যশাৰীৰ যথাৰ্থ মূল্যায়ণ কৰাৰ আপ্ৰাণ চেষ্টাৰে ব্যক্তিগত প্ৰচেষ্টাত গঢ় দিছে এখন শিমলু গছৰ বাগান ৷ এচাম দুস্কৃতিকাৰীয়ে বন ধ্বংস কৰি প্ৰাকৃতিক ভাৰসাম্যৰ প্ৰতি প্ৰৱল ভাবুকি নমাই আনিছে ৷ তেনে সময়তে গছ-গছনিৰ প্ৰেমত পৰি প্ৰকৃতি ৰক্ষাৰ চেষ্টা চলাইছে ঢকুৱাখনাৰ এইজন ব্যাক্তিয়ে ।
নাম তেওঁৰ যোগেশ দলে (Jogesh Dole Selflessly loves nature)। ঢকুৱাখনাৰ সোৱণশিৰী পঞ্চায়তৰ পাতিৰ চুকৰ যোগেশ দলে নামৰ এইজন ব্যক্তিজনে নিজা প্ৰচেষ্টাৰে গঢ়ি তুলিছে এখন শিমলু গছৰ অৰণ্য । প্ৰায় ১০ বিঘা ভূমিত এজোপা-দুজোপাকৈ শিমলুৰ গছপুলি ৰোপণ কৰি গঢ়ি তুলিছে এইখন বৃহৎ অৰণ্য । সন্তানৰ দৰে লালন-পালন কৰে প্ৰতিজোপা গছক ।
বিগত ৪ বছৰত তেওঁ ৰোপন কৰিছে ১০ হাজাৰৰো অধিক শিমলুৰ পুলি । বৰ্তমান ১৫-২০ ফুট উচ্চতা হোৱা শিমলুৰ বাগিছাখনত যোগেশ দলে নামৰ প্ৰচাৰ বিমুখ এইজন ব্যক্তিৰ সপোনে ঠন ধৰি উঠিছে । যিটো সময়য়ত এচাম দুষ্কৃতিকাৰীয়ে গছ-গছনিসমূহ কাটি বন ধ্বংসযজ্ঞত নামি পৰিছে তেনে সময়তে গছ-গছনিৰ প্ৰতি থকা মৰমে যোগেশ দলেয়ে প্ৰকৃতি প্ৰেমৰ এক সুন্দৰ নিদৰ্শন দাঙি ধৰিবলৈ সক্ষম হৈছে ৷
প্ৰকৃতিৰ প্ৰতি দায়িত্বশীল মনৰ অধিকাৰী যোগেশ দলেৱে সকলোকে গছপুলি ৰোপণ কৰিবলৈ আহ্বান জনাইছে । যদিহে ব্যক্তিগৰাকীক চৰকাৰীভাৱে কিছু সা-সুবিধা প্ৰদান কৰা হয়, তেন্তে নিশ্চিতভাৱে প্ৰকৃতিৰ ভাৰসাম্য ৰক্ষাত কিছু পৰিমাণে আগভাগ ল'ব পাৰিব ব্যক্তিগৰাকীয়ে ৷
লগতে পঢ়ক : এটি দম্পতীৰ হাতত ঠন ধৰি উঠা শিৱসাগৰৰ এখন বিশেষ অৰণ্য
